ބްލޫ ރިބަން: ދޮންބެއްޔާގެ ލަންކާ ދަތުރު

ދާދި މިދާކަށްދުވަހު ، ދޮންބެއްޔާ ، ލަންކާއަށް ދަތުރެއް ކުރިއެވެ. އަންހެނުންނާއި ކުދިންވެސް ގޮވައިގެންނެވެ. ޑޮލަރަކަށް ލަންކާއިން ލިބޭ ރުފިޔާ ގިނަވީމަ ވަރަށް ހަމަޖެހިލައިގެން ، ހަފުތާއެއްހާ ދުވަހު އުޅެލެވިދާނެކަމަށް ބަލާފައެވެ. ރަސްމީ ރޭޓުން ޑޮލަރަކަށް 54/312 ރުޕީސް ލިބެއެވެ. ޑޮލަރު މާރުކުރާ ތަންތަނުން ޑޮލަރަކަށް 315 ރުޕީސް ލިބޭކަމަށް ވެއެވެ. ގާތްގަނޑަކަށް ދެރުފިޔާބައިގެ ތަފާތެކެވެ.

ޓިކެޓް ގަންނަން ބެލިއިރު ، އެންމެ އަގުހެޔޮކޮށް ލިބެނީ ، އެމިރޭޓްސް އިންނެވެ. ދެން އެއަރލަންކާއިންނެވެ. ގަލްފް އެއަރ އާއި ޓަރކިސް އެއަރލައިންވެސް ، ލަންކާއަށް ދަތުރު ކުރެއެވެ.

އެމިރޭޓްސް އިން ޓިކެޓް ނަގައިގެން ، ކޮލޮމްބޯއަށް ހިނގައްޖެއެވެ. އެއަރޕޯޓު ފެނުނީ ވަރަށް ހުސްކޮށެވެ. މީގެ ދެތިން ހަތަރު އަހަރެއްކުރިން ، ދޮންބެއްޔާ ، ލަންކާއަށް ކުރި ދަތުރެއްގައި ލަންކާ އެއަރޕޯޓު އޮތީ ތޮށްޖެހިފައެވެ.

މި ދަތުރުގައި ދޮންބެއްޔާ ދިޔައީ ، އަންހެނުންނާއި އަންހެންދަރިފުޅުގެ ފަޔާއި އަތާއި ކަރުގައި އަޅަން ގެންގުޅުނު ރަން ފަށަށް ދަންދެން ، ބަހައްޓާފައެވެ. ކަސްޓަމުން މައްސަލައެއް ޖެހިދާނެތީއެވެ. ރައްޓެއްސަކަށް ގެންގޮސްދިން މަސްދަޅު ކޭހަކާ ބެހޭގޮތުން ކަސްޓަމުން ކޮންމެވެސް ވަރަކަށް ސުއާލު ކުރިއެވެ. އެހެންނަމަވެސް މާބޮޑު މައްސަލަޔަކަށްނުވެ ، ކަސްޓަމުން ނުކުމެވިއްޖެއެވެ.

ބޭރަށް ނުކުމެ ފުރަތަމަވެސް ބެލީ ލާރި މާރުކޮށްލާށެވެ. ރަށުތެރޭގެ ޙާލަތު ރަނގަޅަށް ނޭނގޭތީއެވެ. އެއަރޕޯޓުން މާރުކޮށްދިނީ ބޭންކް ރޭޓަށްވުރެ ކުޑަކޮށް ދަށްކޮށެވެ. އެކަމަކުވެސް ރަށުތެރެއިން ، ބޭންކަކަށްގޮސް ލާރި މާރުކުރުން އެއީ އުނދަގޫ ކަމަކަށް ވެދާނެތީ ، ގެންދިޔަ ލާރިކޮޅުން 500 ވަރަކަށް ޑޮލަރު އަތުގައި ބާއްވާފައި އެހެން ހުރިހާ ޑޮލަރެއް މާރުކޮށްލިއެވެ. ބުކްކުރި ހޮޓަލަށްވެސް ލާރި ދެއްކޭ ވަރަށެވެ.

ދޮންބެއްޔާ ދެން ދިޔައީ ފޯނަށް ލައްވަން ސިމެއް ނަގާށެވެ. 1500 ރުޕީސް އަށް ސިމެއް ލިބުނެވެ.

ހޮޓަލަށް ދާން ޓެކްސީއެއް ހޯދަނިކޮށް އައިމީހަކު ، ދޮންބެއްޔާ ބުކްކުރި ހޮޓަލަށް ، އެއްހާސް ރުޕީސްއަށް ގެންގޮސްދީފާނެކަމަށް ބުންޏެވެ. ޓެކްސީ އިންތިޒާމް ކޮށްދޭ ބޫތުތައްވެސް ހުއްޓެވެ. އެތަންތަނުން ކީ އަގު އަދި މާބޮޑެވެ. އަގުހެޔޮކޮށް ގެންގޮސްދޭން ބުނިމީހާއާ އެކު ހޮޓަލަށް ދާން ނައްޓައިލިއެވެ.

ޓެކްސީގައި އެއަރކޯން ހުއްޓެވެ. އެކަމަކު އެއަރކޯން ޖައްސާކަށް ޑްރައިވަރެއް ނޫޅުނެވެ. ކާރުގެ ހުރިހާ ކުޑަދޮރުތަކެއް ހުރީ ހުޅުވާ އަޅާފައެވެ. އެކަމަކުވެސް ދާހިއްލާ ގޮތްވާން ފެށީމަ ، އެއަރކޯން ޖައްސައިދޭން ކުދިވެރިން އެދުނެވެ. އެކަން ވާކަށް ނެތެވެ. ޑްރައިވަރު ބުނިގޮތުގައި ، އެއްހާސް ރުޕީސްއަށް އޭނާ އަގުކީ ، އެއަރކޯން ނުޖައްސާ ގޮތަށެވެ. އެއަރކޯން ޖައްސަންޏާ 500 ރުޕީސް އިތުރަށް ދޭން ޖެހޭނެއެވެ. އިތުރަށް ލާރިދޭން ޖެހުނަސް އެއަރކޯން ޖައްސައިދޭން ދޮންބެއްޔާ އެދުނެވެ.

ތަންކޮޅަކަށް ގޮސް ، ދާންވީ އާދައިގެ މަގުންތޯ ނޫނީ  ހައިވޭއިންތޯ ޑްރައިވަރު އަހައިފިއެވެ. އާދައިގެ މަގުން ދަންޏާ ހޮޓަލަށް ދާން ދޮޅުގަޑިއިރު ނަގާނެކަމަށް ބުންޏެވެ. އެކަމަކު ހައިވޭއިން ދަންޏާ 45 މިނިޓުން ދެވޭނެކަމަށް ބުންޏެވެ. ލަގެޖްތަކާއެކު އަންހެނުންނާއި ދެކުދިންނާ އަދި ދޮންބެއްޔާ ޓެކްސީއަށް އެރީމަ ތިބެންޖެހުނީ ވަރަށް ގުޅަކެވިގެން ، އުނދަގޫ ގޮތަކަށެވެ. މާގިނައިރު އޭގެ ތެރޭގައި ނުތިބެންވެގެން ހައިވޭއިން ދާށޭ ، ދޮންބެއްޔާ ބުންޏެވެ. ހައިވޭއިން ދަންޏާ ތިންސަތޭކަ ރުޕީސް އިތުރަށް ދައްކަން ޖެހެއެވެ. ދޮންބެއްޔާ އެފައިސާވެސް ދީފިއެވެ. އެކަމަކު އޭނާއިނީ ، އެއަށް އެރުނުމޮޔަ ހިތަށް އަރާފައެވެ.

ހައިވޭއިންގޮސް ކޮލޮމްބޯގެ މަގުތަކަށް ނުކުމެއްޖެއެވެ. މަގުތައް ވަރަށް ސާފެވެ. އެކަމަކު ، ގިނަ ފިހާރަތައް ހުރީ ބަންދު ކޮށްފައެވެ. މަގުމަތީ ހިނގާބިނގާވެ އުޅޭމީހުންވެސް އެހެންޏާ އުޅޭވަރަށްވުރެ މަދެވެ.

ހޮޓަލަށްގޮސް ، ޓެކްސީއަށް ލާރިދައްކާފައި ހޮޓަލުގެ ރިސެޕްޝަނަށް ގޮސް ޗެކިންގ ކުރުމުގެ މަސައްކަތް ފެށިއެވެ. ރިސެޕްޝަނުން ބުނިގޮތުގައި ހޮޓަލަށް ލާރި ދައްކަން ޖެހޭނީ ޑޮލަރުންނެވެ. ހޮޓަލަކަށް ލަންކާ ރުޕީސްއެއް ބަލައެއް ނުގަންނާނެއެވެ. ދޮންބެއްޔާ އެއައީ ހޮޓަލަށް ދައްކާވަރަށް ، އެއަރޕޯޓުން ލާރިވެސް މާރުކޮށްގެންނެވެ. ތިންކޮޓަރިއަށް ކޮޓަރިޔަކަށް 60 ޑޮލަރުމަގުން ، ހަތްދުވަހަށް 1260 ޑޮލަރު ހޮޓަލަށް ދައްކަން ޖެހެއެވެ. ދޮންބެއްޔާ އަތުގައި އޮތީ 500 ޑޮލަރެވެ. ދޮންބެއްޔާ އެތައް ވާހަކައެއް ދެއްކީމަވެސް ، ރުޕީސްއިން ކޮޓަރިކުލި ބަލައެއް ނުގަތެވެ. އެންމެފަހުން ދޮންބެއްޔާއަށް ޖެހުނީ އެމްސީއަށްގޮސް ، އަތުގައިހުރި ލަންކާ ރުޕީސް ކޮޅުން 760 ޑޮލަރު ގަންނާށެވެ. ޑޮލަރު ގަންނަން ލިބުނީވެސް ، މާރުކުރި ވަރަށްވުރެ މާ ބޮޑު އަގެއްގައެވެ. ޑޮލަރެއް ވިއްކީ ހަތަރުސަތޭކަ ރުޕީސް އަށެވެ. ދޮންބެއްޔާއަށް އެއަރޕޯޓުން ލިބުނީ ޑޮލަރަކަށް 312 ރުޕީސް އެވެ. ޑޮލަރަކުން 88 ރުޕީސް ގެއްލުން ވިއެވެ. އެވެސް އެތާހުރި ރަންވިއްކާ ފިހާރައެއްގައި އިން މީހަކަށް އެތައް ވަރަކަށް އާދޭސްކޮށްގެންނެވެ.

އެމްސީގެވެސް ، ދެފިހާރައިން އެއްފިހާރަ ހުރީ ބަންދު ކޮށްފައެވެ. ތަކެތީގެ އަގުވެސް ހުރީ ޑޮލަރުގެ އަގު މައްޗަށްދިޔަގޮތަށް އުފުލިފައެވެ. ބާޓާ ފިހާރަޔަކަށް ވަދެލިއިރުވެސް ، ހުރީ ބާ ސްޓޮކެވެ. އެހާ އަގުވެސް ބޮޑެވެ.

ކާ އެއްޗިއްސަށް ޚަރަދުކޮށްފައި ދެން އެހެން އެއްވެސް ކަމަކަށް ޚަރަދެއް ނުކުރަން ދޮންބެއްޔާ ނިންމިއެވެ. ކުދިންނާއި އަންހެނުންނަށްވެސް އެކަން އެންގިއެވެ. އެހެންނަމަވެސް ކުދިން ވަރަށް ކިޔައިގެން ، އެކުދިންނަށް ހެދުން ގަންނަން ޖައްސައިލިއެވެ. ހެދުމުގެ އަގު އެހާ ގޯހެއްނޫނެވެ. އެއީ ތައްޔާރީ ކާރުޚާނާތަކުން ޔޫރަޕަށް ފޮނުވާ ޝިޕްމަންޓްތަކުން ރިޖެކްޓް ކުރާ ހެދުމުގެ ޝިޕްމަންޓް ކަމަށްވާތީ ، އެތަކެތި ވިއްކަން މަޖުބޫރުވެފައި އޮންނަ އެއްޗެކެވެ. އަގުމަތިކޮށްގެން ވަކިމޮޅެއްވާން އޮންނަ އެއްޗެއް ނޫނެވެ.

ހަތްދުވަސްވަންދެން ، ހޮޓަލުގައި ކޮޓަރިތެރޭ ތިބެގެން ކުރެވުނު މަޖަލެއްކޮށްފައި ، ދޮންބެއްޔާގެ ޢާއިލާ ފުރަން ތައްޔާރުވިއެވެ. ޗެކްއައުޓްވާން ރިސެޕްޝަނަށް ދިޔައިމަ ، އެމީހުންނަށް އެއްދުވަހަށް އިތުރަށް ލާރި ނެގިފައިހުރިކަމަށް ބުންޏެވެ. އަދި އަނބުރާ އެފައިސާ ދިނެވެ. އެކަމަކު ފައިސާ ދިނީ ލަންކާ ރުޕީސް އިންނެވެ. ދޮންބެއްޔާ ދެއްކީ ޑޮލަރެވެ. އެކަމަކު ހަމަ ހިލާ ޑޮލަރެއް ނުދިނެވެ. އަނެއްކާވެސް އަތުގައި މާރުކޮށްފައިހުރި ލަންކާ ފައިސާއަށް އިތުރު ފައިސާ ވަނީއެވެ.

ދެންއޮތީ އެއަރޕޯޓަށް ދިއުމުގެ ކަންތަކެވެ. ރިސެޕްޝަނުން އެކަން ކޮށްދޭނެކަމަށް ބުންޏެވެ. ބޭރުން ޓެކްސީއެއް ގެނެއްސިއްޔާ ދިމާވާނެ މައްސަލަތަކުން ދޮންބެއްޔާ ބިރުގަންނުވައިލިއެވެ. އެކަމަކު ހޮޓަލުން އެއަރޕޯޓަށް ދާން ޓެކްސީއަށް ނަގަނީ ތިންހާސް ރުޕީސް އެވެ. ބޭރުންނަގާ ޓެކްސީއަކަށް ދައްކަން ޖެހެނީ ދޮޅުހާސް ރުޕީސްއެވެ. އަންހެން ދަތުރެއްވީމަ މާ ކަންތައްގަނޑު ބޮޑުނުކުރަން ވެގެން ، ދޮންބެއްޔާމެން އެއަރޕޯޓަށް ދިޔައީ ހޮޓަލުން ހަމަޖެއްސި ޓެކްސީގައި ބޮޑުއަގު ދީގެންނެވެ.

ދޮންބެއްޔާގެ އަތުގައި ލައްކައެއްހާ ލަންކާ ރުޕީސް ހުއްޓެވެ. އެއީ ލަންކާއަށް ވަތްއިރު އެއަރޕޯޓުން މާރުކުރި ޑޮލަރަށް ލިބުނު ފައިސާއިން ، ދަތުރަށް ޚަރަދުކޮށްފައި ބާކީ ހުރި ފައިސާއެވެ. އެމައްސަލަ ޖެހޭނެކަމަކަށް ދޮންބެއްޔާ ހިއެއް ނުކުރެއެވެ. އެހެންނަމަވެސް ކަސްޓަމުން އެމައްސަލަ ނެގިއެވެ. އެހާ ގިނަ ޢަދަދެއްގެ ލަންކާ ފައިސާ އެޤައުމުން ބޭރުކުރަން އުޅޭތީއެވެ. ދޮންބެއްޔާ އެތައް ވާހަކައެއް ދައްކައިގެންވެސް އެފައިސާ ލިބޭނެ ގޮތެއް ނުވިއެވެ. އެންމެފަހުން ، ޑޮލަރު މާރުކުރި ރަސީދު ކޮބައިތޯ ކަސްޓަމުން އަހައިފިއެވެ. ނަސީބަކުން ޑޮލަރު މާރުކުރި ރަސީދު ދޮންބެއްޔާގެ ވޮލެޓްގައި ރައްކާކޮށްފައި އޮތެވެ. އެފައިސާ ކޮޅު ދޮންބެއްޔާއަށް ލިބުނީ ހަމަ ނަސީބަކުންނެވެ. އެ ރަސީދު ބޭއްވިފައި އޮތީމައެވެ.

ދޮންބެއްޔާ ، ޢާއިލާއާއެކު ލަންކާއަށް ކުރި ދަތުރު ނިންމައިލީ އެހާ އުފަލަކުންނޫނެވެ. ލައްކައަކަށްވުރެ ގިނަ ލަންކާ ރުޕީސް އަތުގައި ހުއްޓެވެ. އެފައިސާ ޑޮލަރަށް ހަދަން ވެއްޖިއްޔާ ވަރަށް ބޮޑު ގެއްލުމަކަށް ވާނެއެވެ. އެހެން ދަތުރަކަށް ބޭނުންކޮށްލަން އަތުގައި އެލާރި ބެހެއްޓިޔަސް މާ ރަނގަޅުވާނެއެވެ. ދޮންބެއްޔާ ލަންކާއިން އެނބުރި އައީ ދެވުނު މޮޔަ ހިތަށްއަރާ ހުރެއެވެ. އެއަށްވުރެ ، އެހެންތަނަކަށް ދެވުނުނަމަވެސް ތަންކޮޅެއް ރަނގަޅުވީހެވެ. އެކަމަކު މިހުރިހާ ކަމަކާ ދިމާނުވާ މީހުންވެސް ، އަދި ލަންކާ ދަތުރު އަމާންކަމާއި އުފާވެރިކަމުގައި ހޭދަކުރުމުގެ ނަސީބު ލައްވާލާ މީހުންވެސް ތިބެދާނެއެވެ. އެކި މީހުންނަށް ދިމާވާނީ އެކި ގޮތެވެ.