(15 އޭޕްރީލް 2023 ގައި ޝާއިއުކުރި ބަޔާ ގުޅޭ)
ހޫދުގެފާނުންގެ ޤައުމުގެ މީސްތަކުންކުރެ އިސްމީހާ ހޫދުގެފާނަށް ދެންނެވިއެވެ. ކަޅޭގެފާނު ތިޔަވިދާޅުވާ ކަލެއްގެ ރަސޫލެއްކަމުގައި ތިމަންމެންގެ ތެރެއިން މީހަކު ފޮނުވުން އެއީ އުނިކަމެއްނޫން ހެއްޔެވެ ؟ ހޫދުގެފާނު ވިދާޅުވިއެވެ،
" އެކަމުގައި އުނިކަމެއްކޮބައިހެއްޔެވެ ؟ ﷲ ސުބްޙާނަހޫ ވަތަޢާލާ ބޭނުންފުޅުވަނީ ތިޔަބައިމީހުން ދިރިދުނިޔޭގައި އުޅޭނެ ޙަޔާތެއްގެ ފުރިހަމަކަން ތިޔަބައިމީހުންނަށް މިންވަރު ކުރެއްވުމަށެވެ. ތިމަންކަލޭގެފާނު ތިޔަބައިމީހުގެ ގާތަށް ފޮނުއްވުނީ އިންޒާރުދެއްވުމަށެވެ. ނޫޙުގެފާނުގެ ވާހަކައާއި އެކަލޭގެފާނުގެ ޤައުމުގެ މީސްތަކުންނަށްވީގޮތް ، ތިޔަބައިމީހުން އަދި ހަނދާންނެތޭހާ ދުވަހެއް ނުވެއެވެ. އެކާރިސާއިން ތިޔަބައިމީހުން ފިލާވަޅު ލިބިގަންނާށެވެ. އެމީހުން ކިތަންމެ ބާރުގަދަ ބަޔަކަށްކަމުގައިވީ ނަމަވެސް ، ނޫޙުގެފާނަށް ނުކިމަންތެރިވެ ، އީމާންކަމުން އެއްކިބާވެގަތް އެންމެން ، ﷲ ގެ ކޯފާއަށް ހުށަހެޅި ހަލާކު ކުރެއްވިއެވެ.
" އޭ ހޫދެވެ ! އަހަރެމެން ހަލާކު ކުރާނީ ކާކު ހެއްޔެވެ ؟ އެކަލޭގެފާނު ޖަވާބު ދެއްވިއެވެ.
" ގަދަކީރިތިވަންތަ މާތް ﷲ އެވެ. އެއީ ކޮންމެ ކަމަކަށްމެ ކުޅަދުންވަންތަވެ ވޮޑިގެންވާ މަތިވެރި ﷲ އެވެ. "
އެކަލޭގެފާނުންގެ ޤައުމުގެ މީހުންކުރެ ، ކާފަރުވީމިހުން ، ހޫދުގެފާނަށް ދެންނެވިއެވެ.
" އަހަރެމެން ، ސަލާމަތްކޮށްދޭނީ އަހަރެމެންގެ ކަލާނގެތަކެވެ.
އެބައިމީހުންގެ ހަލާކަކަށްވާނީ ، އެބައިމީހުން އަޅުކަން ކުރަމުން އެގެންދާ ބުދުތައްކަމުގައި ، ހޫދުގެފާނު އެބައިމީހުންނަށް ވިސްނައި ދެއްވިއެވެ. އަދި ، ﷲ ފިޔަވައި އެހެން ފަރާތަކުން އެބައިމީހުންނަށް ރައްކާތެރިކަމެއް ލިބިގެންނުވާނެކަމުގައި ހޫދުގެފާނު ވިދާޅުވިއެވެ. އަދި ﷲ ފިޔަވައި ދުނިޔޭގެ އެއްވެސްކަމެއްގެ މައްޗަށް ކުޑަވެސް ބާރުވެރިކަމެއް ، އެއްވެސް ފަރާތަކަށް ލިބިގެންނުވާކަން ، ހޫދުގެފާނު ، އެކަލޭގެފާނުގެ ޤައުމުގެ މީސްތަކުންނަށް ސާފުކޮށް ދެއްވިއެވެ.
އެހެންނަމަވެސް ، ހޫދުގެފާނާއި އެކަލޭގެފާނުގެ ޤައުމުގެ މީސްތަކުންނާ ދެމެދު ، މި ދެބަސްވުންތައް ކުރިޔަށް ދިޔައެވެ. އަހަރުތައް ފާއިތުވަމުންގޮސް ، އެކަލޭގެފާނަށް ނުކިޔަމަންތެރިވީ މީހުންގެ ބަސް ގަދަވެ ، ހަރިކަށިވުމާއެކު އަނިޔާވެރިކަން އިތުރުވިއެވެ. އެބައިމީހުންގެ ބޮޑާކަމާއި ކިބުރުވެރިކަން ބޮޑުވެގެން ދިޔައެވެ. އަދި އެކަލޭގެފާނު މޮޔަފުޅުވެފައިވާކަމަށް ބުނެ މަލާމާތް ކުރަމުން ގެނދިޔައެވެ. އެއްދުވަހަކު އެމީހުން ، ހޫދުގެފާނަށް ދެންނެވޫއެވެ.
" ކަލޭގެފާނު މިޔަފުޅުވަމުން ތިވަޑައިގަންނަވަނީ ، އަޅުގަނޑުމެންގެ ކަލާނގެތައް ކަލޭގެފާނަށް ނުރުއްސެވުމުގެ ސަބަބުންނެވެ. އެއީ އެކަލާނގެ ތަކުގެ ފަރާތުން ކަލޭގެފާނަށް ކުރިމަތިވެވަޑައިގަންނަވާ ބަލިމަޑު ކަމެކެވެ.
ކީރިތި ޤުރުއާނުގެ ހޫދު ސޫރަތުގެ 53 އަދި 54 ވަނަ އާޔަތުގެ މާނާގައި ވެއެވެ.
" އެއުރެން ދެންނެވޫއެވެ. އޭ ހޫދުގެފާނެވެ ! ބަޔާންވެގެންވާ ހެތްކެއް ތިމަންމެންގެ ގާތަކަށް ކަލޭގެފާނު ނުގެންނަވަމުއެވެ. އަދި ، ( ހަމައެކަނި ) ކަލޭގެފާނުގެ ބަސްފުޅަކަށް ތިމަންމެންގެ އިލާހުންތައް ދޫކޮށްލާނޭ ބަޔަކުކަމުގައި ، ތިމަންމެން ނުވަމުއެވެ. އަދި ، ކަލޭގެފާނަށް އީމާންވާ ބަޔަކު ކަމުގައި ، ތިމަންމެން ނުވާހުށީމެވެ. " (53) ތިމަންމެންގެ ބައެއް އިލާހުން ، ކަލޭގެފާނަށް ނުބައިކަމެއް ޖައްސަވައިފިކަމުގައި މެނުވީ ތިމަންމެން ، ނުބުނާނޫއެވެ. އެކަލޭގެފާނު ވިދާޅުވިއެވެ. ހަމަކަށަވަރުން ، ތިޔަބައިމީހުން ޝަރީކުކޮށް އުޅޭތަކެތިން ، ތިމަންކަލޭގެފާނު ބަރީއަވެގެންވާކަމަށް ﷲ ހެކިކުރައްވަމެވެ. އަދި ، ތިޔަބައިމީހުން ވެސް ހެކިވާށެވެ ! " (54).
ހޫދުގެފާނު ، އެކަލޭގެފާނުގެ ޤައުމުގެ މީސްތަކުންނާއި އެބައިމީހުންގެ ކަލާނގެތަކާ ކުރިމަތިލައްވައި ﷲ އަށް ވަކީލުކުރެއްވިއެވެ. ﷲ ކޯފާ ލައްވާނީ ، އެކަލޭގެފާނަށް ނުކިޔަމަންތެރިވެ އެކަލާނގެޔަށް އުރެދުނު މީހުންނަށްކަން އެކަލޭގެފާނަށް އެނގިވަޑައިގަންނަވައެވެ. އެބައިމީހުންނަކީ ދުނިޔޭގައި ކިތަންމެބާރުގަދަ ، އަދި ކިތަންމެ މުއްސަނދި ބަޔެއްކަމަށްވިޔަސް ، އެކަލާނގެ ކޯފާއާއި ޢަޒާބުން މިންޖެއް ނުވާނެއެވެ.
(ނުނިމޭ)
