އިންޑިޔާގެ މައި ސަރުކާރު ހިންގާ ޕާޓީ ކަމުގައިވާ ބާރަތިޔާ ޖަނަތާ ޕާޓީ (ބީޖޭޕީ) އިން ވެރިކަންކުރާ ތިން ސްޓޭޓެއްގައި މުސްލިމުންނަށް އަމާޒުކޮށް ހިންގަމުންދާ އަނިޔާވެރި އަމަލުތައް ކުށްވެރިކޮށް ވެރިރަށް ނިއުދިއްލީގައި މުސްލިމުން މުޒާހަރާކޮށްފިއެވެ.
ވެރިރަށް ނިިއުދިއްލީގައި ހަނޫމާން ޖަޔަންތީގެ ނަމުގައި ކުރިއަށް ގެންދިޔަ ހިނގާލުމަކަށް ފަހު މުސްލިމުންނާ ހިންދޫންނާ ދެމެދު ހަމަނުޖެހުން ހިނގުމުގެ ސަބަބުން ދިއްލީގެ ޖަހާންގީރްޕޫރީ އަވަށުގައި ފުލުހުން ވަނީ ކާފިއު ހިންގާފައެވެ. ފުލުހުންގެ އޮފިޝަލެއް ކަމުގައިވާ ދެބިންދްރަ ޕާޓަކް ނޫސްވެރިންނަށް މައުލޫމާތު ދެމުން ބުނެފައިިވަނީ ހަމަނުޖެހުމުގައި އަނިޔާވި މީހުން އަދަދު އަދި ކަށަވަރުވެފައި ނުވާއިރު، ފުލުހުންގެ ތެރޭންވެސް ބަޔަކަށް އަނިޔާވެފައި ވާކަމުގައެވެ.
މުސްލިމުންގެ ރުޅިވެރިކަން އިތުރުވެފައި ވަނީ މަދްޔަ ޕްރަދޭޝްގައި ކުރިއަށް ދިޔަ ހިންދޫންގެ އީދެއް ކަމުގައިވާ ރާމްނަވަމީގެ ތެރޭގައި މުސްލިމުންނާ ހިންދޫންނާ ދެމެދު ހިނގި ކުރިމަތިލުމަކަށް ފަހު އެ ސްޓޭޓުގެ ސަރުކާރުން، ހަމަނެޖެހުމުގައި ބައިވެރިވި މުސްލިމުންނާ ދެކޮޅަށް އަނިޔާވެރި ގޮތަކަށް ފިޔަވަޅު އެޅުމާ ގުޅިގެންނެވެ. ހިންދޫންނާ ދެކޮޅަށް ފިޔަވަޅެއް އަޅާފައި ނުވާއިރު، ފުލުހުން ވަނީ ހަމަނުޖެހުމުގައި ބައިވެރިކަމަށް ބުނާ މުސްލިމުންގެ ގެތަކާއި ފިހާރަަތަކަށް ވަދެ އެތަންތަނަށް ބޮޑެތި ގެއްލުންތަކެއް ދީފައެވެ.
ބޮޑުވަޒީރު މޯދީގެ ސްޓޭޓުކަމަށްވާ ގުޖުރާތުގައި ހިންދޫންނާ މުސްލިމުންނާ ދެމެދު ހިނގި ކުރިމަތިލުންތަކެއްގައި މީހަކު މަރުވެެފައި ވާއިރު، އެ ސްޓޭޓުގެ ސަރުކާރުން ވަނީ ހަމަނުޖެހުމުގައި ބައިވެރިވި ކަމަށް ބުނާ މުސްލިމުންގެ ފިހާރަތަކަށް ބޮޑެތި ގެއްލުންތަކެއް ދީފައެވެ.
ނިއުދިއްލީގައި މުޒާހަރާކުރި މުސްލިމުން ވަނީ ބޮޑުވަޒީރު ނަރެންދްރަ މޯދީގެ ސަރުކާރުން ގެންގުޅޭ މުސްލިމުންނާ ދެކޮޅު ސިޔާސަތު ކުށްވެރިކޮށް އަޑުއުފުލާފައެވެ. މުސްލިމުން ތުހުމަތުކުރާ ގޮތުގައި މުސްލިމުންނާ ދެކޮޅަށް އިންޑިޔާގެ ކަންކޮޅުތަކުގައި ހަރުކަށި އަމަލުތައް ހިންގަނީ މައި ސަރުކާރުން އެކަމަށް ހިތްވަރުދީގެންނެވެ.
މި ހަމަނުޖެހުންތަކާ ގުޅިގެން އިދިކޮޅު 13 ޕާޓީއަކުން ގުޅިފައިވާ ބަޔާނެއް ނެރެފައިވާއިރު، އެޕާޓީތަކުންވެސް ތުހުމަތުކޮށްފައިވާ ގޮތުގައި މުސްލިމުންނާ ހިންދޫންނާ ދެމެދު މަސްރަހު ހޫނުކޮށް ހަމަނުޖެހުން އުފައްދަނީ ވެރިކަންކުރާ ބީޖޭޕީ ފަހަތުގައި އޮވެގެންނެެވެ. އަދި އެ ޕާޓީން ވެރިކަންކުރާ ސްޓޭޓުތަކުގެ ސަރުކާރުން މުސްލިމުންނާ ދެކޮޅަށް ހަރުކަށި އަމަލުތައް ހިންގަނީ މައި ސަރުކާރުން ހިތްވަރުދީގެންނެވެ.
އިންޑިޔާގެ އެންމެ ބައިބޯ ސްޓޭޓް، އުއްތަރް ޕްރަދޭޝްގައި ހަރުކަށި ހިންދޫން ވަނީ ހިންދޫ އަންހެނަކާ ކައިވެނިކުރި މުސްލިމް ފިރިހެނަކަށް އަނިޔާކޮށް އޭނާގެ ގެ އަންދާލާފައެވެ.
ވެރިރަށް ނިއުދިއްލީގައި ގިނަ ބަޔަކު ބައިވެރިވި މުޒާހަރާއެއްގައި ވާހަކަދައްކަމުން، މަޝްހޫރު އިޖްތިމާއީ ހަރަކާތްތެރިޔާ (ސޯޝަލް އެކްޓިވިސްޓް) ކަވީތާ ކްރިޝްނަން ބުނެފައިވާ ގޮތުގައި އިންޑިޔާ ދަނީ ގާނޫނީ ޑިމޮކްރެސީއަކުން ހިންދޫންގެ ވެރިކަން ހިނގާ ދައުތަކަށް ބަދަލުވަމުންނެވެ.
