އިތުރަށް ގަންނާނެ ލަދެއް ޙަޔާތެއް އެބަ އޮތް ހެއްޔެވެ ؟ އެއީ ، އަމިއްލަޔަށް ތާހިރުވާން ދަސްވީއްސުރެ އެމީހުންގެ އާދައެވެ. ކުރާކަށް ކުރާކަށް ކަމެއް ނޯންނާނެއެވެ. ބުނާކަށް ބުނާކަށް އެއްޗެއް ނޯންނާނެއެވެ. މިއަދު ކުރާކަމަކުން އެމީހުން ގަންނާކަށް އިތުރު ލަދެއް ނޯންނާނެއެވެ. ލަދުގަތަސް ގަންނަންޖެހޭނީ އެހެންމީހުންނެވެ. އެއީ 2019 ގައި ދުނިޔެއަށް ކުރިމަތިވި ކޯވިޑްގެ ޢާލަމީ ވަބާއަށްވުރެ ވަކިން ކުޑަ ވަބާއެއްނޫނެވެ. ޤާނޫނަކަށް ، ޤަވާޢިދަކަށް ، ޤައުމީ މަޞްލަޙަތަކަށް އަދި ، ޢާންމު އުސޫލަކަށް ތަބާވަނީކީ ނޫނެވެ. ކޮންމެ އެއްޗަކުން ލޯވަޅެއް ފެނުނަސް އެ ދެމިގަންނަނީ ލޮނދި ހިކައެއް ހެންނެވެ. ބާރެއް ލިބިއްޖިއްޔާ އަރާގޮތަށް ފައިބާކަށް ނޭނގެއެވެ. ބުޅާ ގަހަށް އެރުވީމަ ފައިބަން ނޭނގި ހޭރިހޭރި އޮންނަގޮތަށް އިންސާނުންގެ ލަދުޙަޔާތް އަރުއްވައިގަތީމަ ، ބޯނެ އެއްޗެއް ބޮއެގެން ، ކަނަކު ޢިޝާނަމާދަށް ދާހެން މަގުހިނގުމަކީ މޮޅުކަމެކޯލައެވެ. ރައްޔިތުންގެ ޓެކްސް ފައިސާއިން އެތައް މިލިއަނެއް ފައިކޭޓަށް ކަހައިލައިގެން ، އެތަން ބަލަން އަތްޖަހަންތިބޭމީހުން އެތިބެނީ ހަމަހޭގައިތޯ ބަލަން ޓެސްޓެއް ހަދާވަރު ވެއްޖެއެވެ. ކޮންމެ ފަހަރަކު ގަދަކަމުން ގަހުން ބާލާއިރުވެސް ، ގަހަށް އެރިއްޖިއްޔާ ބުޅަލަކަށް ފައިބާކަށް ނޭނގެއެވެ. އެކަމަކު ، އަތުންފައިން ގޯސް ހެދުނަސް ގަހަށް ނާރައެއްވެސް ނުހުރެވެއެވެ. ކިތަންމެ ވަރަކަށް ވަކިއެޅި ގަސްހަލާކުވިޔަސް ، ކާއްތަކާއްތައި ފޫކޮޅު ހަލާކުވިޔަސް ވަށިހަމައެވެ. ލޭކޮށުނަސް ގޮތެއް ދުލެއް ނުކުރާނެއެވެ.
އެހެން ނުވާންވީ ސަބަބެއްވެސް ނެތެވެ. ގަހަށް ނޭރިގެން އުޅެންފެށީމަ ، ފޫކޮޅުގައި ހިފައިގެން ކޮއްޕައި ، ގަދަކަމުން ގަހަށް އަރުވައިދޭމީހުންވެސް އޭގެތެރޭގައި އެބައުޅެއެވެ. އެއްގަހަކަށް ތިމާގެ ދެބުޅާ އަރުވައިގެން ބުޅަލުގެ ނަސްލު ބޭނުންވާ ކޮންޓްރޯލުން ސަލާމަތް ނުވެގެން ކުރާކަންކަން އެބަ ފެނެއެވެ. އެއްގަހަކަށް ، ތިމާގެ ދެބުޅާ ނާރުވާށޭ ، އޭރުވެސް އެތައްބަޔަކު ގޮވަމުން ގެންދިޔައެވެ. އެއަޑު އިވުނު މީހަކު ނެތެވެ.
ބުޅަލަކީ ހޫނުގަދަ ޖަނަވާރެކެވެ. ބުޅަލުގެ މަސްކައިފިއްޔާ ، އިންސާނުން ދުޅަވެއެވެ. ބުޅާ ކޯޅިފައިދާއިރު ، ރޯފަތުން އަނދާފައި ހުންނަތަންތަން ފެނެއެވެ. ބުޅަލަށް ޑެންގޫ ހުންވެސް ޖެހެނީއެވެ. ހުންޖެހިދާނެކަމަށް ސެޓްފިކެޓް ހެއްދުމުގެ އެއްދުވަސްކުރިން ގަސްދޮށަށް ދިޔަޔަސް ، އެބުޅަލަށް ބޭނުންވެގެން ގޮވައިފިއްޔަކާ ، ހުން ނެތަސް ގަސްދޮށަކަށް ނުދާނެއެވެ. އެދުވަހު އެއޮތީ ޑެންގޫ ޖެހިފައެވެ. މަކަރާ ޖަހައިގެން ދުނިޔެކައި އުޅޭނެއެވެ. އެއީ ، މާކުރީއްސުރެ ތައްގަނޑުޖެހިފައި އޮންނަ ލާއިންސާނީ އަދި ލާދީނީ ފިކުރެކެވެ. އެއްކަލަ ، ފިކުރެއްގެ ދިރުމުގެ އަސްލަކީ އެއީއެވެ. ދެކޮޅުވެރިކަމާއި ބައިބައި ވުމެވެ. ތިމާނޫން އެހެންމީހަކަށް ބާރެއްލިބިފައި އޮންނަން ބޭނުން ނުވުމެވެ. އެހެން މީހަކަށް ހެވެއް ނޭދެވުމެވެ. ބައްޕަ ބުޅާނޫން އެހެންގޮތެއް އިޚުތިޔާރު ކުރަން ޖެހިއްޖެ ޙާލަތެއްގައި އަންނަ ރުޅިއެވެ. އަންނަ ރުޅީގައި ހިތުގައި އުފެދޭ ޙަސަދައެވެ. އެ ޙަސަދައިން ޤައުމު ސުންނާފަތިވުމެވެ. ޤައުމު ސުންނާފަތިވާއިރުވެސް ރޭކާލާކަމަށް ނުހަދައި ، އަމިއްލަ އެދުން އިސްކުރުމެވެ. އަމިއްލަ އެދުމަށްޓަކައި ކަންބަޅިއެއް ކަތިލާހެން އެތައް ބަޔަކު ކަތިލުމެވެ. ބައިބައިވުމާއި ރުޅިއާއި ނަފުރަތުން ފަސާދައިގެ މަގަށް މުޖުތަމަޢު އަނބުރައިލުމެވެ. އިންޑިއާގެ ގިނަސިޓީތަކުން އެމްޖީ ރޯޑު ފެންނަގޮތަށް ، އެ އެމްޖީ ރޯޑްގެ ރެޑްލައިޓް އޭރިއާ އަށް ވަދެ ހިތުހުރިގޮތަކަށް އުޅުމެވެ. ﷲ ވޮޑިގެންވާކަން ހަނދުމަނެތި ، ދުނިޔޭގެ އެދުމަށް ހެއްލި ، ގެއްލި ހަލާކުވުމެވެ. ތިމާ ޖަހާހާ ބެރަކަށް ، އެންމެންނެއް ، އަބަދަކު ނުނަށާނެއެވެ.
ކޮންމެ ކަމަކީވެސް ، ކޮންމެ އެއްޗަކީވެސް ނެތި ފަނާވެދާނެ އެއްޗެކެވެ. އިންސާނާގެ ޢުމުރުގެ ފަހުކޮޅަށް ދާއިރު ، އެކަން އިޙްސާސް ނުވަންޏާ އެއީ ސިކުނޑީގެ ބައްޔެއް ހުންނަ މީހެކެވެ. ބޯ ހުދުވިޔަސް ކަޅުކުލަޖައްސައިގެން ދުނިޔެއަށް އޮޅުވައިލެވިދާނެއެވެ. އެހެނެއްކަމަކު ، ބޯހުދުވެފައިހުރިތަން ފެންނަ މީހުންނަކަށް އެކަމެއް އޮޅުވައެއް ނުލެވޭނެއެވެ. ބޮލުން ފަތްފައިބަމުންގޮސް ތަލަވެސް ވާނެއެވެ. ކަންނާޑިއަކުން ނޫނީ ތިމާއަށް އެތަން ނުފެނުނަސް އެހެންމީހުންނަށް އެތަން ފެންނާނެއެވެ. ލޯބޯކޮށިވެ ، އައިނު އަޅައިގެން ނޫނީ ލޮލަށް އެއްޗެއް ފެންނަވަރެއް ނުވާނެއެވެ. ފަހަރަކު ދަތަކުން ، ދަތްތައް ފައިބައި ، އަނގައިން ސޮނި ހިކެމުންދާނެއެވެ. ކުރިން އެއް ނޭވާއިން ކިޔާއެއްޗެއް ދެ ނޭވާއިން ކިޔޭވަރަށް ނޭވާ ކުރުވާނެއެވެ. މައިބަދަ އާއި ހުޅުހުޅު ލެނބި އިސްކޮޅުން ކުރުވަމުން ދާނެއެވެ. ނިޔަފަތި ދިގުވާލެއް ލަސްވާނެއެވެ. މިހިރަ މިހިރަ ކަންކަމަކީ ، އިންސާނާ ޤަބޫލުކުރަން ބޭނުންވާ ކަންކަން ނޫންނަމަވެސް ، ދުނިޔެ ދައްކާ ޙަޤީޤަތެވެ.
މި ހުރިހާ ޙަޤީޤަތެއް ތިމާއަށް އެނގޭއިރުވެސް އަރުވާ ގޮނޑިން ، އެ ގޮނޑިއަށް އެމީހާ އަރުވާމީހުން ބާލަން އުޅުނީމަ ، ގޮނޑީގެ އަތްގަނޑު ބިނދޭވަރަށް ، ފައިގެ މަކުޑިތައް ދޫވާވަރަށް ، ބަގުޑި ބައްދައިގެން އިނުމަކީ ، ހާދަހާ ލަދު ހުތުރު ކަމެކެވެ. އެކަމަކު ، ލަދުގަންނާނީވެސް ، އެމީހެއްގެ ތަބީޢަތުގައި ލަދެއް ޙަޔާތެއް ހުންނަ މީހެއްތާއެވެ. ބުޅަލަކީ ހޫނުގަދަ އެއްޗެއްވީމަ ، ޑެންގޫ ސެޓްފިކެޓް ހޯދުމަކީވެސް އެހާ އުނދަގޫ ކަމަކަށް ނުވާނެއެވެ. ލާރިއަށް ނުލިބޭ ބާރެއް ، ނުވިކޭ މީހެއް ، ނުކެވޭ އެއްޗެއް މަދުވާނެއެވެ.
މިހާ ޙަސަދަވެރިވާކަށް ނުވާނެ ޤައުމަށް އެތައް ބަދަލެއް ގެންންނެވި ރައީސް ބުޅަލެއް ދަރަޖައަށް ވައްޓާލުމަކީ ވވ.ނާތަހުޒީބީ ކަމެއް ވވ.ފެންވަރެއް ޙަސަދައިން ފުރިފައިވާ ލިޔުމެއް މިކޮމެންޓް ނުޖަހާނެ