މާލޭގައި ހުންނަ އަލިރަސްގެފާނު ޒިޔާރަތުގެ އާބާތުރަ ފިލުވަން މާލޭ ވޯޓަރ އެންޑް ސްވަރޭޖް ކޮމްޕެނީ، އެމް.ޑަބްލިއު.އެސް.ސީއާއި ހަވާލުކޮށްފި އެވެ.
ތަރިކަ ރައްކާތެރިކުރާ ޤައުމީ މަރުކަޒުގެ ފަރާތުން އެމް.ޑަބްލިއު.އެސް.ސީގައި ބޭއްވި ރަސްމިއްޔާތެއްގައި މި މަޝްރޫޢުގެ އެއްބަސްވުމުގައި މަރުކަޒުގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޯރ އާޓްސް ކަލްޗަރ އެންޑް ހެރިޓޭޖް މުޙައްމަދު ޠާރިޤް އެވެ. އެމް.ޑަބްލިއު.އެސް.ސީގެ ފަރާތުން ސޮއިކުރެއްވީ ކުންފުނީގެ މެނޭޖިންގ ޑިރެކްޓަރ ޙަސަން ޝާހެވެ.
މިއެއްބަސްވުމުގެ ދަށުން އެ ޒިޔާރަތުގެ ފާރުތަކާއި، ގޭޓުގައި ކުލަލުމާއި ދަވާދުލުމާއި، ދިދަ ގަނޑި މަރާމާތުކޮށް، ސަރވައިލެންސް ކެމެރާ ހަރުކޮށް އެތަން ޒީނަތްތެރިކުރުމަށް ވަނީ ހަމަޖެހިފަ އެވެ.
މިއީ އެއްއަހަރު ދުވަހުގެ މުއްދަތަކަށް އެކުލަވާލާފައިވާ އެއްބަސްވުމެކެވެ.
މި މަސައްކަތް ކުރިއަށް ގެންދާނީ މަރުކަޒުގެ ޚާއްސަ ލަފައަކާއި އިރުޝާދާއެކު ކަމަށާއި މި މަސައްކަތް ކުރުމަށް ހަމަޖެހިފައިވަނީ އެމްޑަބްލިއުއެސްސީ ގެ އިޖުތިމާޢީ ޒިންމާގެ ދަށުންކަމަށް އެ ކުންފުނިން ބުނެއެވެ.
ރާއްޖޭގެ އެކި ކަންކޮޅުތަކުގައި ތާރީޚީ ގޮތުންނާއި ޘަޤާފީގޮތުން ހުރި މުހިއްމު ބިނާތައް ހުރިއިރު އެތަންތަން ރަނގަޅަށް ނުބެލެހެއްޓި ހަލާކުވެގެންދިޔުމަކީ ކަންބޮޑުވާކަމެކެވެ. އެހެންކަމުން ސަރުކާރުން ކުންފުނިތަކުގެ އެހީގައި މިފަދަ ތަންތަން ބެލެހެއްޓޭނެ އިންތިޒާމެއް ހަމަޖެއްސުމަށް ޘަޤާފީ ތަރިކަ ރައްކާތެރިކުރާ ޤައުމީ މަރުކަޒުން ޚާއްސަ އިސްކަމެއް ދެއްވައެވެ.
މާލޭ ހުކުރު މިސްކިތާއި، މިސްކިތުގެ މުންނާރާއި ވަޅުގެ އާބާތުރަ ފިލުވުމާއި ބެލެހެއްޓުންވަނީ ސްޓެލްކޯއާއި ޙަވާލުކޮށްފަ އެވެ.
