ޚިދުމަތަކީ ، ކުރާ މަސައްކަތެކެވެ. ކޮށްދެވޭ ކަމެކެވެ. ހިލޭ ސާބަހަށް ، ދަރުމައަށާއި އަގަށް ކޮށްދެވޭ ކަންކަމެވެ. ޚިދުމަތްކުރުމުގައި މީހާގެ ނިޔަތާއި ޢަމަލަކީ މުހިންމު އެއްޗެކެވެ. އަގަށް ކުރެވޭ ޚިދުމަތެއްގައި ކުރާހިތުން ކުރުމާއި ، ނުކޮށް ނުވެގެން ކުރުމާއި އަގާއެއްވަރަށް އެކަމެއް ކުރުން އޮވެއެވެ. ދަރުމައަށް ކުރެވޭ ޚިދުމަތަކީ ، އެކަމަކަށް ހިތްޖެހިގެން ކުރާހިތުން ކުރެވޭ ކަންކަމެވެ. ނުކޮށް ނުވެގެން ކަމެއްކުރަން ޖެހިއްޖެ ޙާލަތެއްގައި ، އެކަމެއް ނުކުރުމުގެ އިޚުތިޔާރު ލިބި އޮންނާނެއެވެ. އެހެންނަމަވެސް ، އަގަށް ކުރެވޭ މަސައްކަތެއްގައި ، އެކަމެއް ކުރުން ލާޒިމު ވެއެވެ.
ޚިދުމަތުގެ އަގުވަޒަންކުރުމުގައި ، ދަރުމަވެރިންކުރާ މަސައްކަތާއި ، އަގުކިޔައިގެން މަސައްކަތްކުރާމީހުންގެ މަސައްކަތް ވަޒަންކުރުމުގައި ތަފާތުތަކެއް އޮންނަން ޖެހެއެވެ. ވަޒީފާގައި އަދާކުރާ ވާޖިބާއި ، ޖަމާޢަތުގެ ފައިދާއަށް ހިލޭސާބަހަށް ކުރެވޭ ކަންކަމުގެ ތަފާތު އޮންނަން ޖެހޭތީއެވެ. އަދި ، މި ދެ މަސައްކަތުގެ މާޙައުލުގައި ، ކުރިން ދެންނެވިގޮތަށް ، ޙާލަތު ތަފާތު ވާތީއެވެ. ޖަމާޢަތަށްކުރާނެ ލާބައާއި ހެޔޮއަސަރުގެ މަންފާ ތަފާތު ވާނެތީއެވެ.
ވަޒީފާގެ ވާޖިބާއި މަސްއޫލިއްޔަތު ފުރިހަމަކުރަމުން ، ހިލޭސާބަހަށްވެސް މަސައްކަތްކުރާ މީހުން އުޅެއެވެ. އެބައިމީހުންގެ ޚިދުމަތަކީ ، އެޚިދުމަތް އަގުކުރުމުގައި ދެގުނަ ކުރެވެންޖެހޭ ޚިދުމަތެކެވެ. ޚިދުމަތުގެ އަގު ވަޒަންކުރަން ތިބޭމީހުންގެ ވިސްނުމަށް އެކަން ނާންނަ ނަމަ ، އެމީހެއްގެ ޚިދުމަތުގެ އަގު އެކަށީގެންވާ ގޮތެއްގައި ވަޒަނެއް ނުކުރެވޭނެއެވެ. އެފަދަ މީހުންނަށް ލިބިގެންވާ ޙައްޤު ފުރިހަމަކޮށެއް ނުދެވޭނެއެވެ. ޚިދުމަތެއްގެ އަގު ވަޒަންކުރެވެން ޖެހޭނީ ، ޚިދުމަތްކުރާމީހުންގެ ބޫޓަށް އަރައިގެން ތިބެއެވެ.
މިސްކިތެއްގައި އިމާމުވެ ނަމާދުކުރައްވާ އަދި ވަޢުޘު ވިދާޅުވެ ދީނީ ނަޞޭޙަތްދެއްވާ ޝެއިޚެކެވެ. ދީނީ ނަޞޭޙަތްދެއްވާއިރު ، ފަރުޟު ނަމާދުކޮށް ނިމިގެން ، ރަވާތިބު ސުންނަތް ކުރުމަށް ބާރު އަޅުއްވައި ، ސުންނަތް ނަމާދުކުރުމަށް ނަޞޭޙަތް ދެއްވައެވެ. ރަވާތިބު ސުންނަތްތަކުގެ ތަފުޞީލާއި ސުންނަތް ނަމާދު ވަކިކޮށް ރޭޑިއޯއާއި ޓީވީން ދީނީ މަޢުލޫމާތު ދެއްވައެވެ. އެހެންނަމަވެސް ، އިމާމުވެ ނަމާދު ކުރެއްވުމަށްފަހު ، އެވިދާޅުވާ ރަވާތިބު ސުންނަތެއް ނުކުރައްވައެވެ. ސަލާމް ދެއްވުމަށްފަހު ، ބާރު ސްޕީޑްގައި ތެދުވެވަޑައިގެން ގެޔަށް ވަޑައިގަންނަވައެވެ. މިފަދަ މީހަކަށް ޚިދުމަތުގެ އިނާމު ދިނުމަށް އަގުވަޒަން ކުރެވޭއިރު ، އޭނާގެ ޢަމަލަށް ބަލަން ޖެހެއެވެ. ބަހާއި ޢަމަލާ ދިމާވޭތޯ ބެލުމަކީ ، ފަނޑިޔާރުންގެ ކަމެކެވެ. މިއީ ، ވަކި މީހެއްގެ ވާހަކައެއްނޫނެވެ. މިސާލެކެވެ.
ހަމައެއާއެކު ، އެތައް ދުވަހެއް ވަންދެން ، ކޮންމެ ފަރުޟު ނަމާދެއްގެ ޖަމާޢަތުގައި ބައިވެރިވެ ، ބަންގިގޮވާ މުދިމާ ޖެހިގެން ފުރަތަމަ ސަފުގައި އަބަދުވެސް ހުންނަ މީހެއްގެ ގޮތުގައި އެކަކު އަބަދުވެސް ހުރެއެވެ. އެހެންމީހަކު އެ މަޤާމަކުން ދުވަހަކުވެސް ނުފެނެއެވެ. އޭނާ އެއަދާކުރަނީ ޚިދުމަތެއްނޫނެވެ. އޭނާ އެއަދާކުރަނީ އަޅުކަމެކެވެ. ދުނިޔެއާއި އާޚިރަތް އެދިގެން ، ﷲ ސުބްޙާނަހޫ ވަތަޢާލާއާއި ކީރިތި ރަސޫލާ ޞައްލަﷲ ޢަލައިހި ވަސައްލަމަ ، މީސްތަކުންނަށް އަންގަވައި ދަސްކޮށް ދެއްވާފައިވާ ދީނީ އަޅުކަމެކެވެ. އެއީ ޚިދުމަތެއްނޫންނަމަވެސް ، ހިތްވަރުދޭންޖެހޭ ކަމެކެވެ. ޤައުމީ ނިސްބަތުންނާއި ދީނީގޮތުންވެސް އެފަދަ މީހުންނަށް ހިތްވަރުދިނުން އައުލާކަން ބޮޑެވެ. ޝަރަފުވެރިކަމާއި ހިތްވަރު ދިނުމަކީ ، ހެޔޮ ޢަމަލެއްގައި މީހަކު ދެމިހުރުމުންވެސް ޙައްޤުވާނެ އިނާމެކެވެ. އެއީ ހަމައެކަނި ، މާއްދީ ފައިދާއަކަށް ނުވަތަ ދަރުމައަށް ކުރާ މަސައްކަތަކަށް އެކަނި ޚާއްޞަވެފައި އޮންނަންޖެހޭނެ އިނާމެއްނޫނެވެ. މިފަދަ އެތައްކަމެއް ، ޝަރަފާއި ހިތްވަރަށް ، އަގުވަޒަންކުރުމަށްޓަކައި ބޭނުން ކުރެވިދާނެއެވެ. މިއީވެސް މިސާލެކެވެ.
ޚިދުމަތުގެ އަގު ވަޒަންކުރަންތިބޭ މީހުންގެ ކުރިމަތީގައި އޮންނަނީ ، އެމީހުންނަށް ފެންނަގޮތަކަށް މޮޑެން އޮންނަ ފުށްގަނޑެއްނޫނެވެ. އެއީ ވަރަށް މަތިވެރި ޒިންމާއެކެވެ. އަމާނާތެކެވެ. އެއީ ، ތަޢައްޞުބުން އެއްކިބާވެ ، ފަރުދީ ޒިންމާ އިސްކޮށް ، ޚިދުމަތްކުރާމީހުންގެ ޙައްޤުތައް ކަށަވަރުކޮށްދޭން މަތިކުރެވިފައިވާ އަމާނާތެކެވެ. އެއީ ، ޚިދުމަތްކުރާ މީހާ ނިސްބަތްވާ ، ރަށަށް ، ދަރިކޮޅަށް އަދި ތަޞައްވުރަށް ނުބަލައި ، ފެންނަން އޮންނަ ހެކިތަކުގެ ޙަޤީޤަތަށް ބަރޯސާވާންޖެހޭ އިންސާފުގެ ދަރުބާރެކެވެ. އެއީ ، ޚިދުމަތްކުރާ މީހާއަށް ޢަދުލުވެރި އިންސާފެއް ހޯދައިދޭން މަތިކުރެވިފައިވާ ޒިންމާއެކެވެ. ޚިދުމަތުގެ އަގު ވަޒަންކުރަންތިބޭ ބަޔެއްގެ ހިތުގައި އޮންނަ ސުއާލުތަކަށް ފުރިހަމަ ޖަވާބެއް ހޯދެން ޖެހޭނެއެވެ. ޖަވާބެއް ނެތް ސުއާލެއް ނޯންނާނެއެވެ. ޚިދުމަތުގެ އަގު ވަޒަންކުރުމުގައި އުފެދޭ ސުއާލަށް ޖަވާބު ނުހޯދައި ތިބެ ، ހިތަށް ފެންނަ ގޮތަކަށް މާރކްސްދީގެން އަގުކުރެވޭ ޚިދުމަތެއްގެ އިންސާފެއް ނޯންނާނެއެވެ.
ޚިދުމަތުގެ އަގުވަޒަންކުރަން ތިބޭ މީހުންނަކީ ، ޢަދުލުވެރި ޙުކުމެއްގެ ނިޔާ އިއްވަން އިސްވެތިބޭ ފަނޑިޔާރުންނެވެ. އެބައިމީހުން އެ އިއްވަނީ ، ވިހިތިރީސް ނުވަތަ ސާޅީހަކަށް ފަންސާހަކަށް އަހަރު ، އިންސާނެއްގެ ކިބައިން އިންސާނިއްޔަތަށް ކޮށްދެވިފައިވާ ޚިދުމްތެއްގެ އަގުހުރި މިންވަރެއް ބަޔާންކުރާ ޙުކުމެކެވެ. ފަނޑިޔާރުންގެ ޙުކުމަކީ ، ސިޔާސީ ނުފޫޒާއި ހިތްހަމަ ނުޖެހުމާ ، ރުޅިއާއި ކިބުރުވެރިކަމާއި ތަޢައްޞުބުން އެއްކިބާވެފައި އޮންނަންޖެހޭ އެއްޗެކެވެ. އަދި ހަމަ އެފަދައިން ، ރުހުމާއި ގާތްކަމާ އަދި ހިންޏާއި ނިންޖާ ، ވަރުބަލިކަމުން ދުރުވެ އޮންނަންޖެހޭ އެއްޗެކެވެ. އެންމެ ދެރަވެގެން ބަނޑުހައިކަމުންވެސް އެ ޙުކުމަކަށް އަސަރު ނުފޯރާފަދަ ޞައްޙަ އަދި ޢަދުލުވެރި ނިޔާއަކަށް ވާންޖެހޭ އެއްޗެކެވެ. ޚިދުމަތުގެ އަގު ވަޒަންކުރުމުގައި ، ސަބަބު ބަޔާންކޮށް ހާމަ ނުކުރެވޭނަމަ ، އެއީ ޖަވާބުދާރީ ވެވޭ ، ޢަދުލުވެރި ނިޔާއަކަށްވާނެ އެއްވެސްގޮތެއް ނޯންނާނެއެވެ. އަދި ، އިންސާނެއްގެ ޚިދުމަތުގެ އަގު ވަޒަންކުރުމުގައި ، މީޒާން އެއްފަރާތަށް ބަރުވެ ، ޚިދުމަތްކުރިމީހާ ލަދުގަންނަންޖެހޭފަދަ ޙާލަތަކަށް އެކަން ގެންގޮސްގެން ނުވާނެއެވެ.
ޚިދުމަތުގެ އަގު ވަޒަންކުރުމަކީ ، ޤައުމެއްގެ ނިސްބަތުގައި ، އެޤައުމެއްގެ ތަރައްޤީއާއި މުސްތަޤްބަލް ވަރަށް ސާފުކޮށް ދައްކައިދޭނެ ކަންނާޑިއެކެވެ. އިންސާނެއްގެ ޤައުމީ ޚިދުމަތުގެ އަގުވަޒަންކުރުމަށް ހުރަސްއެޅިދާނެ ކުޑަވެސް އުޞޫލެއް ހަމައެއް އޮވެގެން ނުވާނެއެވެ. އޭގެ ބަދަލުގައި ، ޚިދުމަތުގެ އަގު ވަޒަންކުރެވޭ ، ހަމައާއި އުޞޫލުތައް އޮންނަންޖެހޭނީ ، ފަސޭހަކޮށް ، އެކަމަށް ވާގިލިބިދޭ ގޮތަކަށެވެ. ވަކި ހިސާބަކުން އުޞޫލުތަކާއި ހަމަތައް ބަދަލުކޮށް ، ހަރުކަށިކޮށް ، އެކަމަށް ހުރަސްއެޅޭކަންކަން ތަޢާރުފްވެގެން ދިއުމަކީ ، ކޮށްގެންވާނެ ކަމެއްނޫނެވެ. އަދި އަމްދުން ، އެ އުޞޫލުތަކާއި ހަމަތައް ނުދެމެހެއްޓޭ ޙާލުގައި ، އަދި ، ހަމަހަމަކަން ގެއްލި ، އެފަދަ ހަރުކަށި އުޞޫލުތައް ވަކިބަޔަކަށް އަމާޒުވެގެންދާނަމަ ، އެއީ އިންސާފެއްނޫނެވެ.
ޚިދުމަތުގެ އަގު ވަޒަންކުރެވޭ ދަރަޖަތަކެއް ހުންނަނަމަ ، ޚިދުމަތް ވަޒަންކުރެވޭ މީހާގެ ޢުމުރާއި ، ދެވަނަ ދަރަޖައަކަށް ވާޞިލްވުމަށް އޭނާގެ ޢުމުރު ތަންދޭނެ މިންވަރާއި ، ތިރީސް ސާޅީސް އަހަރުވަންދެން އޭނާކޮށްފައިވާ ޚިދުމަތަށް ރިޢާޔަތް ކުރަން ޖެހެއެވެ. އެހެންނޫންނަމަ ، އެމީހެއްގެ ޚިދުމަތުގެ އަގު ވަޒަނެއް ނުކުރެވެއެވެ. އޭނާގެ ޚިދުމަތަށް ހިތްވަރެއް ދިނުމުގެ ބަދަލުގައި ، އެ ޚިދުމަތް ދެމެހެއްޓުމަށް ، އެއެޅެނީ ހުރަހަކަށް ވާނެއެވެ. ޤައުމީ ކުރިއެރުމާއި ތަރައްޤީ އަދި އިންސާނީ ޚިދުމަތް އެއީ ގުޅި ލާމެހިފައިވާ ދެ އަސާސަކަށްވާއިރު ، އެކަމަށް އެޅޭ ހުރަހެއް އޮވެގެން ނުވާނެއެވެ. ދެކޮޅުވެރި ވިސްނުމެއްގެ ނުފޫޒެއްވެސް އޭގެތެރެޔަށް ވަދެގެން ނުވާނެއެވެ. އޭގެ ބަދަލުގައި އެކަމަށް ހުޅުވިގެންދާންހުރި ހުރިހާ ދޮރެއް އޮންނަންޖެހޭނީ ތަންމިނަށް ހުޅުވިފައެވެ.
އިޖްތިމާޢީ ޢަދާލަތު ޤާއިމްކުރުމުގައި ، ޝަރުޢީ ނިޒާމުގައި ، ޢަދުލުވެރި ޙުކުމަކާހަމަޔަށް ވާޞިލުވެވޭނެ މަރުޙަލާތަކެއް އޮވެއެވެ. ޚިދުމަތުގެ އަގު ވަޒަންކުރުމުގައިވެސް ، ޚިދުމަތްކުރާމީހުންގެ ޙައްޤު ކަށަވަރުކޮށްދިނުމަށްޓަކައި ، އެކަމަށް އެދޭ ބަޔަކަށް ، އިތުރު މަރުޙަލާއެއް އޮންނަން އެބަ ޖެހެއެވެ.
ޚިދުމަތުގެ އަގު ވަޒަންކުރެވޭ މީހުންގެ ޙައްޤު ކަށަވަރު ކޮށްދިނުމަކަށްޓަކައި ، " އެޕީލް " ކުރެވޭ އެންމެ މަރުޙަލާއެއްނަމަވެސް އޮތުމަކީ މުހިންމު ކަމެކެވެ. ތިރީހަކަށް ސާޅީހަކަށް އަހަރުގެ އިންސާނީ ޚިދުމަތެއްގެ އަގު ، ޢަދުލުވެރި ކުރުމަށްޓަކައެވެ. އެ ޙައްޤު ކަށަވަރު ކުރުމަށްޓަކައި އިތުރު މަރުޙަލާއެއްގެ ފުރުޞަތު ތަނަވަސް ކޮށްދިނުމަށްޓަކައެވެ. ޚިދުމަތުގެ އަގު ވަޒަންކުރާ ބަޔަކު ، އެކުރަނީ ކުޑަކަމެއްނޫނެވެ. އެއީ ވަރަށްބޮޑު އަދި ބުރަ ޒިންމާއެކެވެ. އެބަޔެއްގެ މަސައްކަތް ފުރިހަމަވެ ، އިންސާފުގެ މަގުން ގޮތެއް ނިންމުމަށްޓަކައި އަދި އިންސާފުކުރުމުގައި އެބަޔެއްގެ އިހުމާލެއްނެތްކަން ކަށަވަރު ކުރުމަށްޓަކައި ، ޚިދުމަތުގެ އަގު ވަޒަންކުރެވޭ މީހުންގެ " އެޕީލް " މަރުޙަލާއެއް އޮތުމުގެ މުހިންމުކަން ބޮޑުވަނީ ، އެންމެންގެ ޙައްޤުތައް ރައްކައުތެރިކޮށް ދިނުމަށްޓަކައެވެ.
ކޮންމެ ކަމެއްގައިވެސް ، ތަރައްޤީވެގޮސް ކުރިއެރުމާއި ރަނގަޅަކަށް ގެންނަންޖެހޭ އިޞްލާޙީ ބަދަލުތައް ހުންނާނެއެވެ. ކުރިޔަށް އެޅޭނެ ފިޔަވަޅުތައް ހުންނާނެއެވެ. އެއީ ކަމެއް ކުރިއަރައި ދިއުމުގެ އެންމެ މުހިންމު އަސާސެވެ. އެއީ ކުރިމަގު ބެދޭ އަދި ، އެކަމެއްގެ ދޮރު ބަންދުވެ ހުރަހެއްއެޅޭ ކަންކަމަށް ވެގެން ނުވާނެއެވެ. އެއީ ފަހަތަށް އެޅޭ ފިޔަވަޅަކަށް ވެގެން ނުވާނެއެވެ. އިންސާނާއަށް ބުއްދީގެ ނިޢުމަތް މިންވަރު ކުރައްވާފައިވަނީ ، އިންސާނިއްޔަތަށް ޓަކައެވެ. ﷲ ގެ ކަލާމްފުޅާއި ރަސޫލު ޞައްލަﷲ ޢަލައިހި ވަސައްލަމަގެ ސުންނަތަށް ތަބާވެ ، އިންސާނާ އޭނާގެ ދުނިޔެ އާބާދުކޮށް އާޚިރަތް ބާއްޖަވެރި ކުރުމަށްޓަކައެވެ. މީސްތަކުންގެ މެދުގައި ޢަދްލު އިންޞާފު ޤާއިމްކުރުމަށްޓަކައެވެ. އެ އިންސާނާ ، އެމަގުން ދުނިޔޭގައި އުޅެ ގައިބާރު ދެރަވާ ދުވަހު ، ދުނިޔެއަށް އެއިންސާނާ ކޮށްދީފައިވާ ޚިދުމަތުގެ އަގު ، ޢަދްލުވެރިކަމާއެކު ، ހެޔޮގޮތުގައި ވަޒަންކުރެވިގެން ދިއުމަކީ އިންސާނީ ޙައްޤެކެވެ.
