ދުނިޔޭގެ މެދު އުޑަށް އުފުލޭ ހަމަ ކޮންމެ ވިލާގަނޑަކީ ، ވިލާގަނޑެއްގެ ހުރިހާ ބޭނުމެއް ފުދޭ އެއްޗެއްނޫނެވެ. ހަތަރު ބިތުން ބިމަށް ފެންވެހެމުންދާ އިރުވެސް ، މެދުއުޑުގައި ވާރޭވެހޭނެ ފެންފޮދެއް ނުއުފެދި ވިލާތަކެއް ހުރުމަކީ ، ޙައިރާންވާންވީ ކަމެއްނޫނެވެ. ދުނިޔެ ލިބި އޮތަސް ، މުއްސަނދިކަމުގެ މިނެއް ނެތަސް ، ﷲ ނުދެއްވާ އެއްޗެއް އަތުގައި ނެތަސް ، މިޒަމާނުގެ ސައިންސުގެ އެހީހޯދައިގެންވިޔަސް ، ދިމަދިމާލުން ބާކީވާ އެތައް އެޑްވައިޒަރުންނެއްލައިގެން ، ކިތަންމެ މަތިހަށިނަގާފައި ނުކުތަސް ، ފެންއުފެދި ، ދުނިޔެއަށް ލައްވާ ރަޙުމަތެއްގެ ގޮތުގައި ވާރޭވެހިދާނެ ވިލާ ގަނޑެއް ނުއުފެއްދޭނެއެވެ.
ވިލާގަނޑުން ވާރޭ ވެއްސަން އުޅުން އެއީ ، މީހުން ކުރިމަތިނުލާކަމެއްނޫނެވެ. އެއީ ، ބޮޑެތި ޤައުމުތަކުން އަދި ބޮޑެތި މަހުޖަނުން ، އެތައްފަހަރަކު ކުރިމަތިލައިގެންވެސް ފެއިލްވެ ، ދުނިޔެއަށް ފަޟީޙަތްވެފައިވާ ކަމެކެވެ. ޖީބުން އެތައް މިލިއަން ރުފިޔާއެއް ގެއްލި ، އެ ގެއްލުމުގެ ބަދަލު ހޯދަން ، ދުނިޔޭގެ ފިތުރަތުގެ ނިޒާމާ ހަނގުރާމަ ކުރަން އޮތީ މަޖުބޫރުވެފައެވެ. އެތައްބައެއްގެ ފައިބުޑަށް ވެއްޓެން މަޖުބޫރުވެއެވެ. އަދި އާދޭހުގެ އަޑުއަހައި ކިޔަމަންކުރުވާފައި ، ތިންހަތްދުވަސް ނުވަނިސް ، ސައްޕެއްޖަހައި ، ކޮންމެ ފަހަރަކު ބޭރުކޮށްލިޔަސް ، ވިލާގަނޑުން ފެން އާދޭތޯ ކުރާ މަސައްކަތް ބައެއްމީހުން ހުއްޓައެއް ނުލައެވެ. އެކި ދިމަދިމާލުން އެކިސަބަބާހުރެ ބާކީވާ މީހުން ، މާމޮޅުބައެއްކަމަށް ފެނި ދެއެވެ. އެބައިމީހުން ކާނެވަރަކަށް ބޯކައިލާން ދޫދެވެއެވެ. ޅޮސް އުނދޯއްޔަށް ލައިގެން އެބައިމީހުންނަށް މޮޅުވާ ގޮތަށް ، އެ އުނދޯލި ހައްލައިގަނެއެވެ. ބޯއަނބުރައިގަނެގެންގޮސް ، އެކަން ނޭނގިހުރެ ، ހޮޑުލެވޭ ވަރަށެވެ. ނުއަތަށް އެނބުރޭ ބުރުމާއެއްގެ ކޮށިކަށްޓެންހެން ދެބުރިޔަށް ބިންދައިގެންގޮސް ބުރުމާ ހަލާކުވާ ވަރަށެވެ. ތަޤްދީރުގެ ނިޔާއާ ކުޅެލުމަށް ކުރާ ތަދުބީރު ، މިހާތަނަށް ޗޮކުންގޮސްފައި އޮތީ ކިތައްފަހަރު ކަމެއްވެސް ނޭނގެއެވެ.
އެތައްފަހަރަކު ، ޝަރުޢީ މަރުޙަލާއިން ގޮތެއްވޭތޯ ހޭދަކޮށް ، ޗޮކުން ދާނެއެވެ. އަނެއްބައި ފަހަރަށް ، ޤާނޫނީ އެންމެ މަތީ ތަޚުތަށް އަރައި ، ބޭނުންވާ ގޮތެއް ނުހެދިގެން އުޅެނިކޮށް ، އެތަނުން ބާލާނެއެވެ. ލިބިހުރި ބާރުތަކުގެ ބޭނުންކޮށް ، ހަމައެއް ލަމައެއް ނުބަލައި ، ހަރުމުދަލާއި ބިމާ ، ފަޅާއި ޤުދްރަތީ ވަޞީލަތްތައް އެއްކުރަމުން ، އޭގެމައްޗަށް ވެރިވެގަންނާނެއެވެ. ކޮންމެ ފަސް އަހަރަކުން އޭގެ ޕެކެޖެއް ހޯދާނެއެވެ. އެހުރިހާ އެއްޗެއް އެއްކޮށް ޚަޒާނާކޮށް ، ދުނިޔޭގެ އެންމެ މުއްސަނދިމީހާކަމަށް ދަޢުވާކޮށް ، ދިރިތިބިމީހުން ، ނަމްރޫދާއި ޤާރޫނުގެ މަތިން ހަނދާން ކުރަން މަޖުބޫރު ކުރުވާނެއެވެ. ދުނިޔެ ބޭނުންވެގެން ދުވާމީހުންނަށް ، އެނބުރެމުން ސެނބުރެމުންގޮސް ، ފުޅޮއިތެރެޔަށް ވަދެވޭ ހިނދު ، ލަނޑަޔާ ވާނީ ލަނޑަޔާއޭ ބުނެ އަތުގައި ހިފާ ކައިރި ކުރާނެއެވެ. އޮއެ ބަދަލުވާ ހިނދު ، ލަނޑުދީފައި ދުއްވައިގަތީމާ ، އެތިވަރު ގޮވައި ، އެއީ ހައްތާވެސް ، ދުނިޔެ ބޭނުންވެގެން އުޅޭ މީހުންނޭ ބުނެ އެކަމުން ރެކޭނެއެވެ. އެމީހުންނާ ގާތް ނުވުމަށް އެހެންމީހުންނަށް ނަޞޭޙަތްތެރި ވާނެއެވެ. އަނެއްކާވެސް ، އަނެއް ފަސްއަހަރު ކައިރިވާހިނދު ، ހިތުގައި އޮންނަ އެދުމެއްގެ ބާރުގައި ، ފެއިލްވެފައި ތިބޭ މީހުންނާ އެއްކޮޅުވެ ، ވިލާއިން ވާރޭ ވެއްސޭތޯ ބަލާނެއެވެ.
ކައިރީގައި ތިބޭ ތަންދޮރު ދަންނަމީހުން ، ޙައިވާނު ބަގީޗާއެއްގައި އުޅޭކަށް ބޭނުމެއްނެތޭ ބުނެ ، އެތަނުން ނުކުމެގެން ދާނެއެވެ. ތަހުޒީބީ ދުނިޔޭގެ އާޖުފާޖު ނޭނގި ، ބޮލުރޮދި ކެނޑި ، ދުނިޔޭގެ އެދުމަށް ހޭބުއްދި ފިލާފައިތިބޭ ބައެއްގެ ތެރޭގައި އުޅެވޭނީ ވަކިބާވަތެއްގެ ބަޔަކަށެވެ. އެބަޔަކު ލައްވާ ވިލާއިން ވާރޭވެއްސަން ކިތަންމެ މަސައްކަތެއް ކުރިނަމަވެސް ، އެކަމެއް ނުވާނެއެވެ. ގައިން ހަމެއްގޮސް ، މީސްތަކުންގެ ބަދު ދުޢާ ލިބި ، ޖީބު ހުސްވެ ، ފިތުނަ ފަސާދައިން އެބައެއްގެ ޢަމަލުތައް ތަޣައްޔަރުވެފައިވާ ، މިންވަރަށް އީމާންނުވާ ބައެއްގެ ތެރޭގައި ﷲ ގެ ރަޙުމަތެއް ނުވާނެއެވެ. ވާރޭ ވެހުމަކީ ، އިންސާނިއްޔަތަށް ، ﷲ މިންވަރުކުރައްވާ ރަޙުމަތެކެވެ. ކޮންމެ ވިލާ ގަނޑަކުން ، ރަޙުމަތުގެ ވާރޭއެއް ނުވެއްސަވާނެއެވެ.
