ކޮންމެ އިންސާނަކީވެސް އަނެކާއަށް ބަރޯސާވާންޖެހޭގޮތަށް ، އުފައްދަވާފައިވާ މަޚުލޫޤުންނެވެ. ކޮންމެ ކަމެއްވެސް ދުނިޔޭގައި ލައްވާފައިވަނީ އެއްކަމެއް އަނެއްކަމަކަށް ބަރޯސާ ވާގޮތަށެވެ. އިރުހަނދާއި ތަރިތައްވެސް މެއެވެ. އިންސާނާ ދިރިއުޅެމުން މިގެންދާ ދުނިޔެއަކީވެސް ، ﷲ މި ކާއިނާތުގައި ލައްވަވައި އުފައްދަވާފައިވާ އެތައް މުޢުޖިޒާތަކަށް ބަރޯސާ ވާގޮތަށް އުފައްދަވާފައިވާ އެއްޗެކެވެ. އެހެންކަމުން ، ދުނިޔޭގައި ދިރިއުޅޭ މިނިކަމެތި އިންސާނާ ، އޭނާފަދަ އަނެއް އިންސާނާއަށް ، އެހެން މީހަކަށް އަދި އެހެން އެއްޗަކަށް ބަރޯސާވާން ނުޖެހޭ ދުވަހެއް ނާންނާނެއެވެ. ކޮންމެވެސް އިރަކުން ، ކޮންމެވެސް ދުވަހަކުން އެއިންސާނާއަށް އެކަން ކުރިމަތިވާނެއެވެ.
ބަރޯސާއަކީ ، ވަރަށް ފުޅާ މާނައެއްގައި ، ދިވެހިބަހުގައި ބޭނުންކުރެވޭ ބަހެކެވެ. ބަރޯސާގެ ލަފުޒީ މާނަޔަކީ އިތުބާރެވެ. އިތުބާރު ކުރުމެވެ. ޔަޤީންކަން އޮތުމެވެ. ކަށަވަރު ވުމެވެ. މިސާލަކަށް ، ތިމާ ބޭނުންވާކަމެއް އަނެކާގެ ފަރާތުން ފުދޭނެކަމުގެ ޔަޤީންކަން އޮތުމެވެ. ތިމާއަށް ނުކުރެވޭނެކަމެއްގައި އަނެކާގެ އެހީތެރިކަން ލިބިގެންދާނެކަމުގެ ޔަޤީންކަން ލިބިފައި އޮތުމެވެ. ތިމާ ޙާލުގައި ޖެހޭ ދުވަހު ، އަނެކާގެ ފަރާތުން އެހީލިބޭނެކަން ޔަޤީންވެފައި އޮތުމެވެ. އެ އެހީތެރިކަމަކީ ، ބަރޯސާ ވުމެވެ.
ދުނިޔެ ބަރޯސާވެފައި އޮންނަނީ އިރުންފޮނުވާ އައްޔާއި ހޫނުގެ މައްޗަށެވެ. އިރުގެ އައްޔާއި ހޫނު ، ދުނިޔެއަށް ނުފޮނުވާނަމަ ، ދުނިޔޭގައި ދިރިއެއް ނޫޅެވޭނެއެވެ. ގަސްގަހާގެހި ބަރޯސާވަނީ އިރުން ފޮނުވާ އަލީގެ މައްޗަށެވެ. އިރުގެ އަލި ނުލިބޭނަމަ ގަސްގަހެއް ނުހެދޭނެއެވެ. އިންސާނުންނާއި ޙައިވާނުން ބަރޯސާވަނީ ގަސްގަހާގެހިން އުފައްދާ ކާބޯތަކެއްޗަށާއި އޮކްސިޖަނަށެވެ. އިރުގެ ހޫނު ބިމަށް ނުލިބޭނަމަ ، ދުނިޔެ ގަނޑުވާނެއެވެ. އިރަކީ ހައިޑްރޯޖަންއާއި ހީލިއަމުން އުފެދިފައި އޮންނަ ބިޔަ ބޯޅައެކެވެ. އިރު ، އޭގެ ޒާތުގައި އޮތުމަށް ބަރޯސާވަނީ ހައިޑްރޯޖަން އާއި ހީލިއަމް އަށެވެ. އިރުގައި ހުންނަ ނިއުކުލިއަރ ހަކަތައަށް ބޭނުންވާ ހައިޑްރޯޖަން 5 ބިލިއަން އަހަރުން ހުސްވާނެކަމަށް ބެލެވެއެވެ. ހައިޑްރޯޖަން ހުސްވުމުން ، އެހިސާބުން އިރުން އަލިކަމެއް ނުއުފައްދާނެއެވެ. އިރަކީ ސިއްރު ކުރެވިގެންވާ ، ދަގަތްފާނުގެ ދަމާބާރެއް އެކުލެވިގެންވާ ބޮޑު ތަރިއެކެވެ. މި ދަގަތްފާނަކީ އިރުގެ އެންމެ އަޑީގައި އުފެދިފައި ހުންނަ އެއްޗެކެވެ. މި ދަގަތްފާނުގެ އަސަރު އިރުގެ ބޭރު ފަށަލައަށް މަޑުމަޑުން ފޯރައެވެ. ދަގަތްފާނުގެ އެ ޖަމާއަކީ ތެލެސްކޯޕުން ދައްކާނެ އެއްޗެއްނޫނެވެ.
ހަނދަކީ އިރާއި ބިމަށް ބަރޯސާވާ ބޮޑު ތަރިއެކެވެ. އިރާއި ބިން ، ކާއިނާތުގައި ނުލައްވާނަމަ ހަނދެއް ނުފެންނާނެއެވެ. ހަނދަކީ އޭގެ ޒާތުގައި އަލިކަމެއް ހުންނަ ތަރިއެއްނޫނެވެ. ހަނދު ފެންނަނީ އިރުން ފޮނުވާ އަލިއެޅިގެންނެވެ. ހަނދަކީ ޖައްވުގައި ދައުރުވާ ސެޓެލައިޓެއްފަދަ ތަރިއެކެވެ. ކާއިނާތުގައި ދުނިޔެ މިއޮންނަނީ ، ހަނދުން ފޮނުވާ ގްރެވިޓީއަށް ބަރޯސާ ވެގެންނެވެ. އެފަދަގޮތަކަށް ދުނިޔެއަށް ، ހަނދުގެ ގްރެވިޓީ ނުފޮނުވާނަމަ ، މޫސުމެއް ނޯންނާނެއެވެ. ފިނިއޭގެ ޙައްދުން ނެއްޓި އައިސްއޭޖަކަށްވެސް ހިނގައިދާނެއެވެ. ހަނދު ، ސަލާމަތުން އޮންނާނެކަމަށް ބެލެވެނީ 10 ބިލިއަން އަހަރުއެވެ. އިރު އޭގެ ޢުމުރު ހަމަކޮށް އަލިކަން ފަނޑުވާން ފެށުމުން ، ހަނދާއި ދުނިޔެ ދެމި އޮންނާނެކަމަކަށް ނުބެލެވެއެވެ. އެހެނީ ހަނދާއި ދުނިޔެއަކީ ، އިރަށް ބަރޯސާވެ ދެމިއޮންނަ ތަރިއެވެ. ބިމުން ނުވަތަ ދުނިޔެއިން ފޮނުވާ ގްރެވިޓީ ހަނދަށް ނުލިބޭނަމަ ، ކާއިނާތުގައި ހަނދު އޮންނާނީ އޮޔާދާ އެއްޗެއްގެ ގޮތުގައެވެ. ހަނދަކީ ، ދުނިޔެއާއެއްކޮށް ތަޅުއެޅުވިފައިވާ ތަރިއެކެވެ. ހަނދާއި ދުނިޔެ ދަތުރުކުރަނީ އެއް މިސްރާބަކަށް އެކުއެކީގައެވެ. ހަނދުގެ އެއްފަރާތް ދުނިޔެއަށް އަބަދުވެސް ފެންނަ ސަބަބަކީ އެއީއެވެ.
ވަޔާއި އޮޔާ އަދި އެއްގަމާއި ކަނޑުގެ އެންމެހާ ޙަރަކާތްތައް އޮންނަނީ ، ﷲ ސުބްޙާނަހޫ ވަތަޢާލާގެ ޤުދްރަތްތެރިކަމުގެ މުޢުޖިޒާތެއްގެ ގޮތުގައި ލައްވާފައެވެ. ވިސްނާ ފިކުރުކުރާ ބަޔަކަށް ފިލާވަޅު ލިބޭ ގޮތެއްގައެވެ. ﷲ ގެ ނިޢުމަތާއި ރަޙުމަތާ އަދި ރޯދި ބަރަކާތުގެ ގޮތުގައެވެ. އިންސާނުންގެ ޚިދުމަތުގައެވެ. ދުނިޔެއަކީ ، އާޚިރަތަށް ބަރޯސާވެ ، ހެޔޮ ޢަމަލުން ތިލަފަތް ބަރުކުރުމަށް ދައްކަވާފައިވާ މަގެކެވެ. އިންސާނާގެ ޢަމަލުގެ ތިލަފަތް ހެޔޮ ޢަމަލުން ބަރުވެގެންދިއުން ބަރޯސާ ވެގެންވަނީ ، ﷲ އަށް ތަޤްވާވެރިވެ ، އޭނާ ދުނިޔޭގައިހުރެ ކުރާ ހެޔޮ ޢަމަލުންނެވެ.
ދަރިންނަކީ ، އަމިއްލަޔަށް ނުއުޅެވޭ ޙާލަތްތަކުގައި ، މައިންބަފައިންގެ މައްޗަށް ބަރޯސާވާންޖެހޭ ބަޔެކެވެ. ހަމައެފަދައިން ، މައިންބަފައިންނަކީ ، މުސްކުޅި ޢުމުރުގައި ދަރިންގެ މައްޗަށް ބަރޯސާވާން ޖެހޭ ބަޔެކެވެ.
މަތިންދުއްވާ ބޯޓު ، އުދުއްސައިގަނެ މައްޗަށް އަރާ ދަތުރު ކުރަމުން ދުރަށް އެދަނީ އެތައް އެއްޗަކަށް ބަރޯސާވެގެންނެވެ. ބޯޓުގެ އިންޖީނު ބަރޯސާވަނީ ، އިންޖިނޭރުންނަށެވެ. އިންޖީނު ބަރޯސާވަނީ އެއަށް އަޅާ ތެލަށެވެ. ބޯޓުގެ ބުރަފަތި ބަރޯސާވަނީ އިންޖީނުގެ ހިނގުމަށެވެ. ދަތުރުގެ މިސްރާބާއި ދުއްވުން ބަރޯސާވަނީ ޕައިލެޓަށެވެ. ބޯޓުން ދަތުރުކުރާ ފަސިންޖަރުން ބަރޯސާވެގެން އެތިބެނީ ޕައިލެޓަށެވެ. ޕައިލެޓް ބަރޯސާވަނީ އޭގެ ހުންގާނަށެވެ.
ޤައުމެއްގެ ރައްޔިތުން ތިބެނީ ، ވަޢުދުނާމާ ހިފައިގެން މީހުން އައިސް ، އެމީހުންނަށް ކޮށްދޭނެކަންކަން ކިޔައިދިނީމާ އެންމެ ރަނގަޅަށް ކަންކަން ކޮށްދޭން ވަޢުދުވާ އަށް ބަރޯސާ ވެގެންނެވެ. ޤައުމެއްގެ ވެރިޔަކު ، އިންތިޚާބަކުން ހޮވެނީ ރައްޔިތުންގެ ބަރޯސާ އޮވެގެންނެވެ. ވެރިމީހާ ބަރޯސާ ވާން ޖެހެނީ ، ރައްޔިތުންނަށް ވީ ވަޢުދުތައް ފުއްދަން ކުރާ މަސައްކަތަށް އެހީތެރިވުމަށް އޭނާ ކަނޑައަޅާ އެތައްބަޔެއްގެ މައްޗަށެވެ. ވެރިމީހާ ކަނޑައަޅާ ، އިޚްތިޔާރުކުރާމީހުން ބަރޯސާވާން ޖެހެނީ އެމީހުންނަށް އެހީތެރިވުމަށް ތިބޭ މުއައްޒަފުންގެ މައްޗަށެވެ. އެ މުއައްޒަފުން ބަރޯސާވަނީ ، ވަޒީފާގައި ކުރަންޖެހޭ މަސައްކަތަށާއި ލިބޭ މުސާރައަށެވެ. ވަޒީފާ އަދާކުރާ މީހުންގެ ޢާއިލާތައް ބަރޯސާވަނީ ވަޒީފާ އަދާކުރާ މީހާއަށް ލިބޭ މުސާރައިގެ މައްޗަށެވެ.
އެހެންކަމުން ، ދުނިޔޭގެ ހަމަ ކޮންމެ ނަފުސެއްވެސް އަދި ކޮންމެ ކަމެއްވެސް ، ބަރޯސާވެގެންވަނީ އެއްކަމެއް އަނެއްކަމެއްގެ މައްޗަށެވެ. އެކަކު އަނެކެއްގެ މައްޗަށެވެ. ކަންމިހެން އޮތްއިރު ، އެއްވެސް މީހަކަށް އަދި ކަމަކަށް ބަރޯސާނުވެ ، މަތިހަށިނަގާފައި ކަންކަމާ ދިމާކުރުމަކީ އިންސާނީ ޠަބީޢަތާއި ޤުދްރަތީ ޤާނޫނާ ޚިލާފު ކަމެކެވެ. އެފަދަމީހުންނަށް ލިބެމުންދާނީ ހުސް ގެއްލުމެވެ.
