އެލައިޑް އިންޝުއަރެންސްގެ ފަރާތުން އިޖުތިމާއީ ދާއިރާއަށް ޚާއްސަކޮށްގެން ދެ ފަންޑެއް ތަޢާރަފްކޮށްފިއެވެ.
އެ ކުންފުނީގެ ސީއެސްއާރުގެ ދަށުން ހިލޭ އެހީއަށް އެދި ހުށަހެޅުމުގެ ފުރުސަތު ހުޅުވާލާފައިވަނީ އިޖުތިމާއީ ދާއިރާއަށް ޚާއްސަކޮށް "އެލައިޑް ކޮމިއުނިޓީ ފަންޑް" އާއި ތައުލީމީ ދާއިރާއަށް ޚާއްސަކޮށް "އެލައިޑް އެޑިއުކޭޝަން ފަންޑް" އެވެ.
އެލައިޑުގެ ޖެނެރަލް މެނޭޖަރު އިބްރާހީމް ފިރުޝާން ވިދާޅުވީ އެ ކުންފުނީގެ ސީއެސްއާރުގެ ދަށުން ދޫކުރާ އެހީ ހަ ދާއިރާއަކުން ދޫކުރުމަށް ހަމަޖެހިފައިވާ ކަމަށެވެ. އަދި ކޮމިއުނިޓީ ފަންޑުގެ ދަށުން، ހޮވާލެވޭ ހަތަރު ޕްރޮޖެކްޓަކަށް 50،000 ރުފިޔާއާ ހަމައަށް ފައިސާގެ އެހީ ދޫކުރުމަށް ހަމަޖެހިފައިވާ ކަމަށެވެ.
ފިރުޝާން ވިދާޅުވީ ބޮޑެތި ޕްރޮޖެކްޓްތަކުގެ ވަކި މަރުހަލާތައް ވެސް މި ފަންޑަށް އެދި ހުށަހެޅޭނެ ކަމަށާއި ވަކި ހިސާބަކަށް ކުރިއަށް ގެންދިޔުމަށް ފަހު، ފަންޑު ނެތިގެން ހުއްޓާލާފައިވާ ޕްރޮޖެކްޓުތައް ވެސް ހުށަހެޅޭނެ ކަމަށެވެ.
ރާއްޖެތެރޭގެ ޖަމިއްޔާތަކަށް ޚާއްސަކޮށްފައިވާ މި ފަންޑުގެ ދަށުން ހަ ދާއިރާއެއްގެ ޕްރޮޖެކްޓުތަކުގެ އެޕްލިކޭޝަން ބަލައިގަތުމަށް ވަނީ ހަމަޖެހިފައެވެ.
އެގޮތުން ޕްރޮޖެކްޓް ބަލައިގަތުމަށް ހަމަޖެހިފައިވާ ދާއިރާތަކަކީ ސިއްހީ ދުޅަހެޔޮކަން، އިޖުތިމާއީ ޚިދުމަތް، ތިމާވެށި ރައްކާތެރިކުރުން، އަންހެނުންނާއި ކުޑަކުދިންގެ ހައްގުތައް، ތައުލީމު އަދި ތާރީޚާއި އާސާރުތައް ހިމެނެއެވެ.
މި ފަންޑަށް ކުރިމަތިލުމުގެ ފުރުސަތު ހުޅުވާލާފައިވަނީ communityfund@allied.mv އީމެއިލް މެދުވެރިކޮށް މިމަހުގެ ނިޔަލަށެވެ.
އެލައިޑް އެޑިއުކޭޝަން ފަންޑަށް އެދި ހުށަހެޅުމުގެ ފުރުސަތު ސަރުކާރުގެ ހުރިހާ ސްކޫލަކަށް ހުޅުވާލާފައިވާއިރު، އެ ފަންޑުގެ ދަށުން ސްކޫލުތަކުގެ ލައިބްރަރީ، ލެބޯޓަރީ އަދި މުދައްރިސުންނާއި ދަރިވަރުންގެ ތަމްރީނުތައް ފަދަ ކަންކަމަށް ކުރިމަތިލެވޭނެއެވެ.
އެ ފަންޑަށް ކުރިމަތިލާ ސްކޫލުތަކުގެ ތެރެއިން ހޮވާލެވޭ އަށް ސްކޫލަކަށް 25،000 ރުފިޔާގެ ހިލޭ އެހީ ދޫކުރުމަށް ހަމަޖެހިފައިވާއިރު، މި ފަންޑަށް ކުރިމަތިލުމުގެ ފުރުސަތު educationfund@allied.mv އީމެއިލް މެދުވެރިކޮށް މިމަހުގެ ނިޔަލަށް ވަނީ ހުޅުވާލެވިފައެވެ.
އެކުންފުނީގެ އިޖްތިމާއީ ޒިންމާގެ ދަށުން މީގެ ކުރިން ވެސް މުޖުތަމައަށް ފައިދާހުރި ގިނަ މަޝްރޫއުތަކަކަށް އެހީތެރިކަން ފޯރުކޮށްދީފައިވީނަމަވެސް، އާންމުކޮށް ހުޅުވާލައިގެން މިފަދަ ޕްރޮޖެކްޓަކަށް ކުރިމަތިލުމަށް ހުޅުވާލި މިއީ ފުރަތަމަ ފަހަރެވެ.
