ފަލްސަފާ (29)

(1 ނޮވެމްބަރ 2023 ގައި ޝާއިއުކުރި ބަޔާ ގުޅޭ)

ޢާޞިފު އައިސް ގެޔަށް ވަތްތަނުން ކުރިމަތިވީ ތަހުނިޔާއާ ބެހޭގޮތުން ، ސާޖިދާކުރި ޝަކުވާ ތަކާއެވެ. މިފަހަރުގެ ޝަކުވާތައް ވަރަށް ސީރިއަސް އެވެ. ޠާހިރާއާ މުޚާތަބުކޮށް ދައްކައިގެން  ނުވާނެ އެތައް ވާހަކައެއް ، ޠާހިރާއާ ދިމާއަށް ، ތަހުނިޔާ މިއަދު ދައްކައިފިއެވެ. ޢާޞިފުވެސް އެކަމާ ހިތްހަމައެއް ނުޖެހުނެވެ.

ތަހުނިޔާގެ ކޮޓަރިޔަށްގޮސް ، ޢާޞިފުގެ ރުޅިގަނޑު ތަހުނިޔާއަށް ބާލަން ފެށްޓިއެވެ.

" ތަހުނިޔާއެވެ ! ތަހުނިޔާގެ ކައިވެންޏާމެދު އަމިއްލަޔަށް ވިސްނަން ، އަހަރެމެންނަށް ވަގުތު ދެވިއްޖެއެވެ. ވަކިގޮތަކަށް އެކަން ނިމުނީމަ ، މިހާރު ތަހުނިޔާ، ތަހުނިޔާ ތިއުޅެމުނަގަމުން ތިގެންދަނީ ، ތިއުޅެމުންދާ ގޮތާމެދު އަހަރެމެން އަނގައިން ނުބުނެ ތިބުމުގެ ފައިދާއެވެ. މުރުތަޟާގެ ގޭގެ މީހުންނަށްވެސް ތިކުރަނީ ޖެއްސުމެވެ. އެއީ ކާކަށް ކޮށްދޭ ކަމެއް ހެއްޔެވެ ؟ ހަމަގައިމުވެސް ތިކުރަނީ ، ތަހުނިޔާއަށް ފައިދާހުރި ކަމެއްނޫނެވެ. ތަހުނިޔާ ، ތިކުރާކަމެއް ތިކުރަނީ ނޫރުލްޢައިނުގެ ފައިދާއަށެވެ. ނޫރުލްޢައިނު ބުނާހާ ގޮތެއް ހަދައިގެން ތިއުޅެނީ ، އަހަރެމެން ލަދުގަންނަވަން ހެއްޔެވެ ؟ އަހަރެމެން ދެރަކުރަން ހެއްޔެވެ ؟ ތިކުރެވެނީ ކީއްކަން ތަހުނިޔާއަށް އެނގޭ ހެއްޔެވެ ؟ " ޢާޞިފު ، ޔަހުނިޔާއާ ދިމާއަށް ހަޅޭއްލަވަމުން އެއްޗެހިކިޔަމުން ގެންދިޔައެވެ.

ބައްޕަގެ ވާހަކަ އަޑުއަހަން ، އިސްޖަހައިގެން އިނުމަށްފަހު ، ތަހުނިޔާ ތެދުވެގެންގޮސް ބައްޕަގާތު ބިންމަތީ އިށީނދެލިއެވެ. ނޫރުލްޢައިނު ބުނާހާގޮތެއް އޭނާ ނުހަދާކަމަށް ތަހުނިޔާ ބުންޏެވެ. މީހަކު ލަދުގަންނަވަން ތަހުނިޔާ އެއްވެސް ކަމެއް ނުކުރެއެވެ.

ބައްޕަ ބުނީމަ ބަސްއަހައިގެން ތަހުނިޔާ ކިޔަމަންތެރިކަން އަދާކުރިއެވެ. މުރުތަޟާއާ ކައިވެނިކުރުމަކީ ، ތަހުނިޔާގެ ހިތުގައި އެއްވެސް ވަރަކަށް ، އެއްވެސް އިރެއްގައި އޮތްކަމެއްނޫނެވެ. އެކަމަކުވެސް ، މައިންބަފައިން ބުނީތީ ، އަދި ނޫރުލްޢައިނުއާމެދުވެސް ނުވިސްނާ ، އޭނާ އެކަމަށް އެއްބަސްވިއެވެ. އެއީ ތަހުނިޔާ ހިތްއެދޭކަމެއްނޫނެވެ. އެއީ ، މައިންބަފައިންނަށް އިޙްތިރާމް ނުކުރުންކަމަށް ވަންޏާ ، ދެން ، މައިންބަފައިންނަށް އިޙުތިރާމް ކުރުމަކީ ކޮބައި ހެއްޔެވެ ؟ ތަހުނިޔާ ، އޭނާގެ މައިންބަފައިންގެ ކިބައިން އެ އެދެނީ ހަމައެކަނި އެންމެ ކަމަކަށެވެ. އެއީ ނޫރުލްޢައިނުއާ އޭނާއާ ދެމެދު އުފެދިފައި އޮތް ރަޙުމަތްތެރިކަމުގެ ގުޅުން ބޭއްވުމުގެ ޙައްޤަށެވެ. އިތުރު އެއްވެސް ކަމެއް ތަހުނިޔާ ބޭނުމެއް ނުވެއެވެ. ކުޑައިރުއްސުރެ އެއޮތް ގުޅުން އެގޮތުގައި ބޭއްވުމުގެ ހުއްދައަށެވެ. މުރުތަޟާއާ ތަހުނިޔާ ދެވަން އޭނާގެ ބައްޕަމެން ނިންމުމުގެކުރިން ، ތަހުނިޔާއާ ނޫރުލްޢައިނުއާ ދެމެދު އޮތް ރަޙުމަތްތެރިކަމުގެ ގުޅުން ކަނޑައިލަން ޖެހޭނެ ވާހަކަ ބުނިނަމަ ، އެއްވެސް މައްސަލައެއް ދިމައެއްނުވީހެވެ. އެހެނަސް ، މިހާރު ވެގެން މިއުޅޭ ގޮތަކީ ، މުރުތަޟާގެ ޢާއިލާގެ މީހުންގެ ހިތުގައި ނޫރުލްޢައިނުގެ މައްޗަށް އޮތް ޙަސަދައިގެ އަގު އަދާކުރަން އެޖެހެނީ ތަހުނިޔާއަށެވެ. ތަހުނިޔާއަށް ކުރެވެން އޮތްކަމެއް ވިއްޔާ ، ބައްޕަމެންގެ އެދުމާ އެއްގޮތަށް އޭނާ އެދަނީ  ފުރިހަމަ ކުރަމުންނެވެ. ތަހުނިޔާއާ މެދުވެސް ޚިޔާލުކުރުމަކީ ، ތަހުނިޔާގެ މައިންބަފައިންގެ މައްޗަށްވެސް ލާޒިމްވާނެ ކަމެކެވެ.

ތަހުނިޔާގެ މައިންބަފައިން ފުރިހަމަކުރަން ޖެހޭނީ ، މުރުތަޟާގެ ޢާއިލާގެ މީހުން ބޭނުންވާ ގޮތް އެކަންޏެއްނޫނެވެ. ތަހުނިޔާ ބޭނުންވާ ގޮތަކާމެދު ، އޭނާގެ މައިންބަފައިންވެސް ވިސްނަން ޖެހޭނެއެވެ. ތަހުނިޔާއަށް ވާހަކަ ދައްކަމުންގޮސް ގިސްލައި ރޮވެން ފެށިއެވެ.

ތަހުނިޔާވެސް ބޭނުންވާ ގޮތްތަކެއް ހުންނާނެއެވެ. ތަހުނިޔާގެވެސް އޮންނަނީ ހިތެކެވެ. އޭނާގެ ނަފްސުގެވެސް އަގެއް ހުންނަން ޖެހޭނެއެވެ. މުރުތަޟާގާތުވެސް އަދި ނޫރުގާތުވެސް ، ތަހުނިޔާއަކަށް އެއްވެސް ވާހަކައެއް ދެއްކޭކަށް ނެތެވެ. ކޮންމެ މީހަކުވެސް އައިސް ތަހުނިޔާއަށް ވިސްނައިދެނީ ، ކުޑަކުއްޖަކަށް ކަންކަން ވިސްނައިދޭ ގޮތަށެވެ. އެކަން ނުކުރާށޭ މިކަން ނުކުރާށޭ ކިޔަމުންދާއިރު ، ތަހުނިޔާއަކީވެސް ބޮޑުވެފައިހުރި އަންހެންކުއްޖެކެވެ. ރަނގަޅު ތަރުބިއްޔަތެއްލިބި ، ރަނގަޅަށް ކިޔަވައިގެންހުރި ކުއްޖެކެވެ. އެކިމީހުން އައިސް ތަހުނިޔާގާތު އެދައްކަނީ އޭނާއަށް ނުވިސްނޭ ، ވާހަކަ ތަކެއްނޫނެވެ. ކޮންމެ މީހަކުވެސް އައިސް އެ ބުނަނީ އެމީހަކު ބޭނުންވާ ގޮތުގެ ވާހަކައެވެ. އެންމެން ބޭނުންވާ ގޮތް ޔަހުނިޔާގާތު ބުނާއިރު ، ތަހުނިޔާ ބޭނުންވާގޮތެއް އޮންނާނެކަމަކަށް އެއިން އެކަކުވެސް ހިތަކަށް ނާރައެވެ. އެއީ ކޮންކަހަލަ އިންސާފެއް ހެއްޔެވެ ؟

ތަހުނިޔާއަކީވެސް ބޮޑުވެ ފިރިފުރާވަރަށް އަޅާފަހުރި ކުއްޖެކެވެ. އޭނާއަށް ރަނގަޅުވާނެ ގޮތާއި ގޯސްވާނެގޮތް އެނގެއެވެ. ހެވާއި ނުބައި ވަކިކުރަން އެނގެއެވެ. މުރުތަޟާއާއި ތަހުނިޔާ ދުރުކުރާކަށް ނޫރުއެއް ނޫޅެއެވެ. އެކަން މުރުތަޟާއަށްވެސް އެނގެއެވެ. އެތިންމީހުން ވާހަކަ ދައްކައިގެން ގޮތްތަކެއް އެއޮތީ ހޯދާފައެވެ. ތަހުނިޔާގެ ކައިވެންޏަށް ނޫރު އިންކާރެއް ނުކުރެއެވެ.

ތަހުނިޠާއާއި ނޫރުއާ އަދި މުރުތަޟާ އާ ތިންމީހުން ވާހަކަދައްކައިގެން ޙައްލުކޮށްފައި އޮތްކަމަކަށް އެހެންމީހުން އައިސް ގޮތްކިޔަންވީމަ ރުޅިއައުމަކީ ، ތަހުނިޔާއަށްވެސް އޮންނަންޖެހޭނެ ޙައްޤެކެވެ. އެތިންމީހުންވެސް ، އެމީހުން އެއްބަސްވެފައި އޮތްގޮތަށް ޢަމަލު ކުރާނެއެވެ. އެކަކު އަނެކަކާ ދެބަސްވެ މައްސަލަޖެހޭނެ ގޮތަކަށް ނޫޅޭނެއެވެ. ބައްޕައާއި މަންމަމެން ، ތަހުނިޔާގެ ނިންމުންތަކަށް އިތުބާރުނުކޮށް ، އެތިންމީހުންގެ ނިންމުމަށް އިހްތިރާމް ނުކުރަން އެއުޅޭ ސަބަބެއް ތަހުނިޔާއަކަށް ނޭނގެއެވެ. ތަހުނިޔާއާއި ނޫރުއާ ދެމެދު އޮތްގުޅުން ކަނޑައިލުމަކީ އެންމެންވެސް ބޭނުންވާ ގޮތެވެ. އެކަމަކު އެއީ އެތިންމީހުން ބޭނުންވާގޮތެއްނޫނެވެ.

ތަހުނިޔާ ރޮމުންރޮމުން ދެއްކި ވާހަކަތައް އަޑުއަހަން އިނދެފައި ޢާޞިފް ތެދުވިއެވެ. އިރުކޮޅަކުން ޙަފުޞާމެންވެސް ރޭގަނޑު ކާން އަންނާނެއެވެ. މަންމަޔާ އެހީތެރިވެލަން ، ތަހުނިޔާ ބަދިގެފަރާތަށް ދިއުމަކީ ޢާޞިފް އެދޭކަމެކެވެ.

" މައިންބަފައިންގެ އެދުމަށް އެއްބަސްވުމަށްފަހު ، އެމީހުންނަށް ތަކުލީފު ލިބޭނެ ކަންކަން ނުކުރާށެވެ. " ޢާޞިފް ހަމަޖެހި ، ހިނިތުން ވެލުމަށްފަހު ، ޠާހިރާގެ ބޮލުގައި ފިރުމައިލިއެވެ. ތަހުނިޔާގެ ވާހަކަތައްވެސް ޢާޞިފަށް ޤަބޫލު ކުރެވުނެވެ. ތަހުނިޔާގެ އެއްވެސް ވާޙަކައެއް ޤަބޫލު ނުކުރެވެނީ މަންމައަށެވެ.

ނޫރު އޭނާގެ ކާރުގައި އައިސް ، މުރުތަޟާގެ ގޭކައިރިޔަށް މަޑުކޮށްލިތަނުން ، މުރުތަޟާ ކާރުން ފޭބިތަން ފެނުނެވެ. ނޫރުގެ ކާރު ހުއްޓައިލުމަށްފަހު ، މުރުތަޟާއާ ދިމާއަށް މިސްރާބު ޖަހައި ކާރުގެ ސްޕީޑް ބާރުކޮށްލިއެވެ. އަދި މުރުތަޟާގެ ގައިގާ ޖެހޭ ނުޖެހޭ ހިސާބަށްގޮސް ކާރުގެ ބުރަކި ޖައްސައި ކާރު މަޑުކޮށްލިއެވެ. މުރުތަޟާ އައިސް ކާރުގެ ކުޑަދޮރުން ބަލައިލާ ، ނޫރު އެކުރަން އުޅެނީ ކޮންކަމެއްތޯ ސުއާލުކުރިއެވެ. އަދި ދެންމެ ވާން އެއުޅުނީ ކިހާވަރެއްގެ ކަމެއްކަން ނޫރުއަށް އެނގޭތޯ ސުއާލު ކުރިއެވެ.

" ވާނެގޮތެއް އެނގޭނީ ކިހިނެއް ހެއްޔެވެ ؟ އެކްސިޑެންޓެއް ނުވޭނޫން ހެއްޔެވެ ؟ " ނޫރު ޖަވާބުދިނެވެ.

ނޫރު އެއައި ބާރުމިނުގައި ، ކޮންޓްރޯލް ނުވެގެން އެކްސިޑެންޓެއްވެސް ވެދާނެއެވެ. އެކްސިޑެންޓަކީ ، ގަސްތުގައި ކުރާކަމެއްނޫނެވެ. އެއީ އިންސާނާގެ ކޮންޓްރޯލު ނެއްޓިގެންގޮސް ވާން ދިމާވާ ކަމެކެވެ. މުރުތަޟާ ހުރީ ، ނޫރުއެކުރި ކަމަކުން ހިތްހަމަ ނުޖެހިފައެވެ. މަގުގެ ދެފަރާތުގައި އޮތް ހުސްތަން ނޫރުއަށް ނުފެންނަނީތޯ މުރުތަޟާ ސުއާލު ކުރިއެވެ.

ނޫރުއަށް ކުރިމަތިން އެއްވެސް އެއްޗެއް ނުފެންނަކަމަށް ހެދިއެވެ. މުރުތަޟާވެސް އަދި މުރުތަޟާގެ ކާރުވެސް ނޫރުއަކަށް ނުފެނެއެވެ.

" ކިހާ އަޖައިބުކަމެއްދޯއެވެ ؟ އިންސާނާއަށް ވަކިއެއްޗެއް ފެނުން ގެއްލިއްޖިއްޔާ އެއެއްޗެއް އަލުން ފެންނަގޮތެއް ނުވާނެއެވެ. އަދި އެއެއްޗެއް ބަލާކަށް ބޭނުމެއްވެސް ނުވާނެއެވެ. " ނޫރު ބުންޏެވެ.

ނޫރު އެބުނި ވާހަކަޔަކަށް ގެއްލިފައި ހުރުމަށްފަހު ، މުރުތަޟާ އޭނާގެ ގެޔާދިމާއަށް ހިނގައިގަތެވެ. އެވަގުތު އަނެއްކާވެސް ނޫރު ، ވާހަކައެއް ބުނެލިއެވެ. ތަހުނިޔާ ގޮވައިގެން ، ރޭގަނޑުގެ ކެއުމަށް ދާވާހަކައެވެ. ދަނީވެސް ނޫރުއާއި މުރުތަޟާ އެންމެގިނައިން ދިޔަ ރެސްޓޯރެންޓަށެވެ. އެ ރެސްޓޯރެންޓުގެ ވާހަކަ މާގިނައިން ނުދެއްކިޔަސް ، އެ ރެސްޓޯރެންޓް މަތިން މުރުތަޟާ ހަނދާން ހުންނާނެވާހަކަ ނޫރު ބުންޏެވެ. އެތަނުގެ ހަނދާންތައް މުރުތަޟާގެ ހިތުގައި އަބަދުވެސް ހަރުލައި ހުންނާނެއެވެ.

މަލާމާތުގެ ހިނިތުންވުމެއްގައި އިން ނޫރުއާ ދިމާއަށް މުރުތަޟާ ، އެނބުރި ބަލައިލިއެވެ. މުރުތަޟާ ބޭނުންކަމަށް ވަންޏާ އެމީހުންނާއެކީގައި ދެވިދާނެކަމަށް ނޫރު ބުންޏެވެ. ނޫރުވެސް އަދި ތަހުނިޔާވެސް މުރުތަޟާއަށް މަރުޙަބާ ކިޔާނެއެވެ. އަދި އެއީ ނޫރު ވަރަށް ހިތްހަމަޖެހޭނެކަމެއްކަމަށްވެސް ނޫރު ބުންޏެވެ. އެކަމަކު އެއީ  ތަހުނިޔާ ހިތްހަމަޖެހޭނެކަމެއްކަމެއް ނޫރުއަކަށް ނޭނގެއެވެ.

ނޫރުގެ ވާހަކަތައް އަޑުއަހަން ހުރެފައި ، ބޯހަލުވައިލުމަށްފަހު މުރުތަޟާ އަނެއްކާވެސް އޭނާގެ ގެޔާދިމާއަށް ހިނގައިގަތެވެ.

ތަހުނިޔާ ހުރީ ބަދިގެތެރެޔަށްގޮސް ، ކިއުކަމްބާއެއް ކޮށާށެވެ. ތަހުނިޔާ ، އެ ކިއުކަމްބާ ކޮށަމުން ގެންދިޔައީ އަތުގައި ހުރިބާރެއްލާފައެވެ. މުޅި ބަދިގެތެރެޔަށް ބާރަށް އަޑު އިވޭ ވަރަށެވެ. ތަހުނިޔާ އެކޮށާ އެއްޗެއް އެހާބާރަށް އެކޮށަނީ ކީއްވެތޯ ސާޖިދާ ސުއާލު ކުރިއެވެ. އަދި ތަހުނިޔާ އެއެއްޗެއް އެކޮށަނީ ކޮށަން ނޫންކަމާއި ، ހިތުގައި އޮތް ރުޅިގަނޑު އެއަށް ބާލަނީކަމަށްވެސް ސާޖިދާ ބުންޏެވެ.

މަންމަ ކައްކާއިރު އެހީތެރިވެދޭނެކަމަށާއި އެއްމެންނާއެކީ އޭނާ ނުކާނެކަމަށް ތަހުނިޔާ ބުންޏެވެ. އަދި އެކަމަށް އޭނާއަށް މަޖުބޫރު ނުކުރުމަށް މަންމަގެ ކިބައިން އެދުނެވެ. އެހެންނަމަވެސް ، އެންމެންނާއެކި ތަހުނިޔާއަށް ނުކެވެންވީ ކީއްވެތޯ ސާޖިދާ ސުއާލުކުރިއެވެ.

ތަހުނިޔާއާއި ނޫރު ، އެރޭގެ ކެއުމަށް އެކީގައި ތަނަކަށްދާން އޮތީ އެއްބަސްވެފައެވެ. އެވާހަކަ ސާޖިދާއަށް އަންގައިލިއެވެ. ނޫރުއާއެކީ ބޭރަށްދާވާހަކައެއް ތަހުނިޔާއެއް ނުބުނެއެވެ. އެކަމަކު ، މޭޒުމައްޗަށް ކާއެއްޗެހިގެންދަން މަންމައަށް އެހީތެރިވެދޭނެކަމަށާއި އޭގެފަހުން ރައްޓެހިންކޮޅަކާއެކު ކާން ބޭރަށްދާނެވާހަކަ ބުންޏެވެ. އަދި ، އެކަން އޭނާއަށް މަނާ ނުކުރުމަށް ތަހުނިޔާ އެދުނެވެ.

ތަހުނިޔާ ބޭރަށްދަނީ ކާކާއެކުގައިތޯ ސާޖިދާ ސުއާލުކުރިއެވެ. އެހިސާބުން ، ނޫރުގެ ވާހަކަ ބުނަން ތަހުނިޔާއަށް މަޖުބޫރުވިއެވެ. އަދި އޭނާ އެދަނީ ނޫރުއާއެކީގައިކަމުގައި ބުންޏެވެ. އެވަގުތު ، ޢާޞިފް ދުވަމުން ދުވަމުން އައިސް އެމީހުން އައިވާހަކަ ސާޖިދާ ގާތު ބުންޏެވެ. އަދި ތަހުނިޔާ އެދިޔައީ ކޮންތާކަށްތޯ ސުއާލު ކުރިއެވެ.

ސާޖިދާ ކިތަންމެ ބޭނުންނުވިޔަސް އެވާހަކަ ޢާޞިފްގާތު ބުނަން މަޖުބޫރުވިއެވެ. ތަހުނިޔާ އެދިޔައީ ތައްޔާރު ވެލާށެވެ. ރޭގަނޑުގެ ކެއުމަށް ބޭރަށް ދާށެވެ. ނޫރުލްޢައިނާ އެކުގައެވެ. ސާޖިދާ ގޮސް އެމީހުންނާ ބައްދަލުކޮށްލުމަށް ޢާޞިފު އެދުނެވެ.

ސާޖިދާ ފޮނުވައިލުމަށްފަހު ، ޢާޞިފް ގޮސް ތަހުނިޔާގެ ކޮޓަރީގައި ޓަކިޖަހައިލުމަށްފަހު ، އެކޮޓަރިޔަށް ވަނެވެ. ކޮޓަރީގެ ދޮރުހުރީ ހުޅުވައިފައެވެ.

" ދަރިފުޅާއެވެ ! ދަރިފުޅު ރޭގަނޑުގެ ކެއުމަށް ބޭރަށް ދާވާހަކަ މަންމަ ދެންމެ ބުނެފިއެވެ. ގެޔަށް މެހެމާނުންވެސް އައިސް އެބަ ތިއްބެވެ. " ޢާޞިފް މަޑުމައިތިރި ކަމާއެކު ބުންޏެވެ.

ޙަފުޞާމެން އެގެޔަށް އެރޭ އަންނަކަން ތަހުނިޔާއަކަށް ކުރިން އެނގިފައެއް ނެތެވެ. އެއްވެސްކަމެއް ވަނީކީ ތަހުނިޔާއަށް އެނގިގެންނެއްނޫނެވެ. ތަހުނިޔާއަށް އެކަމެއް އެނގެނީ އެންމެ ފަހުވަގުތުގައެވެ. މިއީ ހަމައެކަނި އެރޭ ވީގޮތެއްނޫނެވެ. އަބަދުވެސް އެކަން އޮންނަނީ އެގޮތަށެވެ. ތަހުނިޔާ އޭނާގެ ޝަކުވާ ބައްޕަޔަށް ހުށަހެޅިއެވެ. ތަހުނިޔާއަށްވެސް އެނގިގެން ކަންކަން ހިނގަމުންދާނަމަ ، އެރޭ އެދިމާވިފަދަ ކަމެއް ދިމަލެއް ނުވާނެއެވެ. އެމީހުން އައިކަމަށް ވަންޏާ ، އޭނާ ބޭރަށްދިއުން ކެންސަލް ކޮށްލަންވީތޯ ތަހުނިޔާ ސުއާލު ކުރިއެވެ.

ތަހުނިޔާ ބޭރަށް ދިއުން ކެންސަލްކުރާކަށް ޢާޞިފް ބޭނުމެއް ނުވިއެވެ. އެހެންނަމަވެސް ، މެހެމާނުންނަށް ކުޑަވަގުތުކޮޅެއް ދީފައި ލަސްނުކޮށް ބޭރަށް ދިއުމަށް ޢާޞިފް ، އޭނާގެ ދަރިފުޅަށް ނަޞޭޙަތްތެރިވިއެވެ. ބައެއްފަހަރަށް ދިމާވާކަންކަމުގައި ކުޑަކޮށް ބަދަލުކޮށްލަންޖެހޭ ކަންކަން ހުންނާނެއެވެ. އޭރަށް މީހުންކުރަން ހުންނަ ޝަކުވާވެސް މަދުވާނެއެވެ. ޢާޞިފް އޭނާގެ ދަރިފުޅުގެ ބޮލުގައި ފިރުމައިލުމަށްފަހު ވިސްނިއްޖެދޯއޭ ބުނެ ކޮޓަރިން ނުކުތެވެ. އަދި ، ތައްޔާރުވެލައިގެން ލަސްނުކޮށް ތަހުނިޔާ އައުމަށް އެދުނެވެ. ތަހުނިޔާވެސް ، އެކަމާ ވިސްނައިލުމަށްފަހު ، ބައްޕަގެ އެ ނަޞޭޙަތް ޤަބޫލުކުރިއެވެ. އަދި ނޫރުއަށް ފޯނުކުރިއެވެ.

ނޫރު ރީތިވެލަން އުޅެނިކޮށް ފޯނެއް އައެވެ. އެއީ ތަހުނިޔާގެ ކޯލެކެވެ. ފޯނު ނެގުމާއެކު ، ނޫރު އެންމެ ފުރަތަމަވެސް ބުނީ ، އެމީހުން ބޭރަށްދާން ނިންމާފަ އޮތްއޮތުން ކެންސަލްވީ ވާހަކަ ނުބުނައްޗޭ އެވެ.

އެމީހުން ބޭރަށްދާނެކަން ތަހުނިޔާ ނޫރުއަށް ކަށަވަރުކޮށްދިނެވެ. އެކަމަކު ކުޑަކޮށް ލަސްކޮށްލާފައި ދެވިދާނެތޯ ސުއާލު ކުރިއެވެ. ބައްޕަ ބުނިގޮތުން ، ޙަފުޞައްތައާއިޠާހިރާއާއެކު އިރުކޮޅެއް ހޭދަކޮށްލުން ވަރަށް މުހިންމެވެ. އޭރަށް ޙަފުޞައްތަމެންގެ ހިތްހަމަ ނުޖެހުމެއް ނޯންނާނެއެވެ. އެހެންނޫނީ ، ޙަފުޞައްތަމެން އައިސް ތިއްބާ ، އެމީހުންނާއެކު ވަގުތުކޮޅެއް ހޭދަނުކޮށް ނޫރުއާ އެކީ ބޭރަށް ގޮއްސިއްޔާ ، ޙަފުޞައްތަމެން ހިތްހަމައެއް ނުޖެހޭނެއެވެ. އެއީ ބޮޑު ކަންތައްގަނޑަކަށް ހަދާނެއެވެ.

" އަދި ތިއުޅެނީ ކައިވެނި ނުކުރެވިގެންނެވެ. މިހާ އަވަހަށް މައިދައިތަމެންނާމެދު ވިސްނަން ފެށީދޯއެވެ. ވަރަށް ރަނގަޅެވެ. އެކަމަކު އަހަރެން މިހުރީ ވަރަށް ބަނޑުހައިވެފައެވެ. ވީއެންމެ އަވަހަކަށް ދާން އަހަރެން ބޭނުމެވެ. ދިހަވަރަކަށް މިނިޓް އެމީހުންނަށް ފުދޭނެއެވެ. އެހާއިރުވާންވާއިރަށް އަހަރެން ތިގޭދޮށަށް ދާނަމެވެ. " ނޫރު ބުންޏެވެ.

އެހާ އަވަހަށް ނޫރު އަންނާކަށް ތަހުނިޔާ ބޭނުމެއްނުވިއެވެ. އެއަށްވުރެ ލަސްކޮށްފަ ނޫރު އައުމަށް ތަހުނިޔާ އެދުނެވެ. އެހެން ނޫނީ އެއްވެސް ކަމަކާ ނުލައި ބޮޑު މައްސަލަތަކެއް އުފެދޭނެއެވެ. ނޫރު އެކަމަކަށް އެއްބަހެއް ނުވިއެވެ. އަދި ތައްޔާރުވެލައިގެން އޭނާ އެއަންނަނީ ކަމަށް ބުނަމުން ، ތަހުނިޔާ ވާހަކަ ދައްކަ ދައްކާހުއްޓާ ފޯނު ކަނޑައިލިއެވެ. ( ނުނިމޭ )