ރަޙުމަތާއި ބަރަކާތުން ފުރިގެންވާ ރަމަޟާންމަސް ނިމި ، އެމަހުގެ އަޅުކަމުގެ ފަހުން އުފާފާޅުކުރުމަށް ، މުސްލިމުންނަށް ޚާޢްޞަ ކުރެވިގެންވާ ފިޠުރުޢީދު ދުވަހުގެ ހެޔޮއެދުންތައް އެންމެހާ ކިޔުންތެރިންނަށް އަރިސް ކުރަމެވެ. ބަރަކާތްތެރި މައްސަރެއްގެ ނިމުން ފާހަގަ ކުރެވެމުންދާއިރު ، މުސްލިމުން ސަމާލުކަންދޭންޖެހޭ އެތައް ފިލާވަޅުތަކެއް އެމަހުން ލިބިގެންދެއެވެ.
އެންމެ ފުރަތަމަކަމަކީ ، ވަރުބަލިކަމެއްނެތި ރެޔާއި ދުވާލު އަދާކުރި ހެޔޮޢަމަލުތަކާއި ދީނުގެ ވާޖިބުތައް އާދައެއްގެ ގޮތުގައި ދެމެހެއްޓޭތޯ ގަދައަޅައި މަސައްކަތް ކުރުމެވެ. މައިންބަފައިންނަށް ހެޔޮކޮށް ހިތުމާއި ގާތްތިމާގެ މީހުންނާ ގުޅުން ބަދަހިކޮށް ރަޙިމުގެ މަތިވެރި ގުޅުން ދެމެހެއްޓޭތޯ މަސައްކަތް ކުރުމެވެ. ފަރުޟު ފަސްނަމާދަށް ރައްކާތެރިވެ ، ގަޑިން ގަޑިޔަށް ނަމާދު ކުރުމަށް ނިޔަތްގަނެ އެކަމަށް ހިތްވަރު ލިބިގަތުމެވެ. ކޮންމެ ދުވަހަކުވެސް ، ކީރިތި ޤުރުއާނުން ކިތަންމެ ކުޑަމިންވަރެއްނަމަވެސް ކިޔަވައިލުމެވެ.
ބަރަކާތްތެރި ރަމަޟާންމަހު ، އަޅުގަނޑުމެން ފޫހިކަމެއްނެތި އަދާކުރި އަޅުކަން ، ﷲ ގެ ޙަޟުރަތުގައި ޤަބޫލުކުރައްވައިފިކަމުގެ ޢަލާމާތެއްކަމުގައި ޢިލްމުވެރިން ކަނޑައަޅުއްވާ މިންގަނޑެއް އޮވެއެވެ. އެއީ ، އެ އަދާކުރި އަޅުކަންމަތީ ޤާއިމްވެ ހުރުމުގެ މަތިވެރި ނަޞީބު ، ﷲ ގެ ޙަޟުރަތުން މިންވަރު ކުރެއްވުމެވެ. އެއަށްވުރެ މަތިވެރި ނަޞީބެއް އިންސާނާއަށް ކިބިގެންނެއް ނުވެއެވެ. ދުނިޔެއާއި ޢާޚިރުގެ ބާއްޖަވެރިކަމަށްޓަކައި ، ﷲ އެންގެވިމަގުން ހިނގުމުގެ މަތިވެރި ތައުފީޤު އެކަލާނގެ ޙަޟުރަތުން މިންވަރު ކުރެއްވުން އެއީ ، އަޅުކަން ޤަބޫލުކުރައްވައިފިކަމުގެ ޢަލާމާތެކެވެ.
ދެ ދުނިޔޭގެ ނަސީބު ލިބުން އޮތީ ، ﷲ ގެ މަގުގައި ތިމާ ހޭދަކުރާ ތަޤުވާވެރި ދިރިއުޅުމެއްގެ މައްޗަށެވެ. އެއީ އެކަމަށް އެދޭމީހާއަށް އެއްވެސް އުނދަގޫކަމެއް އޮތްކަމެއްނޫނެވެ. ބަރަކާތްތެރި ރަމަޟާންމަހުން ލިބުނު ހިތްވަރާއެކު ، އެމަހުގެ ތެރޭގައި ތިމާގެ ނަފްސު އިޞްލާޙުކުރެވިފައިވާ ގޮތަށް ، ދިރިދުނިޔޭގައި އުޅުމެވެ. ދުނިޔަވީ ހެއްލުންތަކާއި ގެއްލުންތަކުން ދުރުހެލިވެ ، ނަފްސުގެ އަޅަކަށްނުވެ ، ހެޔޮ ޢަމަލުތަކަށް ތިމާގެ ދިރިއުޅުން ބަށްޓަން ކުރުމެވެ. ރަނގަޅާއި ނުބައި ވަކިވާހިނދު ، ރަނގަޅު މަގަށް ތިމާގެ ދަތުރު ސީދާ ކުރުމެވެ. އޮޅިގެންވެސް ނުބައިމަގަކަށް ، އެދިރިއުޅުން ކަސިޔާރުވެގެން ނުދާނެގޮތަށް ތިމާގެ ވިސްނުން ސީދާ ކުރުމެވެ.
ކީރިތި ﷲ ، އަޅަމެން އެންމެންނަށް ، އިބަ އިލާހު ރުހިވޮޑިގެންވާ މަގުން ހިނގައި ކުރިޔަށް އޮތް އަހަރުގެ ރަމަޟާން މަހާ ބައްދަލުކޮށް ، އެމަހުގެ ދަރުމައާއި ސަވާބުން އަޅަމެންގެ ހެޔޮ ޢަމަލުގެ ތިލަފަތް ބަރުވެ ، ޢާޚިރަތުގެ ދާއިމީ ގޮވައްޗަށް ދަތުރުކުރުމުގެ އަމާންކަން މިންވަރު ކުރައްވާށިއެވެ. ބަރަކާތްތެރި ފިޠުރުޢީދުގެ އުފަލުން އަޅަމެންގެ ހިތްތައް ފުރުއްވައި ، އެހިތަށް ތެދުމަގުގެ އަލިކަން އިރާދަ ކުރައްވާށިއެވެ. އާމީން.
