ރޭ ފަތިހުގެ 5.00 ގައި ކުޅުނު ފައިނަލް މެޗުގައި 1 ލަނޑު 0 ލަނޑުން އެންމެ ފަހުގެ ޗެމްޕިއަން ބަލި ކުރުމަށް ފަހު ކޯޕާ އެމެރިކާ 2021 ގެ ތަށި އާޖެންޓީނާއިން އުފުލާލައިފިއެވެ.
މެޗު ފެށިގެން ފުރަތަމަ ހާފުގެ ކުރީ ކޮޅު ބްރެޒީލް ވަރަށް ރަނގަޅަށް ކުޅެ އާޖެންޓީނާގެ ގޯލަށް ނުރައްކާ ކުރަމުން ދިޔައެވެ.ލ އާޖެންޓީނާ މި މެޗުގައި ޖެހި ލަނޑު ޖަހާފައި ވަނީ ބްރެޒީލްގެ ދިފާއީ ކުޅުންތެރިންނަށް އެޅުނު ޅައެއްޗެއްގެ ބޭނުންކޮށްގެން އާޖެންޓީނާގެ ޑި މަރިއާއެވެ. އެއީ މެޗުގެ 22 ވަނަ މިނިޓުގައެވެ.
ލަނޑެއް ޖެހުމަށް ފަހު އާޖެންޓީނާއިން ވަރަށް ރަނގަޅަށް މެޗު ކޮންޓްރޯލު ކޮށްގެން ކުޅެން ފެއްޓިއެވެ. ބްރެޒީލް ހަލުވިކޮށް ކުޅެ ކުރިއަރަން މަސައްކަތް ކުރި ނަމަވެސް އާޖެންޓީނާގެ ދިފާއު ފޫއަޅުވައިފައި ވަދެގަނެވޭ ވަރެއް ނުވިއެވެ. މުޅި މެޗުގައި އާޖެންޓީނާއިން ފެނިގެން ދިޔައީ ވިސްނުންތެރި ކުޅުމެކެވެ.
މިއީ މެސީގެ ކެޕްޓަން ކަމުގައި އާޖެންޓީނާއަށް ލިބުނު ފުރަތަމަ ބައިނަލްއަގުވާމީ ތަށްޓެވެ. 1993 ގެ ފަހުން އާޖެންޓީނާއަށް ކޯޕާ އެމެރިކާ ލިބުނު ފުރަތަމަ ފަހަރުވެސް މެއެވެ. އަދި އެންމެ ގިނައިން ކޯޕާ އެމެރިކާ ތަށި ހޯދި ގައުމަކަށްވެސް އާޖެންޓީނާ ވެގެން ދިޔައީއެވެ.
