އިސްލާއީލުގެ އުތުރުގައި ހުންނަ ސަލާމަތީ ފިޔަވަޅުތައް އެންމެ ވަރުގަދަ ޖަލެއް ކަމުގައި ބެލެވޭ ޖަލްބޫޢު ޖަލުން ފަަލަސްޠީނުގެ 6 ގައިދީއަކު ފިލައިފިއެވެ. އިސްރާއީލުގެ އެ ފެންވަރުގެ ޖަލެއްގައި ކުރުން ނާދިރު މިކަން އެގައިދީން ކޮށްފައި ވަނީ ޖަލުގެ އަޑިން ކޮނެގެން އައިސް ބޭރަށް ނުކުމެގެންނެެވެ.
"ދަނޑުބިންތަކުގެ ތެރޭގައި ޝައްކުކުރެވޭ ބަޔަކު އުޅޭ ކަމުގެ ޚަބަރުތައް ރޭ އަހަރުމެންނަށް ވަނީ ލިބިފައި. އަދި ޖަލުތަކަބެހޭ އިދާރާއިން އަހަރުމެންނަށް ވަރަށް އަވަހަށް އެނގިގެން ދިޔަ ގޮތުގައި ގައިދީންގެ ބަޔަކު އެމީހުންގެ ގޮޅިތަކުގައި ނެތް. 6 ގައިދީއަކު ވަނީ ފިލާފައި." އިސްރާއީލުގެ ކާން ރޭޑިޔޯއަށް މައުލޫމާތުދެމުން ފުލުހުންގެ ތަރުޖަމާނު އެލީ ލެވީ ބުނެފައި ވެއެވެ.
އޮފިޝަލުން މައުލޫމާތުދިން ގޮތުގައި ފުލުހުންނާއި، ސިފައިންނާއި، އިސްރާއީލުގެ ބާރުގަދަ ދާޚިލީ ސަލާމަތާ ބެހޭ އިދާރާ ޝިން ބެތުގެ އެޖެންޓުން ދަނީ ފިލި ގައިދީން ހޯދުމުގައި ހަރަކާތްތެރިވަމުންނެވެ. ޖިލްބޫޢު ޖަލުގެ ވަށައިގެންވާ ސަރަހައްދުގައި ޗެކް ޕްއިންޓުތައް ގާއިމުކޮށް ކުއްތާ ބޭނުންކޮށްދަނީ މީހުން ޗެކްކުރަމުންނެވެ.
އިސްރާއީލުގެ ޚަބަރުފަތުރާ ވަސީލަތްތަކުން ޚަބަރުދީފައިވާ ގޮތުގައި އެއް ގޮޅިއެއްގައި ތިބިކަމަށް ބެލެވޭ 6 ގައިދީން ފިލާފައި ވަނީ ފާޚާނާ ތަށިގަޑެއްގެ އަޑިން ކޮނެގެން ގޮސް ޖަލުން ބޭރަށް ނުކުމެވޭ ގޮތަށް އަޑިން މަގެއް ކޮނެގެންނެވެ. އަދި ބެލެވޭ ގޮތުގައި މިކަމުގައި އެމީހުންނަށް ބޭރު ފަރާތެއްގެ އެހީތެރިކަން ވަނީ ލިބިފައެވެ.
ޖަލުން ފިލި ގައިދީންގެ ތެރޭގައި ހިމެނޭ އެކަކީ ޖެނީން ސަރަަހައްދުގައި އަޤްޞާ ބްރިގޭޑްސްގެ ކޮމާންޑަރަކަށް ކުރިން ހުރި ޒަކަރިއްޔާ ޒުބޭދީ (46 އ.) އެވެ. އޭނާއަކީ 2002 ވަނަ އަހަރު ލިކުޑް ޕާޓީގެ އޮފީހެއްގައި އެއްޗެއް ގޮއްވާލައިގެން އިސްރާއީލުގެ 6 މީހަކު މަރާފައިވާ ކަމަށް ތުހުމަތުކުރެވޭ މީހެކެވެ. އޭނާއާއެކު ދެން ފިލާފައި ވަނީ 2000 ވަނަ އަހަރު ކުރިއަށް ދިޔަ ފަލަސްޠީނުގެ ދެވަނަ އިންތިފާޟާގެ ތެރޭގައި އިސްރާއީލު މީހުންނަށް ހަމަލާދިނުމުގެ ކުށުގައި އުމުރަށް ޖަލަށް ލާފައިވާ ފަސް މީހުންނެވެ. އެއީ އިސްލާމިކް ޖިހާދުގެ މެންބަރުންނެވެ.
ފަލަސްޠީނުގެ ގައިދީންތަކެއް އެހާ ސަލާމަތީ ފިޔަވަޅުތައް ވަރުގަަދަ ޖަލަކުން އެހާ ފަސޭހަ ގޮތަަކަށް ފިލައިގެން ދިއުމަކީ، އިސްރާއީލުގެ ސަލާމަތީ ބާރުތަކާއި، ޖާސޫސީ އިދާރާތައް ލަދުގަންނަން ޖެހޭވަރުގެ ކަމެއް ކަމަށް އިސްރާއީލުގެ ބައެއް ފަރާތްތަކުން ބުނަމުން ދާއިރު، ބޮޑުވަޒީރު ނަފްތާލީ ބެެންޓް ވަނީ ކަންބޮޑުވުން ފާޅުކޮށްފައެވެ.
"މިއީ ސަލާމާތީ ހުރިހާ އިދާރާއަކުން ހަރަކާތްތެރިވާން ޖެހޭވަރުގެ ނުރައްކާތެރި ހާދިސާއެެއް." ބެނެޓް ބުނެފައި ވެއެވެ.
ޣައްްޒާގައި ވެރިކަންކުރާ އިސްލާމިކް ރެސިސްޓެންސް މޫވްމަންޓް (ހަމާސް) އިން ވަނީ ގައިދީން ފިލި ފިލުން އެއީ "ހަތްވަރުގަދަ ބަޠަލުންގެ އަމަލެއް"ގެ ގޮތުގައި ސިފަކޮށް އެކަމަށް މަރުހަބާކިޔާފައެވެ. ޙަމާސްގެ ބަޔާނުގައި ބުނެފައިވާ ގޮތުގައި އެމީހުން ނުކުމެފައި ވަނީ އެތައް މަސްދުވަހެއްގެ މަސައްކަތަށް ފަހުގައެވެ.
