ކިރުއިލޮށި - 35

(12 އޭޕްރީލް 2023 ގައި ޝާއިއުކުރި ބަޔާ ގުޅޭ)

" އަހަރެންނާ އަޝްހަރު ބައްދަލުވެ ވާހަކަ ނުދެއްކެނިސް އަހަރެން މިއިންތަނުން ހިރިވެސް ނުލާނަމެވެ" ހަރުކަށި ރާގެއްގައި ފަރީދާއާ ދިމާއަށް ޚައިރާދު ބުންޏެވެ.

" އަހަރެން މީގެ ދެގަޑިއިރުކުރިން ، މިގެއިން ނުކުމެގެންދާން ޚައިރާދަށް އަމުރުކުރީމެވެ. ޚައިރާދުގެ ތި މުޑުދާރު މޫނައިގެން މިތަނުން ނުކުމެގެން ނުދާހާ ހިނދެއްގައި އަހަރެންގެ ދަރިފުޅު މިގެޔަކަށް ނާންނާނެއެވެ. " ޚައިރާދާ ދިމާއަށް އިނގިލި ދިއްކޮށްގެންހުރެ ފަރީދާ ހަޅޭއްލަވައިގަތެވެ.

ޚައިރާދުވެސް މިހާރު ފަރީދާއަށް ދޫކުރާނެ އަދަބުވެރިކަމެއް އޮތްކަމަކަށް ނުދެކެއެވެ. ދަރިއެއްގެ ފަރާތުން މަޔަކަށް އޮންނަންޖެހޭ އެ މަތިވެރި ޙައްޤު ، ފަރީދާވަނީ ، އަމިއްލަޔަށް ނިގުޅައިގަނެފައެވެ. އަޝްހަރު ނާންނަނިސް އެއިންތަނުން ހިރިވެސް ނުލާނެކަމުގައި ޚައިރާދު ބުންޏެވެ. އަދި ، ފަރީދާ ކުރަންބޭނުންވާކަމެއް ކުރާށޭ ބުނެ ޖަވާބު ދިނެވެ.

ފަރީދާ ބުންޏެވެ. " ހަނދާން ނެތުނީއެވެ. މަންމަޔާއި ދަރިފުޅާ ހަމަ އެއްގޮތެވެ. މަންމަ މުޅިޢުކުރު ހޭދަކުރީ ގޮތްދޫނުކުރުގެ ތެރޭގައެވެ. އަދި ، ދަމުން ދަމުން އެދިޔައީ އަހަރެންގެ އެންމެ އަގުހުރި މުދާ އަތުލައިގެންފައެވެ. އަހަރެންގެ ދަރިފުޅު އަހަރެންނާ ދުރުކޮށްލާފައެވެ. ތިޔައީ ، އެއަންހެންމީހާގެ ދަރިއެކެވެ. އަހަރެންގެ ދަރިފުޅަށް ޚައިރާދު ކިހާ ޚިދުމަތެއް ކޮށްދީފިން ދޯއެވެ. އެޚިދުމަތުގެ އަގު ހިފައިގެން ނޫނީ ޚައިރާދު ނުދާނެކަން އެނގެއެވެ. ނުދެވިގެން ތިއުޅޭ ސަބަބަކީ އެއީ ދޯއެވެ ؟ މައްސަލައެއް ނެތެވެ. މިއޮތީ އޭގެ ފުރިހަމަ އަގެވެ. ފުދި އިތުރުވާ ވަރަށެވެ. ނަގާށެވެ ! " ފަރީދާ އަތުގައި އޮތް ސިޓީއުރައެއް ޚައިރާދުގެ ކުރިމައްޗަށް އެއްލައިލަމުން ފަރީދާ ބުންޏެވެ.

ފަރީދާގެ އިންސާނިއްޔަތުކަމެއް އަމްދުންނެތް ބަސްތަކުން ޚައިރާދުގެ ހިތް ފޮތިފޮތި ވަމުން ދިޔައެވެ. ފަރީދާގެ ހިތް ނުބައީ ހަމައެކަނި އޭނާއަށް ނޫންކަން އެހިސާބުން ޚައިރާދަށް އެނގުނެވެ. އޭނާގެ މަންމަގެ މައްޗަށްވެސް ފަރީދާގެ ޙަސަދަވެރިކަން އެބަ އޮތެވެ. ފަރީދާގެ ހިތް ، މަންމަގެ މައްޗަށް ރަނގަޅެއްނޫނެވެ. ބޭނުންވީމާ ކުލަ ބަދަލުކޮށްލާ ބޯވައެއްފަދައެވެ. އެއީ ހާދަހާ މުނާފިޤު އިންސާނެކެވެ. ބޭރުފުށުން އެދައްކަނީ އެތެރެފުށުގައި އޮތް އެއްޗަކާ ހާސްބައި ތަފާތު ދަޅައެކެވެ. އެއީ އިންސާނެއްގެ ސިފައިގާ ހުރި ޙައިވާނަކަށްވެސް ނުފުދޭނެ ނަފްސެކެވެ. ޙައިވާނުންވެސް ، އެއަށް ﷲ ދެއްވާފައިވާ ބުއްދީގެ މިންވަރުން އެހާ އަނިޔާވެރިއެއް ނުވާނެއެވެ.

" ތި ސިޓީއުރައިގާ ، ޚައިރާދުގެ ދަތުރަށް ފުދޭމިންވަރަށް ފައިސާ ހުންނާނެއެވެ. ތިއިން ޙާލަތަށް ފަރުވާކޮށް ދިރިއުޅެވޭ މިންވަރަށް ޢަދަދު ޖަހާފައިވާ ޗެކެއްވެސް އޮންނާނެއެވެ. ދެން ، މިތަނުން ނުކުމެގެން ދާށެވެ ! " ފަރީދާ ބުންޏެވެ.

ޚައިރާދު ހިމޭނުން އިންތަން ފެނިފައި ، އަނެއްކާވެސް ފަރީދާ ހަޅޭއްލަވައިގަތެވެ. އަމިއްލަޔަށް ނުދާން އިނިއްޔާ ނޯކަރުންނަށް ގޮވަންވީ ހެއްޔެވެ. ހީވަނީ ނޯކަރުން ލައްވާ ތަޅާ މަރަމުން ގެއިން ނެރެލެވެން ބޭނުންވަނީ ހެންނެވެ.

" މަންމާއެވެ ! އަހަރެންނަށް ރަޙުން ކުރާށެވެ ! ﷲ އަށްޓަކައި އިންސާނިއްޔަތުކަމުގެ މަތިން ހަނދާން ކުރާށެވެ. ތިވެސް ﷲ ހެއްދެވި އިންސާނެކެވެ. އަންހެނެކެވެ. އަހަރެންނަކީވެސް އަންހެނެކެވެ. އެކަލާނގެ ހެއްދެވި މަޚުލޫޤެކެވެ. ތިޔަފަދަ އަނިޔާއެއް އަހަރެންނަށް ދޭތަން ، ﷲ ބައްލަވާ ވޮޑިގެން ވާނެއެވެ. ﷲ އަށް ބިރުވެތިވާށެވެ. އެކަލާނގެ ކޯފާއަށް ޖެހިލުން ވާށެވެ. ތިޔަފަދަ އަނިޔާއެއް އަހަރެންނަށް ތިދެނީ ، އަހަރެންނަށް ކޮން ކުށެއް ކުރެވިގެން ހެއްޔެވެ ؟ " ގިސްލާ ރޮމުން ޚައިރާދު ބުނަމުން ގެންދިޔައެވެ.

" ރޭގަނޑުގެ މިއޮއް ދަންވަރު އަހަރެންދާނީ ކޮންތާކަށް ހެއްޔެވެ ؟ އަޝްހަރު އަންނަންދެން އަހަރެން މިތާ މަޑުކޮށްލިޔަދޭށެވެ. އަހަރެން މިހުރީ މިރޭ ޢިޝާނަމާދުވެސް ނުކޮށެވެ. ނަމާދުގެ ފަރުޟު އަދާކުރެވޭނީވެސް ކޮޓަރިޔަށް ގޮސް ވުޟޫ ކޮށްލައިގެންނެވެ. އަހަރެންނަށް ތިހެން ނުހަދާށެވެ ! " ޚައިރާދު ، ފަރީދާއަށް އާދޭސް ކުރަމުން ގެންދިޔައެވެ.

ފަރީދާގެ ހިތުގެ ހަރުކަށިކަމަށް ޚައިރާދުގެ އާދޭހުން ކުރި ފައިދާއެއް ނެތެވެ. ޚައިރާދުގެ މުޑުދާރު އަނގައިން އޭނާގެ ދަރިފުޅުގެ ނަން ކިޔުން ހުއްޓާލާށޭ ބުނެ ، ފަރީދާ އިތުރަށް ހަޅޭއްލަވައިގަތެވެ. އަދި ، އަޝްހަރު މިތާހުރިނަމަވެސް ޚައިރާދަށް ހަދާނީ މިގޮތަށްކަމުގައި ޚައިރާދާ ދިމާއަށް ބުންޏެވެ. ރޭގަނޑުގެ އެއޮށްދަންވަރު ގަޑީގައި އޭނާ ދާނީ ކޮންތާކަށްތޯ ރޮމުންރޮމުން ޚައިރާދު ސުއާލުކުރިއެވެ. ޚައިރާދުގެ ހަލާކުވެ ފޮތިފޮތިވަމުންދާ ހިތަށް އެވަގުތު އައީ ކީރިތި ޤުރުއާނުގެ އައްނަޙުލު ސޫރަތުގެ 90 ވަނަ އާޔަތެވެ.

ކީރިތި ﷲ ، އެކަލާނގެ ޒާތުފުޅަށް އަނިޔާވެރިވުން ވަނީ މަނާ ކުރައްވާފައެވެ. އެކަލާނގެ ޚަލްޤު ކުރެއްވި މަޚުލޫޤުން އެކަކު އަނެކަކަށް އަނިޔާވެރިވާހިނދު ، އަނިޔާވެރިޔާއަށް އެހުރެވެނީ .  އިންސާނާ އުފަންކުރައްވައި ، މިދުނިޔެމައްޗަށް ފޮނުއްވުމުގެ މަޤްޞަދުން ބޭރުގައެވެ. ކީރިތި ޤުރުއާނުގެ މޫރިތި އާޔަތްތަކުން ، އައްނަޙްލު ސޫރަތުގެ 90 ވަނައާޔަތުގައި ﷲ ތަޢާލާ ވަޙީކުރައްވާފައިވާ ބަސްފުޅު ، އިންސާނާގެ ހަނދާނުން ފުހެވިއްޖެނަމަ ، އެއިންސާނާ އެވަނީ ﷲ ދެއްކެވިމަގުން އެއްކިބާވެ ، އެންގެވިމަގާ ޚިލާފުވެފައެވެ. އެހިނދު އެއިންސާނާ އެވަނީ ، ﷲ ގެ ކޯފާއަށް ، އަމިއްލަޔަށް ހުށަހެޅިގެންފައެވެ. އެކަމުގެ ޢަޒާބު އޭނާގެ އަމިއްލަ ނަފުސަށް ޙައްޤުކަށަވަރު ކޮށްގެންނެވެ.

ކީރިތި ޤުރުއާނުގެ އައްނަޙްލު ސޫރަތުގެ 90 ވަނައާޔަތުގައި ﷲ ތަޢާލާ ވަޙީކުރައްވާފައިވާ ބަސްފުޅުގެ މާނައިގާ ވެއެވެ.

" ހަމަކަށަވަރުން ، ޢަދްލުވެރިވުމަށާއި ، އިޙްސާންތެރިވުމަށާއި ، ގާތްތިމާގެމީހުންނަށް ހެޔޮފޯރުވުމަށް ، ﷲ އަމުރު ކުރައްވަތެވެ. އަދި ، ހުތުރުކަންބޮޑުވެގެންވާ ފާފަތަކާއި ، މުންކަރާތްތަކާއި އަނިޔާވެރިވެއުޅުން ، އެކަލާނގެ ނަހީކުރައްވަތެވެ. އެކަލާނގެ ތިޔަބައިމީހުންނަށް ވަޢުޒު އިއްވަވަނީ ، ތިޔަބައިމީހުން ހަނދުމަކުރުމަށްޓަކައެވެ. "

ކުރާނީ ކިޔެއް ހެއްޔެވެ ؟ ބައެއް އިންސާނުންނަކީ ދުނިޔެ ބޭނުންވާހިނދު ، ހެޔޮޢަމަލުގެ މަތިން ހަނދުމަނެތި ، ކުށަށް އަރައިގަތުމަށް ފަސްޖެހޭ ބައެއްނޫނެވެ. ﷲ ޙަރާމް ކުރައްވާފައިވާ ކަމެއްނަމަވެސް ، އެބައިމީހުންގެ ދުނިޔަވީ އެދުންތަކަށްޓަކައި ނުކޮށް ދޫކޮށެއް ނުލާނެތެވެ. ދުނިޔެމަތީގައި އެކަމުގެ ކޯފާއާއި ޢަޒާބުން އެމީހުން ނިކަމެތި ކުރެއްވުމަކީ ، ﷲ އަށް ކުޅަދުންވަންތަ ކަމެއްކަމެއް އެމީހުން ނުދަންނާނެތެވެ. ފަރީދާއަށް އެއްޗެއް ހަނދާންކޮށްދީގެން ކުރާނެ ފައިދާއެއް އޮންނާނެކަމަކަށް ޚައިރާދަކަށް ނުފެނުނެވެ. އެއަށްވުރެ ބޮޑަށް ފަރީދާ އެހުރީ އަނިޔާވެރިކަން އިސްކޮށްގެންނެވެ. ނިކަމެތި އަންހެނުންނަށް އެހީވާ އެންޖީއޯއެއް ހިންގާ އަންހެނަކު އެހާ ދަށުދަރަޖަޔަކަށް ވެއްޓިދާނެކަމަކަށް އެއްވެސް އިންސާނަކަށް ޤަބޫލެއް ނުކުރެވޭނެއެވެ.

ފަރީދާ އެވަނީ އޭނާގެ ބޮލަށް ސަވާރުވެ ، ދީވަލްޕާއެއްހެން ، ކޮނޑަށް އަރާއިން ޝައިޠާނާގެ ވަސްވާސްތަކުން މަގުއޮޅިފައެވެ. އޭނާގެ ޢަމަލުތައް ﷲ ބައްލަވާ ވޮޑިގެންވާކަން ހަނދާން ނެތިފައެވެ. ހިތެއްއޮތް އިންސާނަކަށް ދޭންނުކެރޭފަދަ ، އެއްވެސް މިންވަރެއްގެ އިންސާނިއްޔަތު ކަމެއްނެތް އަނިޔާވެރިކަމަކަށް ފެންބޮވައިގެންފައެވެ.  ދުނިޔެ ރަންވެފައެވެ. އޭނާ ދާނީ ކޮންތާކަށްތޯ އަހައި ޚައިރާދު ކުރި ސުއާލަށް ފަރީދާ ދިނީ ވަރަށް ހަރުކަށި ޖަވާބެކެވެ.

" ނަރަކަޔަށް ދާށެވެ ! އެންމެ ރެޔެއް ކީއްކުރަން ހެއްޔެވެ ؟ ޚައިރާދު އެންމެ މިނިޓަކުވެސް އަހަރެންގެ ގޭގައި ހުއްޓަކަ ނުދޭނަމެވެ. އަހަރެންގެ ގެ ، ޚައިރާދު ބަރުބާދު ކޮށްފީމުއެވެ. ހަމަމިހާރު ތެދުވެގެން ނުކުމެގެން ދާށެވެ ! " ފަރީދާ އަނެއްކާވެސް ހަޅޭއްލަވައިގަތެވެ. އަދި އެނބުރިގެޔަށް ވަންނަން ހިނގައިގަތެވެ.

ފަރީދާ ހިނގައިގަތްތަނާ އޭނާގެ ފަހަތުން ޚައިރާދު ދުއްވައިގަތެވެ. އެހެންނަމަވެސް ، ޚައިރާދަށް ދޮރާހަމަޔަށް ނުދެވެނިސް ފަރީދާ ، ދޮރުލައްޕައި ތަޅުލިއެވެ. މަންމާއޭ ތިހެން ނުހަދާށޭ ، ދޮރުހުޅުވައިދޭށޭ ބުނެ އަޑުގެ ނެތްތަނަށް ޚައިރާދު ގޮވަމުން ގެންދިޔައެވެ. ރޮމުންރޮމުންގޮސް ، ދޮރުބުޑަށް ޚައިރާދު ތިރިވިއެވެ. ހިތުގައި އަޅާ ވޭނާއި ކެކުޅުމުން އޭނާގެ އުއްމީދުތައް ފަނާވެގެންދިޔައެވެ. އެތައްއިރަކު ގިސްލާ ރޯން އިނުމަށްފަހު ، ޚައިރާދު ކޮޅަށް ތެދުވިއެވެ. އަދި އޭނާގެ ނޭފަތުކުރި ހުރިދިމާއަށް ހިނގައިގަތެވެ. ކުރިމަތީގައިވަނީ ބިރުވެރިކަމާއި ނާމާންކަމުން ފުރިގެންވާ ހަމަހިމޭން އަނދިރިކަމެވެ.

ފަނިފަކުސައިގެ އަޑުނޫން އެހެން އަޑެއް ނީވެއެވެ. މަގުގެ ދެފަރާތުގައިވާ ކާނުތެރެއިން ބޮށްގޮވާއަޑު އިވެއެވެ. އެއްވެސް އިންސާނެއްގެ ހިލަމެއްވެސް ނެތެވެ. ތަންކޮޅަކަށް ހިނގައިލި ތަނާ ހަށިގަނޑުން ވާގިދޫވެ ބިންމައްޗަށް ވެއްޓުނެވެ. އެދުވަހުގެ ހެނދުނު އަރުތެރެޔަށްލީ ކުޑަ ޕާންކޮޅެއް ފިޔަވައި އޭނާގެ އަރުތެރެޔަށް އިތުރު އެއްޗެއް ނުލައެވެ. ފެންފޮދެއްވެސް ބޯނުލައެވެ. އޭނާ މަޑުކޮށްގެންހުރީ އަޝްހަރު އެރޭ އައިމަ އަޝްހަރުގާތު އޭނާ ބަލިވެއިންކަމުގެ އުފާވެރި ޚަބަރު އިއްވާލާފަ ، އަޝްހަރާއެކު ރޭގަނޑު ރަނގަޅަށް ކެއުމަށެވެ. ބަނޑުހައިވިޔަސް ، ކެތްތެރިކަމެއްނެތި ، ޚައިރާދު އިންތިޒާރުކުރަމުން ގެންދިޔައީ އެއުފާވެރި ވަގުތަށެވެ. ވާގިދޫވެގެން މަގުމައްޗަށް ވެއްޓުމާއެކު ، ޚައިރާދުގެ މޫނުމައްޗަށް އެނބުރުން އެރިއެވެ. އެވަގުތު ، އޭނާއަށް ، އޭނާގެ އަޝްހަރުގެ ލޯބި އަޑު އިވުނެވެ.

" ޚައިރާދެވެ ! ތިއީ ވަރަށް ނާޒުކު ކުއްޖެކެވެ. އަހަރެން ޚައިރާދުދެކެ އިންތިހާއަށް ލޯބިވަމެވެ. ޚައިރާދަކީ  އަހަރެންނަށް ޚާއްޞަ އަދި ވަރަށް މުހިންމު އިންސާނެކެވެ. އެކަން އަބަދުވެސް ހަނދާނުގައި ބަހައްޓައްޗެވެ."

އަޝްހަރު އަދިވެސް ހުރީ އަތިރިމަތީގައި ހަދާނެގޮތް ބޮޑުވެފައެވެ. ޤަބޫލުކުރާނީ ކާކުގެ ބަހެއްކަމެއް އޭނާއަކަށް ނޭނގެއެވެ. އޭނާއަށް ހަމައެކަނި ކުރެވޭ އިޙްސާސަކީ ، އޭނާގެ މަންމަ ، ޚައިރާދަށް ނުދޭންވާވަރަށް އަނިޔާވެރިވި ކަމުގެ އިޙްސާސެވެ. ޚައިރާދު ކޮންމެކަމެއް ކުރިނަމަވެސް ، އެވަރަށް ޚައިރާދަށް އަނިޔާކޮށްގެން ނުވާނެކަމުގެ އިޙްސާސެވެ. މަންމަ ޚާއިރާދާ ދިމާއަށް ގޮވި ހުތުރު އެއްޗެހި އެއްފަރާތް ކުރަމާ ހިނގާށެވެ. އެންމެންގެ ކުރިމަތީ ، އަތުގައި ހުރިބާރެއްލައި މޫނުމަތީ ޖަހައި އަނގަމަތިން ލޭ ހިލުވާލައި ، ޚައިރާދު ބިންމައްޗަށް ވައްޓާލުން އެއީ ވަރަށްބޮޑު އަނިޔާއެކެވެ. މީހުންނަށް މީހުން އަނިޔާކުރާތަން އަޝްހަރަށްވެސް ފެނިފައި ވެއެވެ. އެކަމަކު ، އެވަރުގެކަމެއް ، އަޝްހަރުގެ މުޅި ޙަޔާތުގައިވެސް އޭނާގެ ލޯމަތީ ފެނިފައެއް ނުވެއެވެ.

" އަހަރެންނަށް އަޝްހަރާނުލާ ނޭވައެއް ނުލެވެއެވެ. އަޝްހަރާ ނުލައި އަހަރެންގެ ދުނިޔެއެއް ނެތެވެ. ކެތްތެރިކަމެއްނެތި އަހަރެން ، އަޝްހަރަށް އެބަ އިންތިޒާރު ކުރަމެވެ. އަހަރެންނާ އެހާދުރަށް ، އަޝްހަރު ދިޔައީ ކީއްވެ ހެއްޔެވެ ؟ އަހަރެންގެ ކުށަކީ ކޮބައި ހެއްޔެވެ ؟ އެވަރު ބުނެލަދީބަލާށެވެ ! "

އަޝްހަރުގެ ކަންފަތަށް ޚައިރާދުގެ އެބަސްތަކުގެ އަޑު އިވިގެންދިޔައެވެ. އޭނާ އަދިވެސްހުރީ އަތިރިމަތީގައެވެ. ވާއެއް ނުވާއެއް ނޭނގޭ ޙާލުގައި ހަދާނެ ނުހަދާނެގޮތެއް ނޭނގި ސިކުނޑި ހާސްވެފައެވެ. ހިތުގައި އަޅަމުންދާ ވޭނަށް ކިރިޔާވެސް ތަސައްލީއެއް ލިބެނީ ، ކަނޑުގެ ރާޅުތަކުގައި ބީހިލަމުން ގޮނޑުދޮށާ ސަލާމްކޮށް އޭނާއާ ހިސާބަށް އެއަންނަ ތާޒާ ވައިރޯޅިންނެވެ. ވަށައިގެންވާ އަނދިރިކަމުގައި ކައިވަތެއްގެ ދުރުމިންވެސް ނުފެނެއެވެ. އަޝްހަރު އެރޭ ގެޔަށް އަޔަނުދޭން ކުރަންޖެހޭ ކަންކަން ކުރުމަށް ، ފަރީދާ ފޮނުވައިގެން އެތަނަށްގޮސްހުރި ކައިސަރުގެ ހިލަމެއްވެސް ނުވެއެވެ. ކަކުލުން ވާގިދޫވެ ، އަޝްހަރު ދެކަކޫމައްޗަށް ތިރިވިއެވެ. އޭނާގެ ލޮލުން ކަރުނަނުހިކި އެތައް އިރެއްވަންދެން ހޯސްލާފައި ، ފައިބަމުން ދިޔައެވެ. ހަމައެއާއެކު ، ޚައިރާދަށް އަނިޔާލިބެމުންދިޔައިރު ، ކައިސަރު ބުނި ވާހަކަތައްވެސް އަޝްހަރުގެ ކަންފަތުގައި ގުގުމަމުން ދިޔައެވެ.

" ޚައިރާދެވެ ! މިމީހުން ، ޚައިރާދާމެދު ވަރަށް އަނިޔާވެރި ވެއްޖެއެވެ. ޚައިރާދުގެ ކައިވެނި ކުރެވުނީ ޚައިރާދު އެދިގެންނެއް ނޫނެވެ. ޚައިރާދުގެ ވިސްނުމާއި ފިކުރު މިމީހުންނަކާ ނުގުޅެއެވެ. އަހަރެމެން ދެމީހުން ޙިއްޞާކޮށް ދައްކަމުންދިޔަ ވާހަކަތަކަކީ ، މިމީހުންނާ ޙިއްޞާކޮށް ،  ޚައިރާދަށް ދެއްކޭނެ ވާހަކަތަކެއްނޫނެވެ. ﷲ އަށްޓަކައި ބުނަމެވެ. މިމީހުންދެކެ ބިރުނުގަނެ ، އަހަރެމެންގެ ލޯބި އަހަރެމެންގެ ހިތުގައި އޮތަދޭށެވެ. " އެއީ ކައިސަރު ، އެވަގުތު ބުނިވާހަކައެވެ.

ޚައިރާދުގެ ބޯކޮޅުބަލަމުން ، ސިއްރުސިއްރުން ، އެގޭ ނޯކަރު ޖަމާލް ދިޔައެވެ. އޭނާހުރީ ބިރުން ނުކުންނަން ނުކެރި ފިލައެވެ. ޚައިރާދު ގެއިން ނުކުތުމުންވެސް ޚައިރާދުގެ ފަހަތުން ޖަމާލް އައެވެ. ޚައިރާދު ބިންމައްޗަށް ވެއްޓުމާއެކު ޖަމާލް އައިސް ، ޚައިރާދު ނަގަން މަސައްކަތް ކުރިއެވެ.

" ދައްތާއެވެ ! ކޮންމެވެސް ގޮތަކުން ދައްތަ މިތަނުން ސަލާމަތް ވެގެން ދާށެވެ ! ދައްތަ މިތަނުގައި މަޑުކުރުމަކީ ވަރަށް ނުރައްކާ ކަމެކެވެ. ދައްތަޔާ ވާހަކަ ދެއްކުންވެސް އަހަރެމެންނަށް އޮތީ މަނާކޮށްފައެވެ. " ޖަމާލް ބުންޏެވެ.

ޚައިރާދު ޖަމާލަށް ގޮވައިލިއެވެ. އަދި އޭނާއަށް ކަމެއް ކޮށްދީފާނަންހޭ އަހައި ،  ގަލަމަކާ ކަރުދާސްގަނޑެއް ގެނެސްދޭން އެދުނެވެ. ޖަމާލް ދެކޮޅު ބަލާފައި ދުވެގޮސް ކަރުދާސް ގަނޑަކާއި ގަލަމެއް ގެނެސް ޚައިރާދު އަތަށް ދިނެވެ. އަދި އަވަސްކޮށްލުމަށް އެދުނެވެ. ޚައިރާދު އަވަސްކޮށްލާފައި އަޝްހަރަށް އޭނާ ދޭންބޭނުންވާ މެސެޖް ލިޔެ ޖަމާލްއަތަށް ދިނެވެ. އަދި އެ ކަރުދާސްގަނޑު އަޝްހަރާ ޙަވާލުކޮށްލަ ދިނުން އެދި ޖަމާލުގެ ކިބައިން އާދޭހާއެކު އެދުނެވެ. އޭގައި ހިފަމުން ޖަމާލަށް އެކުރެވެނީ ބޮޑުކުށެއްނަމަވެސް ، އެކަން ކޮށްދޭނެކަމަށް ޖަމާލް ބުންޏެވެ.

ޚައިރާދު ، ނެތްހިތްވަރުލާފައި ކޮޅަށް ތެދުވެ އެ އަނދިރިމަގުން ކުރިޔަށް ހިނގައިގަތެވެ. އެމަންޒަރު ބަލަން ، ހިތަށް އުނދަގޫވެފައި ޖަމާލް އިރުކޮޅަކު ހުއްޓެވެ. އެކަމަކު ، މާގިނައިރު ހުންނާކަށް އޭނާއަކަށް ނުކެރުނެވެ. މީހަކަށް ފެނިއްޖިއްޔާ އޭނާގެ ދުވަސް ދާނެއެވެ. އެކަމަކުވެސް ، ހިތްވަރުކޮށްފައި ، އަނދިރިގަނޑުގެ ތެރެޔަށް ގޮސް ޚައިރާދު ގެއްލެންދެން އޭނާއަށް ހުރެވުނެވެ.

(ނުނިމޭ)