ފީފާ ވޯލްޑް ކަޕް ގްރޫޕް އެފް ގައި މިއަދު ކްރޮއޭޝިއާ އާއި މޮރޮކޯ ކުޅުނު މެޗު ލަނޑެއް ނުޖެހި އެއްވަރުވެގެން ނިމިއްޖެއެވެ.
ފޯރިގަދަ ކުޅުމެއް ފެނިގެން ދިޔަ މިމެޗުގައި އެއްވެސް ޓީމަކަށް ލަނޑު ޖަހަން މާ ހުސް ފުރުސަތުތަކެއް ތަނަވަސް ކުރެވިފައެއް ނުވެއެވެ.
ނަމަވެސް ފުރަތަމަ ހާފުގައި މޮރޮކޯއަށްވުރެ ރަނގަޅަށް ކުޅެފައިވަނީ ކްރޮއޭޝިއާއިންނެވެ. އެހެން ނަމަވެސް ކްރޮއޭޝިއާ އަށް ރަނގަޅު ހަމަލާއެއް އުފެއްދިފައެއް ނުވެއެވެ.
ކްރޮއޭޝިއާއިން މެޗުގެ ފުރަތަމަ ހާފު ނިނުމަކާއި ގާތްވެފައި ވަނިކޮށް ނުރައްކާތެރި ދެ ހަމަލާއެއް މޮރޮކޯގެ ވޯލަށް ފޮނުވާލާފައި ވެއެވެ. މޮޑްރިޗް ފޮނުވާލި ހަމަލާ ގޯލާއި އަމާޒުނުވިއެވެ. މީގެ އިތުރުން ވްލަސިޗް ފޮނުވާލި ނުރައްކާތެރި ހަމަލާވެސް މޮރޮކޯ ކީޕަރު ބޫނޫ ވަނީ މަތަކޮށްފައެވެ.
މި ހާފުގައި މޮރޮކޯއަށް ވެސް ވަނީ ރަނގަޅު ހަމަލާއެއް އުފެއްދޭ ގޮތް ނުވެފައެވެ.
ފަހު ހާފަށް ކުޅެން ނުކުމެ މޮރޮކޯއިން ކުޅުން އިތުރަށް ވަރުގަދަކުރިއިރު، އެޓީމަށް ވަނީ ކޮންމެވެސް ވަރަކަށް ފުރުސަތު ލިބިގައެވެ.
އެގޮތުން މޮރޮކޯ އިން އުފެއްދި ހަމަލާތަކަށް ބަލާއިރު، ހަކީމީ ދުރުން ފޮނުވާލި ބާރު ހަމަލާ ފާހަގަކުރެވެއެވެ. ނަމަވެސް އެ ހަމަލާ ކްރޮއޭޝިއާގެ ކީޕަރު ވަނީ އަތުން ޖަހާ ދުރަށް ފޮނުވާލާފައެވެ.
މެޗުގެ ފަހުކޮޅު ކްރޮއޭޝިއާއިން ވަރަށް ބޮޑަށް މެޗު ކޮންޓްރޯލްކޮށްގެން ކުރިޔަށް ޖެހި ހަމަލާތައް އުފެއްދުމަށް މަސައްކަތް ކުރިއެވެ. ނަމަވެސް މޮރޮކޯގެ ޑިފެންސުން އެ މަސައްކަތްތައް ބޭކާރު ކޮށްލިއެވެ.
