(2 އޭޕްރީލް 2023 ގައި ޝާއިއުކުރި ބަޔާ ގުޅޭ)
ކަނޑާ ދުރުގައި އެއްގަމުން ބިމުގެ ވަކިހިސާބެއްގައި ، މަލާއިކަތްބޭކަލުންގެ އެހީފުޅާއެކު ، ނޫޙުގެފާނަށް ﷲ އެންގެވި ގޮތުގެމަތިން ، ނާކޮޅު ބަންނަވަން ފެށްޓެވިއެވެ. އެކަލޭގެފާނުގެ ޤައުމުގެ މީސްތަކުންގެ އުނދަގުލާއި މާލާމާތާއެކުވެސް ، ނާކޮޅު ބަނދެ ފުރިހަމަކުރެއްވުމުގެ މަސައްކަތް މެދުނުކެނޑި ކުރެއްވިއެވެ. އެމީހުން ބުނެ އުޅުނޫއެވެ.
" އޭ ނޫޙެވެ ! ރަސޫލުކަމަށްވުރެ ، ކިއްސަރުވަޑާމުގެ އަގުއެރީ ހެއްޔެވެ ؟ ކަނޑާ އެހާ ދުރުގައި ބިންމަތީގައި ތި ނާބަންނަނީ ކީއްކުރަން ހެއްޔެވެ. އެކަމުގެ މަޤަޞަދަކީ ކޮބައި ހެއްޔެވެ ؟ ތި އުޅަނދު ވަޔާ ، ކަނޑަށް ގެންދާނީ ހެއްޔެވެ ؟ ނުވަތަ ، ދަމާ ކާއްތާފައި ގެންދެވޭ އެއްޗެއްގެ ގޮތުގައި ތި އުޅަނދު ވަނީ ހެއްޔެވެ ؟ އެކަލޭގެފާނުގެ ޤައުމުގެ މީހުންނަށް ވިދާޅުވިއެވެ. ލަދުވެތިވުމާއެކު އަނިޔާލިބިގެންދަނީ ކޮންބަޔަކަށްކަން ، ނިކަންހުރެ ތިޔަބައިމީހުންނަށް އެނގޭހުށިކަމެވެ.
ނޫޙުގެފާނުގެ ގެކޮޅުގައިހުރި އުނދުނަށް އުދާފަހުރި ކަންވާރުގެ ފެން ކެކި ބަންޑުންވާން ފެށީމަ ، އީމާންވީ މީސްތަކުންނައިގެން ، ނަވަށް އަރައިވަޑައިގަތުމަށް ، ﷲ ، އެކަލޭގެފާނަށް އެންގެވިއެވެ. އެ ނިޝާނަކީ ، ނޫޙުގެފާނުގެ ޤައުމުގެ މީސްތަކުންކުރެ ، ﷲ އަށް އީމާންނުވި މީސްތަކުން ނެތި ފަނާކުރެއްވުމަށްޓަކައި ، ފެނުގެ ތޫފާނެއް އައުމުގެ ފުރަތަމަ ޢަލާމާތެވެ. މާގިނައިރުތަކެއް ނުވެއެވެ. އެކަލޭގެފާނުގެ ގެކޮޅުގެ އުނދުނަށް އުދާފައިހުރި ފެންއެތި ބަންޑުންވާން ފެށިއެވެ. އެނުރައްކާތެރި ޤުދްރަތީ ކާރިސާއާ ، ނޫޙުގެފާނުގެ ޤައުމުގެ މީހުންނާ ކުރިމަތިލާން ޖެހުނެވެ. ނޫޙުގެފާނަށް ތަބާވީ މީހުންނާއެކު ، ނާކޮޅަށް އަރައިވަޑައިގަތީ ، ދުނިޔޭގައި ލެއްވި ކޮންމެ އެއްޗަކުން ޖޯޑެއް ހަމަކުރައްވައިގެންނެވެ. ޖަނަވާރާއި ދޫންޏާ އަދި ފަނިފަކުސަޔަށް ދާނދެނެވެ. އެކަލޭގެފާނުގެ ޢަމަލުފުޅުތަކަށް ބަލަހައްޓައިގެން ތިބި މީސްތަކުން ބުނޫއެވެ. " ނޫޙު އެހުރީ މޮޔަވެފައެވެ. އެޖަނަވާރުންނަށް އޭނާ ހަދާނީ ކިހިނެއް ހެއްޔެވެ ؟
މާގިނައިރުތަކެއްނުވެ ، އުޑުމަތި ބަނަކޮށްލައި ، ގަދަފަދަ ވާރެޔަކުން ބިމުގައި ފެންބޮޑުވިއެވެ. އިސާހިތަކު ، ކަނޑުގެ ލޮނުގަނޑާ ހަމަޔަށް ބިމަށް އޮހުނު ވާރޭ އަރާ ފެންބޮޑުވެ ، ބިން ފޮރުވި ، ފެނުގެ އަޑިޔަށް ދިޔައެވެ. ހިކި ހަނަފަސް ސަހަރާގެ ބިންތައް ފުރަތަމަ ފަހަރަށް ފެނުގެ އަޑިޔަށް ގޮސް ގެއްލުނެވެ. އެކަލޭގެފާނުގެ ޤައުމުގެ މީސްތަކުންނަށް ކުރިމަތިވި ނުރައްކާތެރި ކޯފާއާއި ޢަޒާބު ، އެކަލޭގެފާނުގެ ލޯފުޅުން ދެކެވަޑައިގެން ، އެކަމަށް ހެކިވެވަޑައިގެންނެވިއެވެ. އީމާންނުވެ ކާފަރުވީ މީހުންކުރެ އެކަކުވެސް ސަލާމަތް ނުވާނެކަން ، ނޫޙުގެފާނަށް އެނގިވަޑައިގަންނަވައެވެ. ނާކޮޅަށް އަރާވަޑައިގެންނެވުމަށް ދެކޮޅުހެދިމީހުންގެ ތެރޭގައި . އެކަލޭގެފާނުގެ ފިރިހެންދަރިކަލުންނާއި އަނބިކަނބަލުންވެސް ހިމެނެއެވެ.
ނޫޙުގެފާނު ، އެކަލޭގެފާނުގެ ދަރިކަލުންނަށް ، އާދޭސްކުރައްވައި ވިދާޅުވަމުން ގެންދެވިއެވެ.
" ކާފަރުވީ މީހުންގެ ތެރޭގައި ދަރިފުޅު ނުވެ ، މިނަވަށް އަރާށެވެ ! "
" އަހުރެން ، އެހެރަ ފެންނަ އުސް ފަރުބަދަޔަށް އަރާނަމެވެ. އޭރުން ، މިފެނުގެ މުޞީބާތުން ސަލާމަތްކަން ލިބޭނެއެވެ. "
ނޫޙޫގެފާނު ވިދާޅުވިއެވެ. " ﷲ ފިޔަވައި އެހެންފަރާތަކުން މިއަދު ، ސަލާމަތްކަމެއް ލިބުމެއްނެތެވެ. އެކަލާނގެ ރުއްސަވާ ވޮޑިގެންވީ އަޅަކަށް މެނުވީއެވެ. "
ގިނައިރުތަކެއްނުވެ ، ބިންމަތި ނުރައްކާކުރަމުންގެންދިޔަ ބިޔަރާޅުތަކުގެ ދަށުގައިވެ ، ނޫޙުގެފާނުގެ ދަރިކަލުން ޣަރަޤުވެގެންދިޔައެވެ. އަލުން އައުމެއްނެތް ފަނާވަނިވި ގޮތެއްގައެވެ.
އީމާންވީ އެންމެހައި މީސްތަކުން ، ނޫޙޫގެފާނުގެ ނާކޮޅަށް އަރައި ނިމުނު ހިނދު ، ފެންގަނޑު ބޮއިލައި ހިންދައިލުމަށް ﷲ ސުބްޙާނަހޫ ވަތަޢާލާ ، ބިމަށް އަމުރުކުރެއްވިއެވެ. އަދި އުޑުން ވެހެމުންދިޔަ ބޯވާރޭ ހިފެހެއްޓުމަށް އުޑަށް އަމުރު ކުރެއްވިއެވެ. އުޑުމަތީގައިވާ ބޯވިލާތައް ނެތިގޮސް އުޑުމަތިސާފުވެ ، އިރުގެ އަލިކަން ދުނިޔެއަށް ލިބުނެވެ.
(ނުނިމޭ)
