ދޮންބެއްޔާ ހުންނަނީ ފަޅުރަށެއްގައި ކަމަށްވާތީ ، މީހުން އުނބަށްޖަހާތަން އެހާގިނައެއްކޮށެއް ނުފެނެއެވެ. ރާއްޖޭގެ ސިޔާސީ މަޝްރަޙު ބަދަލުކޮށް ، އިޖްތިމާޢީ ޢާދާލަތު ގެއްލި އިޖްތިމާޢީ ފޭރާންވީދި ، ބައްޕަޔާއި ދަރިފުޅަށް އެއްމޭޒުދޮށަށް ކާން ނޭރޭހިސާބަށް ، ފިތުނަވެރި ބައިބައިވުންތަކެއް އުފެދި ، ދީނީ އެއްބައެއްވަންތަކަން ނެތިގެން ދާންފެށީ 2008 ވަނަ އަހަރުން ފެށިގެންނެވެ. އޭގެ ކުރީގެ ސަރުކާރުން ، ދީނީ ދެބަސްވުންތަކާއި ދީނީޚިލާފުތައް ނައްތާލައި ، ދީނީގޮތުން އެއްބައެއްވަންތަ ޤައުމަކަށް ، ރާއްޖެ ހެދޭތޯ ވަރަށް މަސައްކަތް ކުރިއެވެ. ޤާނުނީގޮތުން ، ސަރުކާރުގެ ނިންމުން ހަރުދަނާކުރުމަށްޓަކައި ، ނިޒާމަށް ގެންނަންޖެހޭ ބަދަލުތައް ގެނައެވެ. ދީނީ އެއްބައެއްވަންތަކަން ޤާއިމް ކުރިއެވެ.
2008 ވަނައަހަރު ، ރާއްޖޭގެވެރިކަން ބަދަލުވެ ، " ހުޅަނގުކޮޅަށް " ޖެހި ، ހުޅަނގުން ، މިނިވަންކަން ނިގުޅައިގެންފައިވާ ކަމަށްބުނާ ޤާނޫނުތަކާއި އުޞޫލުތައް ނައްތައިލެވި ، މިނިވަން މާޙައުލަކަށް ދިވެހިޖައްވު ނޭވާ ލީ ވަރަށްފޮނި އުއްމީދު ތަކަކާ އެކީގައެވެ. މިނިވަންކަމުގެ ޙައްޤު ކަށަވަރުކޮށްދެމުންނެވެ. 2008 ގައި ބަދަލުވި ވެރިކަން ، ދައުރު ނުނިމެނިސް ވައްޓައިލެވުނީ ، ވެރިކަމުގެ ބާރުތަކުގެ މެދުގައި ޤާއިމްވެފައި އޮންނަންޖެހޭ ޙައްޤުތަކެއް ކަށަވަރުނުވެ އޮތުމުގެ ސަބަބުންނެވެ. ޙައްޤުވެރިން ، ޙައްޤުހޯދަން ދުއްވައިގަތްތަނުން ، އެހެންމީހުންގެ ޙައްޤުތަކަށް އަރައިގަނެވިގެންނެވެ.
ޙައްޤަކީ ކަނޑައެޅި ބަޔާންވެގެންވާ ލާޒިމު ސިފައެކެވެ. އެހެންމީހުންގެ ޙައްޤަކަށް އަރައިގަނެވޭ ހިސާބުން ، ތިމާއަށް އެހުރެވުނީ ޙައްޤުތައް ، އެތެރެވުމަށް ހުއްދަކުރާ މިނުން އެތެރެ ވެފައެވެ. ރޮނގު ހުރަސްވެފައެވެ. ޙައްޤަކީ ކޮންމެމީހެއްގެވެސް ޙައްޤެކެވެ. އެއީ ވަކިމީހަކު ބޭނުންވާގޮތަށް މޮޑެން އޮންނަ ފުށްގަނޑެއްނޫނެވެ. 2008 ގައި ރާއްޖޭގައި އޮތް ވެރިކަން ފުރޮޅިގެން ދިއުމުގެ އެންމެ މައިގަނޑު ސަބަބަކީ ، ކަޅު ރޮނގު ހުރަސްކުރެވި ، އިޖްތިމާޢީ އަދި ފަރުދީ ޙައްޤުތަކަށް އަރައިގަތުމެވެ. ޙައްޤުތައް ކަށަވަރުކޮށްދޭން ތިބި މީހުންނަށް ، ޙައްޤަކީ ކޮބައިކަން އޮޅޭމިންވަރަށް ވެރިކަން ބޮއްސުންލުމެވެ. ކޮންޓްރޯލް ގެއްލި ފާލުން ނައްޓައިލުމެވެ.
ވަށަފަރުމީހުން އުނބަށްޖެހުން އެއީ ، މިސާލީ ބަހެއްގެ ގޮތުގައި ދިވެހިބަހުގައިބޭނުންކުރެވޭ ބަހެކެވެ. އެބަހުގެ މާނަޔަކީ ، ބޭނުންނެތިގެން ދޫކޮށްލިއެއްޗެއް ، ފަހުން ބޭނުންކުރުމުން ބުނާ ބަހެކެވެ.
ރާއްޖޭގެ ސިޔާސީ މަޝްރަޙުގައި އަބަދުވެސް ފެންނަނީ އެ މަންޒަރެވެ. މިހާރު އުނބަށް ޖަހަނީ ވަށަފަރުމީހުންނެއްނޫނެވެ. ސިޔާސީ މީހުންނެވެ. އެއްދުވަސްވަރެއްގައި ހަތުރުންކަމަށް ދެކެ ، ހެއްދެވި ނިހެއްދެވިޔަށް ގޮވާފަވެސް ، ސިޔާސީ ބޭނުމެއް ފުދެން އޮތިއްޔާ އެކަކު އަނެކެއްގެ ފައިބުޑަށް ވެއްޓެއެވެ. އިޖްތިމާޢީ ހަމަނުޖެހުމާއި ސިޔާސީ ދެބަސްވުމާއި އަރައިރުން އުފެދި ހަމައިން ނެއްޓިގެން ދިޔައީ 2008 ގައި ދިވެހިން ހޯދިކަމަށްބުނާ " މިނިވަންކަން " އޭގެ ޒާތުގައި ދެމެހެއްޓޭނެ ހަމަތަކެއް ، 2008 ގައި އެއައި ސަރުކާރުން ހަމަނުޖައްސާ އޮތީމައެވެ. ވީގޮތެއްވާން ދޫކޮށްލީމައެވެ. މިނިވަންކަމުގެ ނަމުގައި ޙައްޤުތައް ގެއްލުވައިލީމައެވެ. ޙައްޤުގެ މަގު ، ސަރުކާރަށް ދައްކައި ނުދެވުނީމައެވެ. ސިޔާސީ ބޭނުމަށް ، އެ ޙައްޤުތައް ޤުރުބާންކުރީމައެވެ.
މިހާރުވެސް ، އުނބަށް ޖަހާފަ ދެކޮޅަށް ދުވާމީހުން ސިޔާސީ މައިދާނުން އެބަފެނެއެވެ. އެފަދަ މީހުންގެ ފަހަތުން ދުވާމީހުންވެސް އެބަފެނެއެވެ. އެފަދަ މީހުންގެ ކިބައިން ސަލާމަތް ނުވެގެން ރައްޔިތުން އުޅޭތަންވެސް އެބަ ފެނެއެވެ.
ދިވެހި ކޮންމެ ރައްޔިތެއްގެވެސް އެންމެބޮޑު އެދުމަކަށްވާނީ ، އެބައިމީހުންގެ ދީން ރައްކާތެރިކުރެވުމާއެކު ، އިޖްތިމާޢީ ޢަދާލަތު ޤާއިމްވެފައި އޮންނަ ، ނަޟާޙަތްތެރި ދިރިއުޅުމެއް ލިބޭނެ ވެށްޓެއް ޤާއިމްވެފައި އޮތުމެވެ. މިމަޤްޞަދު ޙާޞިލްވަނީ ، ފަރުދީ މިނިވަންކަމަށް އިސްކަންދީ ، ޤައުމުގެ ލާބައާއި މަންފާއަށް ވިސްނައިގެން ، ސިޔާސީ ގޮތުން އުނބަށްޖަހާމީހުންނާ ދުރުހެލިވެގެންކަން ކަށަވަރެވެ. މިއަދު މިލިބޭ ފިލާވަޅަކީ އަގުހުރި އެއްޗެކެވެ. ވިސްނައި ފިކުރުކުރާ ބަޔަކަށެވެ.
