ތ. އަތޮޅުގައި ރިސޯޓުގެ ގޮތުގައި ތަރައްޤީކުރުމަށް ދޫކޮށްފައިވާ ގިނަ ރަށްތަކުގައި ރިސޯޓް ތަރައްޤީކުރެވިފައިނުވާތީ އެކަމާ ބެހޭ ގޮތުން މޯލްޑިވްސް ނެޝަނަލް ޕާޓީގެ ޕީޖީ ލީޑަރ ޢަބްދުﷲ ރިޔާޟް، މިނިސްޓަރ އޮފް ޓޫރިޒަމް ޑޮކްޓަރ ޢަބްދުﷲ މަޢުޞޫމްއާ ސުވާލުކުރައްވައިފިއެވެ.
މިނިސްޓަރ މައުސޫމް ވިދާޅުވީ ތ. ރިސޯޓުގެ ގޮތުގައި ތަރައްޤީކުރުމަށް ދޫކޮށްފައިވާ ރަށްތަކަކީ ރުށްތިބިރަށް، ކަޅުދިޔަފުށި، އެކުރުފުށި ފިނޮޅު، އޮޅުގިރި އަދި އެލާ ކަމަށެވެ. އަދި މިރަށްތަކުގެ ތެރެއިން ކަޅުދިޔަފުށި، އެކުރުފުށި ފިނޮޅު އަދި އޮޅުގިރިއަކީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަންގެ ދަށުން ދޫކޮށްފައިވާ ރަށްތަކެއް ކަމަށެވެ.
އޭގެ ތެރެއިން ކަޅުދިޔަފުށްޓަކީ ގާތްގަނޑަކަށް %80 ތަރައްޤީކޮށް މިހާރު މަސައްކަތް ހުއްޓިފައިވާ ރަށެއް ކަމަށެވެ. އަދި ރުށްތިބިރަށް، ކަޅުދިޔަފުށި، އެކުރުފުށި ފިނޮޅު އަދި އޮޅުގިރިއަށް ވަނީ ފަތުރުވެރިކަމުގެ ބޭނުންތަކަށް ކުއްޔަށްދޫކޮށްފައިވާ ތަންތަން ތަރައްޤީކުރުމަށް ދީފައިވާ މުއްދަތު އިތުރުކޮށްދިނުމާއި ކުއްޔާއި ޖޫރިމަނާ ފަސްކޮށްދިނުމުގައި އަމަލުކުރާނެ ޤަވާޢިދުގެ ދަށުން ރަށް ތަރައްޤީކުރުމަށް 3 އަހަރުގެ ފުރުޞަތު ދީފައިކަމަށެވެ.
އެލާއަކީ ތ. ވޭމަންޑޫއާއި ތ. ކިނބިދޫއާ ދެމެދު އަޅާ ކޯސްވޭގައި ހިމެނޭ ރަށެއް ކަމަށް ވެސް މިނިސްޓަރ މައުސޫމް ވިދާޅުވިއެވެ.
ޓޫރިޒަމް މިނިސްޓްރީގެ ބޭނުމަށް ތ. އަތޮޅުން 13 ރަށް ނަގާފައިވާ ކަމަށާއި ޓޫރިޒަމަށް 50 އަހަރު ފުރިގެންދާއިރު މިއަތޮޅުގައި އޮތީ އެންމެ ރިސޯޓެއް ކަމަށާއި އިތުރު ރަށެއް އޮޕަރޭޓްކުރެވޭނެ ހިސާބަށް ގެންގޮސްދެވިދާނެ ކަމަށް މިސަރުކާރުން ކިހާވަރެއްގެ ޔަޤީންކަމެއް ދެއްވިދާނެތޯ ވެސް ވަނީ ސުވާލު ކުރައްވާފައެވެ.
މިސުވާލަށް ޖަވާބު ދެއްވަމުން ވިދާޅުވީ ތ. އަތޮޅުގައި ޓޫރިޒަމް ތަރައްޤީކުރުމަކީ ސަރުކާރުގެ ސިޔާސަތެއް ކަމަށާއި އެއީ ސަރުކާރުން ކުރަން ބޭނުންވާ ކަމެއް ކަމަށެވެ. އަދި އަތޮޅުގެ ބޭފުޅުންނާއި އަތޮޅުގެ މަޖިލިސް މެންބަރުންގެ މަޝްވަރާގެ މަތިން އިތުރު ރަށްރަށް ޓޫރިޒަމް ތަރައްޤީކުރުމަށް ކަނޑައެޅޭ ކަމަށެވެ.
އެގޮތުން، އެންމެ ފަހުން ޓޫރިޒަމް ތަރައްޤީކުރުމަށް ހުޅުވާލި ރަށްތަކުގެ ތެރޭގައި ތ. އޮޅުފުށި ފިނޮޅު ހިމެނޭ ކަމަށާއި އެރަށަށް އެއް ފަރާތުން ބީލަން ހުށަހަޅާފައި އެބަ އޮތް ކަމަށެވެ. އަދި އެބީލަން އޭޕްރީލް މަހުގެ ކުރިން އިވެލުއޭޓްކޮށް ނިންމާނެ ކަމަށެވެ.
އޭގެ އިތުރުން ތ. ކަނިމީދޫއަކީ ވެސް އެހެން ޕްރޮޖެކްޓެއްގެ ތެރެއިން ޓޫރިޒަމް ތަރައްޤީކުރަމުންދާ ރަށެއް ކަމަށެވެ. އަދި ތ. އަތޮޅުގައި އެއަރޕޯޓެއްވެސް އެބަ އޮތް ކަމަށާއި އެ އެއަރޕޯޓް ކުރިޔަށް ދާނީވެސް އެއަތޮޅުގައި ރިސޯޓުތަކެއް ތަރައްޤީވެގެން ކަމަށެވެ.
