މާލޭ ސިޓީ ކައުންސިލުން ފޯރުކޮށްދޭ ގިނަ ޚިދުމަތްތަކެއް އަންނަމަހުން ފެށިގެން އޮންލައިންކޮށް ދިނުމަށް ނިންމާ، އޮންލައިން ޕޯޓަލެއް އިފްތިތާހު ކޮށްފިއެވެ.
"މާވެހި"ގެ ނަމުގައި އެ ޕޯޓަލް އިފްތިތާހު ކޮށްދެއްވާފައިވަނީ މާލޭގެ ރައްޔިތުންނާ ބައްދަލުކުރުމަށް ބޭއްވި ބައްދަލުވުމުގައި މޭޔަރު ޑރ. މުހައްމަދު މުއިއްޒެވެ.
އެ ކައުންސިލުން ބުނީ މި ޕޯޓަލް އަންނަ މަހުގެ ތިން ވަނަ ދުވަހުން ފެށިގެން ބޭނުންކުރެވޭނެ ކަމަށާއި މި ޕޯޓަލުން ޚިދުމަތް ހޯދުމަށް އެދޭ ނަމަ، އައިޑީކާޑު ނަންބަރު ޖަހައި ރަޖިސްޓްރީވާން ކަމަށެވެ. އަދި ޕޯޓަލް މެދުވެރިކޮށް ޚިދުމަތް ހޯދުމަށް ދަތިވާ ވަގުތުތަކުގައި ބޭނުންވާ މައުލޫމާތު ހިއްސާކުރުމަށް އެ ޕޯޓަލްގައި ހެލްޕްޑެސްކުތައް ގާއިމްކޮށްފައިވާ ކަމަށް ވެސް ބުންޏެވެ.
މީގެ އިތުރުން ސިޓީ ކައުންސިލުން ދޭ ޚިދުމަތްތަކުގެ އަޕްޑޭޓާއި ނޮޓިފިކޭޝަންތައް ވެސް އެ ޕޯޓަލުން ބަލައިލެވޭނެ ކަމަށް ބުންޏެވެ.
މޭޔަރ ޑރ. މުހައްމަދު މުއިއްޒު ވިދާޅުވީ ޕޯޓަލް އިފްތިތާހުކުރުމަށް ފަހު، ކައުންސިލްގެ ހުއްދަތައް ލިބޭނީ ޑިޖިޓަލްކޮށް ކަމަށާއި އެ ހުއްދައިގެ ސައްހަކަން ކަށަވަރުކުރުމަށްޓަކައި، އޭގައިވާ ކިއުއާރު ކޯޑު ސްކޭންކޮށްލުމުން ސައްހަ ހުއްދައެއްކަން ދެނެގަނެވޭނެ ކަމަށެވެ.
މޭޔަރު ވިދާޅުވީ އެ ކައުންސިލުން ދޭ ޚިދުމަތްތަކުގެ ތެރެއިން 90 ޕަސެންޓު ޚިދުމަތް އެ ޕޯޓަލުން ލިބޭނެ ކަމަށެވެ.
އެގޮތުން އިމާރާތްކުރުމާ ބެހޭ ޚިދުމަތާއި މަގު ބަންދުކުރުމުގެ ހުއްދަ އާއި ފައްތިޔާ އާއި ފަޅުގެ ޚިދުމަތް ލިބޭނެ ކަަމަށް މޭޔަރު ވިދާޅުވިއެވެ. އަދި މިސްކިތްތަކަށް އެހީތެރިވެވޭނެ ގޮތްތަކާއި ބިމާ ބެހޭ ޚިދުމަތާއި ކުއްޖަކު އުފަންވުމުން ބޭނުންވާ ޚިދުމަތާއި ޕާކެއް ނުވަތަ މައިޒާނެއް ކުއްޔަށް ހިފުމުގެ ހުއްދަ ވެސް އެ ޕޯޓަލް މެދުވެރިކޮށް ލިބޭނެ ކަމަށް މޭޔަރު ވިދާޅުވިއެވެ.
