ސެޕްޓެމްބަރު މަހުބާއްވާ ރިޔާސީ އިންތިހާބުގައި ވާދަކުރައްވާ ޕީއެންސީގެ ކެންޑިޑޭޓް، ޑރ. މުހައްމަދު މުއިއްޒު އަށް ތާއީދު ކުރެއްވުމަށް ކުރީގެ ބަންޑާރަނައިބު ޑރ. މުހައްމަދު މުނައްވަރު ނިންމަވައިފިއެވެ.
މުނައްވަރު މީގެކުރިން ވަނީ މިއަހަރުގެ ރިޔާސީ އިންތިހާބުގައި ވާދަކުރެއްވުމަށް ވެސް ނިންމަވާފައެވެ. ނަމަވެސް ވަކި ހިސާބަކުން އެ ޚިޔާލު ދޫކޮށްލައްވާ، އޭނާ ވަނީ ރިޔާސީ ރޭހުގައި ވާދަނުކުރައްވާނެކަން ހާމަކުރައްވާފައެވެ.
ޕީއެންސީ، ޕީޕީއެމް ކޯލިޝަންގެ ކެންޑިޑޭޓް ޑރ. މުހައްމަދު މުއިއްޒުއަށް ތާއީދު ކުރެއްވުމަށް ނިންމަވާ، މުނައްވަރު ވަނީ މުއިއްޒަށް ކެމްޕޭން ކޮށްދެއްވުމުގެ ފުރަތަމަ ދަތުރުގައި މުނައްވަރާއި އޭނާގެ ޓީމު މުއިއްޒާ އެކު މާދަމާ އައްޑު އަށް ވަޑައިގަތުމަށް ނިންމާފައެވެ.
މުނައްވަރު ވިދާޅުވެފައިވަނީ ރިޔާސީ އިންތިހާބުގައި ވާދަކުރައްވާ 8 ކެންޑިޑޭޓުންގެ ތެރެއިން އެންމެ ގާބިލު ބޭފުޅެއް ކަމަށް އޭނާއަށް ފެނިވަޑައިގަންނަވަތީ މާލޭގެ މޭޔަރުކަން ވެސް ކުރައްވާ މުއިއްޒު ކަމަށެވެ.
އެމްޑީޕީގެ ރައީސްކަން މުނައްވަރު ވަނީ 2007 ވަނަ އަހަރު ކުރައްވުމަށްފަހު އެމްޑީޕީއަށް ވަރަށް ބޮޑަށް ފާޑުވިދާޅުވެ، އޭނާ ވަނީ އެ ޕާޓީން ވަކިވެފައެވެ. އަދި ޖުމްހޫރީ ޕާޓީ އާއި ގުޅިވަޑައިގެން ދުވަސްކޮޅަކަށްފަހު އެ ޕާޓީއާ ވެސް ދުރަށް ޖެހި ވަޑައިގެންނެވިއެވެ.
