(15 އޭޕްރީލް 2023 ގައި ޝާއިއުކުރި ބަޔާ ގުޅޭ)
އަޝްހަރު ، ހޮސްޕިޓަލުގައި އެޑްމިޓްކޮށްފައި އޮންނަތާ ދެތިންދުވަހެއް ވެއްޖެއެވެ. އޭނާގެ ބޮލުގެ ނާރެއްވަނީ ފަޅައިގެން ގޮއްސައެވެ. އެހެންނަމަވެސް ، ނުރައްކަލުން ވަނީ ސަލާމަތް ކުރެވިފައެވެ. އަޝްހަރު ހޮސްޕިޓަލުގައި ބޭއްވިފަހުން ، ކޮންމެ ދުވަހަކުވެސް ، ސާރާ ހޮސްޕިޓަލަށް އާދެއެވެ. ކޮންމެދުވަހަކު ފޯނުކުރެއެވެ. އެހެންނަމަވެސް ، ސާރާ އާ ބައްދަލުކުރުމަށް އަޝްހަރު އައީ ދެކޮޅު ހަދަމުންނެވެ. ފޯނެއްވެސް ނުނަގައެވެ. އެންމެފަހުން ފަރީދާއަށް އެއީ މައްސަލަޔަކަށް ވިއެވެ. އަދި ސާރާއާ ބައްދަލުކޮށްލައި ހިތުގައިހުރި ވާހަކަތައް ދެމީހުން ޙިއްޞާކުރުމަށް އެދުނެވެ. ސާރާއަކީ އަޝްހަރުގެ ރައްޓެއްސެއްކަމާއި ، ރައްޓެހިންގެ ބޭނުން އިންސާނާއަށް ޖެހޭނީ މިފަދަ ވަގުތުތަކުގައިކަމުގައި ފަރީދާ ބުންޏެވެ.
މީހަކާ ބައްދަލުކޮށްލަނީކީ ނޫނެވެ. އެއްވެސް މީހަކާ ވާހަކަ ދައްކަނީއެއް ނޫނެވެ. ބަލި ފަސޭހާވާނީ ކިހިނެއް ހެއްޔެވެ ؟ އެ ދެ ރޮށީގެ އަގުނެތް ، ގޮތްކުޑަ އަންހެންކުއްޖާގެ ޙައްޤުގައި ، އަޝްހަރުގެ ދިރިއުޅުން ބަރުބާދުވެގެން ދާން ތި ދޫކޮށްލަނީ ކީއްވެ ހެއްޔެވެ ؟ އެއީ އެހާ އަގެއްހުރި ކުއްޖެއްނޫނެވެ. އެނޫނަސް އަންހެންކުދިން ތިބޭނެއެވެ. އެއަށްވުރެ ހާސްބައި ރަނގަޅު އަންހެންކުދިން އަޝްހަރަށް ވާނެއެވެ. " ފަރީދާ ބުންޏެވެ.
ފަރިދާ ބޭނުންވާގޮތް ނުވިނުވިހެން އޭނާގެ އަމިއްލަ ނަފްސުދެކެ ރުޅިއަންނަގޮތް ވެއެވެ. ފަރީދާގެ އެއްވެސް ވާހަކަޔަކަށް އަޝްހަރު ވަކި އެއްޗެއް ނުބުނެއެވެ. އޭނާ ބުނެލިހާވެސް އެއްޗަކީ ، ކުޑަދޮރުގެ ފޮތިގަނޑު ލައްޕާލަދޭށޭ އެވެ. އޭނާ ނިދާލަން ބޭނުންވާކަމުގައެވެ.
ހޮސްޕިޓަލުން ދޫކޮށްލުމުން އަޝްހަރު ގެޔަށް ބަދަލުވިއެވެ. އެހެންނަމަވެސް އޮފީހަކަށް އަދި ނުނުކުމެއެވެ. ގޭގެ ބަގީޗާތެރޭ އެކަނިމާ އެކަނި އިށީނދެލައިގެން އިންދާ ، ޖޫސްތަށްޓެއް ހިފައިގެން ފަރީދާ އައެވެ. އެޖޫސްތަށީގައި ހިފާނެ ހިތްވަރެއް އަޝްހަރުގެ ހަށިގަނޑަކު ނެތެވެ. ފަރީދާ އެތައްފަހަރަކު ކީމަވެސް އެތަށީގައި އަޝްހަރެއް ނުހިފިއެވެ.
އަޝްހަރުގެ ކަންތައްތައް ހުރިގޮތުން ، ފަރީދާ ކަންބޮޑުވިއެވެ. އަޝްހަރު އެގޮތަށް އުޅޭނީ ކިހާދުވަހަކުތޯ ، ފަރީދާ ސުއާލު ކުރިއެވެ. ޚައިރާދު އެގެއިން ނުކުމެގެން ދިޔަތާ 12 ވަރަކަށް ދުވަސް ވެއްޖެއެވެ. އޭރުއްސުރެ އަޝްހަރު މީހަކާ ވާހަކަ ދައްކަނީކީ ނޫނެވެ. ބަނޑަށް އެނގުންވާވަރަށް އެއްޗެއް ކަނީކީ ނޫނެވެ. އެއީކީ ، އިންސާނުންނަށް ދުނިޔޭގައި އުޅެވޭނެ ޙާލަތެއްނޫންކަމުގައި ފަރީދާ ބުންޏެވެ. ޚައިރާދަކީ ، އަޝްހަރުގެ ދިރިއުޅުން ހަލާކުކޮށްލާވަރުގެ އަގެއްހުރި ކުއްޖެއްނޫނެވެ. ފަރީދާ އެހުންނަނީ ހަދާނެގޮތް ބޮޑުވެފައެވެ. އެހެންހުރިހާކަމެއް ރޭވިގޮތަށް ދިޔަނަމަވެސް ، އޭނާއަކަށް އަޝްހަރު ކޮންޓްރޯލް ކުރެވޭގޮތެއް ނުވިއެވެ.
މަންމަ ކަންބޮޑުވެގެންގޮސް މި ހަލާކުވަނީއޭބުނެ ، ފަރީދާ ، އަޝްހަރުގެ އަތުގައި ހިފައި ތަޅުވައިގަތެވެ. ޚައިރާދުގެ މަތިން ހަނދާން ނައްތާލާފައި ، ދެމައިންވެގެން އަޝްހަރުގެ ދިރިއުޅުން އަލުން ކޮޅަށް ޖަހަން މަސައްކަތް ކުރަމާ ހިނގާށޭ ފަރީދާ ބުންޏެވެ. އިރުކޮޅެއް ވަންދެން ، އަޝްހަރު އަނގައިން ނުބުނެ އިނެވެ. އިސްއުފުލާލައި ދެއަތުން މޫނާއި ދެލޯ ފުހެލިއެވެ.
" މިއަދު ، މަންމަ އޭނާގެ ނަން ބުނެފީމުއެވެ. މީގެފަހުން އެނަން އަހަރެން އަޑުއަހާކަށް ބޭނުމެއްނޫނެވެ. އަހަރެންނަށްޓަކައި އޭނާ ވަނީ މަރުވެފައެވެ. އޭނާގެ މޫނުދެކޭކަށް އަހަރެން ބޭނުމެއްނޫނެވެ. އޭނާގެ އަޑުވެސް އަހާކަށް އަހަރެން ބޭނުމެއްނޫނެވެ. އަހަރެން އޭނާއާ ވާހަކަ ދައްކާކަށްވެސް ބޭނުމެއްނޫނެވެ. އަހަރެންނަށްޓަކައި ދިރިހުރެގެން ، އޭނާ ދެން އިތުރަށް ކުރަންއޮތީ ކޮން ކުށެއް ހެއްޔެވެ ؟ " އަޝްހަރު ބުންޏެވެ.
ފަރީދާގެ މޫނުމަތިން ވިދުވަރެއް އުފެދިގެންދިޔަފަދައެވެ. ލޮލުގެ ވިދުން ގަދަވިއެވެ. ދެކޯތާފަތުގެ ކުލައަލިވެގެން ދިޔައެވެ. ތުންފަތުގައި ހިނިތުންވުމެއް އުފެދުނެވެ. އެލިބުނު އުފާވެރިކަމުގައި އުފެދުނު ހިނިތުންވުން ، ޙީލަތުން ފުރިގެންވާ ގޮތެއްގައި އޭނާގެ މޫނުމައްޗަށް ފެތުރިގެން ދިޔައެވެ.
ފަރީދާއާއި ޒަރީނާ ބައްދަލުކޮށް ވާހަކަދައްކަމުން ގެންދިޔައެވެ. ޒަރީނާ މެންގެޔަށް ދިޔައީ ފަރީދާއެވެ. ފަރީދާމެންގެޔަށް ޒަރީނާ އައިސް ދެކެވޭވާހަކަޔަކުން އަޝްހަރުގެ ހިތުގައި ޝައްކެއް އުފެދިދާނެތީ ، ދެމީހުން އެއްބަސްވީ ޒަރީނާމެންގޭގައި ބައްދަލު ކުރުމަށެވެ. އަޝްހަރުގެ ޙާލުގެ ވާހަކައިން ޒަރީނާ ސުއާލުކުރިއެވެ.
ދެހަފުތާއެއްހާ ދުވަސްވީއެވެ. މީހަކާ ވާހަކައެއް ނުދައްކައެވެ. ރަނގަޅަކަށް ނުކައެވެ. އެކަމަކު މިއަދު ވާހަކަ ދައްކައިފިއެވެ. ފަރީދާ އިންދިއޮށުގެ ނިރު ފަޅައިފިއެވެ. ފުރަތަމަ ފަހަރަށް ޚައިރާދާމެދު ހިތުގައި ނަފުރަތްތެރިކަމެއް އުފެދި ، އޭނާގެ ނަން އަޑުއެހުން އަޝްހަރަށް އުނދަގޫވެއްޖެއެވެ. އޭނާ ، ޚައިރާދާ ވާހަކަ ދައްކާކަށްވެސް ބޭނުމެއްނެތެވެ. ޚައިރާދުގެ މޫނު ދެކެލަންވެސް އަޝްހަރު ބޭނުމެއް ނޫނެވެ. ޚައިރާދަކީ ، ނެތް މީހެކެވެ. އެއްވެސް ގޮތަކަށް އަޝްހަރާ ގުޅުމެއް ނެތެވެ. އޮފީހަށް ނުކުމެ ސާރާއާ ދެމީހުން އެކީގައި މަސައްކަތްކުރަން ފެށީމައި ހުރިހާކަމެއްވެސް ރަނގަޅުވާނެކަމަށް ޒަރީނާ ބުންޏެވެ.
އަޝްހަރުގެ ޙަޔާތަށް އެކުރިމަތިވީ އާދައިގެ ކަމެއްނޫނެވެ. ހިތް އޮންނާނީ ހަލާކުވެފައެވެ. ދުނިޔެދެކެ ހުންނާނީ ފޫހިވެފައެވެ. އެކަންކަން ހަމަޔަކަށް އެޅެން ފުދޭވަރަކަށް ދުވަސް ނަގާނެއެވެ. ޒަރީނާ ، ފަރީދާއަށް ހިތްވަރުދެމުން ބުންޏެވެ.
އަޝްހަރަށް ، ޚައިރާދު ބަލިވެއިންކަން އެނގުނުތޯ ޒަރީނާ ސުއާލުކުރިއެވެ. ﷲ އަށް ޙަމްދު ހުށްޓެވެ. އެކަމުގެ ޚަބަރެއް އޭނާއަށް އަދި ނުލިބޭކަމުގައި ފަރީދާ ބުންޏެވެ. އަދި ، އެކަން އެއްގޮތަކަށްވެސް އަޝްހަރަށް އެނގިގެން ނުވާނެކަމަށް ފަރީދާ ބުންޏެވެ. ސާރާ އޮފީހުން އައިސް ، ޚައިރާދު ، އަޝްހަރަށް ފޯނުކުރިވާހަކަ ބުނިކަމަށް ޒަރީނާ ބުންޏެވެ. އަޝްހަރުގެ މޯބައިލަށް ގުޅައި ، ޚައިރާދު އަޝްހަރާ ވާހަކަ ދައްކާފާނެތީ ޒަރީނާ ކަންބޮޑުވިއެވެ. އެހެންނަމަވެސް ، އަޝްހަރު ދެން ޚައިރާދާ ވާޙަކަ ނުދައްކާނެކަމަށާއި އޭނާއަށް އޭނާގެ ދަރިފުޅު ރަނގަޅަށް އެނގޭކަމުގައި ފަރީދާ ބުންޏެވެ. އަދި ހަމައެއާއެކު ، ފަރީދާގެ މުށުތެރޭގައި އަޝްހަރު ގެންގުޅޭނެކަމުގައި ފަރީދާ ބުންޏެވެ.
ފަރީދާވަނީ ، އަޝްހަރުގެ ހިތުގައި ޚައިރާދުގެ މައްޗަށް ރުޅިވެރިކަމާއި ނަފުރަތުނޫންއެހެން އެއްޗެއް ނޯންނާނެވަރަށް ޕްލޭންކޮށް ، އަޝްހަރުގެ ސިކުނޑި އަނބުރާލާފައެވެ. އަޝްހަރުގެ ވިސްނުން ދެނެއް ބަދަލެއް ނުވާނެއެވެ. ފޯނުން ނުގުޅިގެން ގެޔަށް އައިސް އަޝްހަރަށް އާދޭސް ކުރިނަމަވެސް ، ޚައިރާދުގެ ބަސް ، އަޝްހަރު ޤަބޫލުނުކުރާނެވަރަށް އޭނާގެ ސިކުނޑިޔާ ފަރީދާ ވަނީ ކުޅެލާފައެވެ. އެކަމާ ހާސްނުވާށެވެ.
ފަރީދާއާއި ޒަރީނާގެ ވާކައެހައިހިސާބަށް ދިޔަތަނާ ސާރާ އައިސް ގެޔަށް ވަނެވެ. ފަރީދާއާ ސަލާޟްކޮށްލުމަށްފަހު ، އެއްވެސް ކަމެއް އޭނާއަށް އަންގައިނުލާ ނިންމައިލީތީ ޝަކުވާކޮށްގަތެވެ. އަދި ފަރީދާގެ ޢަމަލުތައް ހުރިގޮތުން ، ޚައިރާދު ބަލައިގަނެ އޭނާއަށް އޮތް ފުރުޞަތު ގެއްލިފައިއޮތްކަމަށް ބަލައިގެން ހުރިވާހަކަ ބުންޏެވެ.
ފަރީދާ ސާރާއަށް ދަރިފުޅާއޭ ކިޔައި ގޮވައިލިއެވެ. އަދި ބުންޏެވެ. އެއަންހެންކުއްޖާއަކީ ، އޭނާގެ ދަރިފުޅުގެ ނޯކަރަކަށްވާންވެސް ކަމުނުދާ ކުއްޖަކަށްވާއިރު ، އޭނާގެ ދަރިފުޅުގެ އަނބިމީހާއަށް ވާން އޭނާ ދޫކުރާނެތޯ ސުއާލު ކުރިއެވެ. އެއީ ދުވަހަކުވެސް ވާނެކަމެއްނޫނެވެ. ގަދަކަމުން ޚައިރާދު އެގެޔަށް ގެނެސް ވެއްދީ ބަޝީރަތެވެ. އެދުވަހުވެސް ، ޚައިރާދު އެގޭގައި އުޅެން ދޫކޮށްނުލާނެކަމުގައި އޭނާ ނިންމިކަމުގައި ބުންޏެވެ.
ފަރީދާގެ ޕްލޭންގެ ކާމިޔާބީއަށްޓަކައި ސާރާ ފަޚުރުވެރިވާކަމަށް ބުންޏެވެ. ޚައިރާދުގެ މަޢުޞޫމިއްޔަތުކަމުން ، އަޝްހަރު ދީވާނާ ކޮށްލާފައި އޮއްވާވެސް ، އަޝްހަރުގެ ހިތުގައި ޚައިރާދުގެ މައްޗަށް ރުޅިއާއި ނަފުރަތު އުފައްދަން އެކޮށްލީ ކޮންމެ ކޮންމެ މީހަކަށް ކުރެވޭނެކަމެއްނޫންކަމުގައި ބުނެ ، ފަރީދާއަށް ، ސާރާ ތަޢުރީފް ކުރިއެވެ. ފަރީދާ ކުރަންޖެހޭ ކަންކަން ކޮށް ނިންމާފައިފާކަމަށާއި ދެން އެހިސާބުން ސާރާ ޙަވާލުވެ ، ދެންކުރަންޖެހޭ ކަންކަމަށް ސާރާ ސަމާލުވުމަށް ފަރީދާ ބުންޏެވެ.
" ފަރީދާ ދައްތަ އެކަމާ ކަންބޮޑުނުވާށެވެ ! އަހަރެންގެ ލޯތްބަކީ ވަރަށް ބާރުގަދަ އެއްޗެކެވެ. ޚައިރާދުގެ ހިތުން އަޝްހަރު ފުހެލުމަކީ އަހަރެންގެ ކަމެކެވެ. ކޮންމެ އަގެއްދީފައިވިޔަސް ، އަހަރެން އެކަން ކުރާނަމެވެ. ފަރީދާ ދައްތަ ނޫނަކަސް އަހަރެންނަށްވެސް ޑްރާމާ ކުޅެން އެނގޭނެއެވެ. " ސާރާ ބުންޏެވެ.
އެހާތަނަށް އޭނާގެ މަޤްޞަދު ޙާޞިލްކުރުމަށްޓަކައި ، އަޝްހަރުގެ ހިތް ހަލާކުކޮށްލަން އޭނާއަށް މަޖުބުރުވިކަމުގައި ފަރީދާ ބުންޏެވެ. އަދި އަޝްހަރުގެ ހިތްވަނީ ، ހަލާކުވެފައި ކަމަށާއި އެހިތަށް ހަމަޖެހުން ގެނެސްދިނުމަކީ ސާރާގެ ޒިންމާއެއްކަމުގައި ފަރީދާ ބުންޏެވެ. އަޝްހަރަށް އިންތިހާއަށް ލޯބިދީގެން ، އަޝްހަރު އެނބުރި އޭނާއަށް ގެނެސްދިނުމަށް ސާރާގެ ކިބައިން ފަރީދާ އެދުނެވެ. އަޝްހަރު ސާރާއާ އެ ޙަވާލުކުރަނީ ސާރާއަށް އިތުބާރުކޮށްފައިކަމަށާއި އެއިތުބާރު ދެމެހެއްޓުމަށް ފަރީދާ ، ނަޞޭޙަތްތެރިވިއެވެ.
އަޝްހަރާ ފޯނުން ވާހަކަ ދެއްކޭތޯ ޚައިރާދު ވަރަށް މަސައްކަތް ކުރިއެވެ. ކޮންމެ ދުވަހަކުވެސް އޮފީހަށް ގުޅައެވެ. އަޝްހަރުގެ މޯބައިލް އޮންނަނީ އަބަދުވެސް ނިއްވައިލާފައެވެ. އެދުވަހުވެސް އަޝްހަރު އޮފީހަށް ނާންނަކަމުގައި އޮފީހުން ފޯނުނެގި މިހާ ބުންޏެވެ. އަޝްހަރާ ވާހަކަ ނުދެއްކިގެން ޚައިރާދުހުރީ ކަންބޮޑުވެފައެވެ. ޚާލާދައްތައަށްވެސް އެކަން ވަރަށްބޮޑުކަމަކަށް ވެއްޖެއެވެ. އެކަމަކާހުރެ ، ޚައިރާދަށް އެއްވެސް އެއްޗެއް ނުކެވެއެވެ. ޚައިރާދު ގޮސް ޚާލާދައްތަގާތު އިށީނދެލިއެވެ. އަދި ، އަޝްހަރާ ވާހަކަ ދެއްކުމަށްޓަކައި އޭނާއަށް ކުރެވެން އޮތް ހުރިހާކަމެއް ކުރެވިއްޖެކަމުގައި ބުންޏެވެ.
އެއީ އެކަންވާނެގޮތްކަމުގައި ޚާލާ ބުންޏެވެ. ވިހަ ހަރުފަޔެއްފަދަ ފަރީދާ ، އަޝްހަރުގެ ސިކުނޑިޔާ ކުޅެލައި ، ޚައިރާދުގެ މައްޗަށް އުފައްދާފައި އޮތްކަން އޭނާއަށް ޔަޤީންވާކަމުގައި ޚާލާ ބުންޏެވެ. އަދި ޚައިރާދު އެކަމުގައި ކެތްތެރިވުމަށާއި އެއްދުވަހަކުން ، ފަރީދާ ބޭޒާރުވެ ، ޚައިރާދު ގާތަށް އަންނާނެކަމުގައި ބުނެ ޚައިރާދަށް ނަޞޭޙަތްތެރިވިއެވެ. މީދަލަކަށް ދުވަހެއް އައްޔާ ހިކަންޖަށްވެސް ދުވަހެއް އަންނާނެއެވެ. ޚާލާ ދައްތަގެ ފޯނު އޭނާބޭނުންކޮށްލަން ދީފާނަންތޯ ޚައިރާދު އެހިއެވެ.
އަޝްހަރު އޮފީހުގައި ، މަސައްކަތެއްގައިއ އުޅެނިކޮށް ނުދަންނަ ނަންބަރަކުން އޭނާއަށް ފޯނެއް އައެވެ. އަޝްހަރު ފޯނުނެގުމާއެކު ، ފޯނުންވާހަކަ ދައްކަނީ ޚައިރާދުކަމުގައި ބުންޏެވެ. އަޝްހަރު އަނގައިން ނުބުނެ ކަންފަތުގައި ފޯނުޖަހައިގެން އިނެވެ. އަދި ލޮލަށް އައި ރުޅީގެ އަސަރާއެކު ، ފޯނުކަނޑައިލިއެވެ. ޚައިރާދު އޭނާގެ އަމިއްލަ ނަފުސަށް ވާހަކަ ދެއްކިއެވެ.
މަންމަ އޭނާއާމެދު ކަންތައްކުރި އިހާނެތި ގޮތް އަޝްހަރަށް ނޭނގޭނެކަން އެނގެއެވެ. އަދި އަޝްހަރުގެ ދަރިފުޅާމެދުވެސް އެއްވެސް ހަމްދަރުދީއެއްނެތި ، އަނުޔާވެރިވެފައިވާކަން އަޝްހަރަކަށް ނޭނގޭނެއެވެ.
ކިހިނެއްވީތޯ ޚާލާ ، ޚައިރާދުކުރެން އެހިއެވެ.
" ދައްތާއެވެ ! އަހަރެންގެ ފިރިމީހާ ، އަހަރެންނަކީ ދުރުމީހެއްކަމަށް ބަލައިފިއެވެ. އަހަރެންނާ ވާހަކަ ދެއްކުމުގެ ބަދަލުގައި ފޯނު ކަނޑާލައިފިއެވެ. އަހަރެންގެ ކުށެއްނެތްކަން ސާބިތުކުރުމަށް ފުރުޞަތެއް ނުދިނެވެ. އަހަރެންގެ ބަނޑުގައި ގަރުބަގެންފައިވާ އޭނާގެ ދަރިފުޅުގެ ޚަބަރު އަޑުއަހާކަށްވެސް ބޭނުމެއް ނުވިއެވެ. އަހަރެންނަކީ މުޖުރިމެއްކަމަށް ކަނޑައަޅައި ނިންމައިފިއެވެ. އެއީ ދުނިޔޭގެ އެއްވެސް ކޯޓެއްގައި ޙުކުމެއް ނިންމާނެ ގޮތެއްނޫނެވެ. ދަޢުވާލިބޭ މީހާ ކުށުންބަރީޢަވުމަށް ފުރުޞަތެއް ނުދީ ، ދުނިޔޭގެ ޝަރީޢަތުގެ އެއްވެސް މަޖިލީހަކުން ޙުކުމެއް ނުކުރާނެއެވެ. " ޚައިރާދު މަޑުމަޑުން ބުނަމުން ގެންދިޔައެވެ.
ޚައިރާދުގެ ކުށެއްނެތްކަން ، ﷲ ދެނެވޮޑިގެންވާނެކަން ޚާލާ ހަނދާންކޮށްދިނެވެ. އިންސާނުން އެމީހުންގެ ޢަދާލަތުގެ ދަރުބާރުގައި ބޭނުންގޮތަކަށް ޙުކުމް ކުރިޔަސް ، ﷲ ގެ ދަރުބާރުގައި އެކަން އެހެން ނުވާނެކަމުގައި ޚާލާ ބުންޏެވެ. އެކަލާނގެ ، ޚައިރާދަށް ހަމްދަރދީވެ ވޮޑިގެން ، ހެޔޮރަޙުމަތް ލައްވާނެކަމުގައި ބުނެ ، ޚައިރާދަށް ހިތްވަރު ދިނެވެ.
އެވަރަށް އަޝްހަރު އޭނާދެކެ ލޯބިވީއިރު ، އޭނާއަށް ކުޑަވެސް އިތުބާރެއް ނުކުރީ ކީއްވެތޯ ޚައިރާދު ސުއާލުކުރިއެވެ. އޭނާގެ އެއްވެސް ވާހަކައެއް އަޝްހަރު ނުއެހީ ކީއްވެ ހެއްޔެވެ ؟ އޭނާ ދާނީ ކޮންތާކަށްތޯ ޚައިރާދުގެ ހިތާ އޭނާ ސުއާލު ކުރިއެވެ. ޚައިރާދު ނިންމައިގެންހުރީ ، އަޝްހަރު ގެޔަށް އަންނައިރު ، އޭނާގެ ރުޅިގަނޑު މަޑުނުވިޔަސް ، އަދި އޭނާ ޖަމާލާ ޙަވާލުކުރި ސިޓީ ނުލިބުނަސް ، އެންމެ ފަހަރަކު ނަމަވެސް ، އަޝްހަރު އޭނާއާ ވާހަކަ ދައްކާނެ ކަމަށެވެ. ތެދަކީ ކޮބައިތޯ އަދި ދޮގަކީ ކޮބައިތޯ އެންމެ ފަހަރަކު ނަމަވެސް ، އަޝްހަރު އޭނާކުރެން އަހައިލާނެ ކަމަށެވެ. ރޮމުން ރޮމުން ވާހަކަ ދައްކަމުންގޮސް ޚައިރާދަށް ގިސްލެވެން ފެށިއެވެ. އަދި ޚާލާގެ ކޮނޑުގައި އޭނާއަށް ބޯއަޅައިލެވުނެވެ.
އަޝްހަރު ބޯމަތީ އަތްއަޅަލައިގެންއޮއްވާ ޓަކިޖަހައިލުމަށްފަހު ، ސާރާވަނެވެ. އޭނާ އެއައީ އަޝްހަރާއެކު ކޮފީއެއް ބޯލާހިތުންކަމުގައި ބުންޏެވެ. އެހެންނަމަވެސް އަޝްހަރު އެވަގުތުއެއިނީ ކޮފީބޯ މޫޑެއްގައި ނޫންކަމަށް އަޝްހަރު ބުންޏެވެ. އަދި އޭނާ އޮފީހުގައި ނެތިގެން ގިނަކަންކަން ނުނިމި ހުންނާނެކަމަށާއި އެކަންކަމުގެ ފައިލްތައް ގެނެސްދިނުމަށް ސާރާގާތު ބުންޏެވެ.
(ނުނިމޭ)
މިވާހަކައިގެ 'މަނާރު" ގެ އަލިކަން ކިޔުންތެރިންނަށް ނިވެން އުޅެނީބާ!؟
މޮޅުމިހާގެ ކޮޅު މިއަރަނީ މީފަހެ އިންޞާފުބާ!
vvv.reethi shukuran