ޗެޕް ރިޕަބްލިކް 2 ލަނޑު 1 ލަނޑުން ބަލި ކުރުމަށް ފަހު ޑެންމާކް ޔޫރޯ 2020 ގެ ސެމީ ފައިނަލަށް ހިނގައްޖެއެވެ. މިރޭ 9 ޖެހިއިރު ކުޅުނު ކުއާޓަރ ފައިނަލް މެޗުގެ ފުރަތަމަ ހާފުގައި ރަނގަޅަށް ކުޅުނީ ޑެންމާކެވެ.
ޑެންމާޚުގެ ފުރަތަމަ ލަނޑު ޖެހީ މެޗުގެ ފަސް ވަނަ މިނިޓުގައި ތޯމަސްަ ޑެލެއިނީއެވެ.
ފުރަތަމަ ފަނަވަރަކަށް މިނިޓު މުޅި މެޗު ކޮންޓްރޯލު ކުރީ ޑެންމާކުންނެވެ. އެހެންނަމަވެސް އޭގެ ފަހުން ޗެކް ރިޕަބްލިކުންވެސް ހަމަލާތަކެއް އުފެއެްދޭތޯ މަސައްކަތް ކުރިއެވެ. ޓީމުގެ މެދުތެރެ ރަނގަޅަށް ނުކުޅުމުގެ ސަބަބުން ފަހަތަށް ދިޔައީ ބާރު ބޮޑުވަމުންނެވެ. ކުރިއަށް ބޯޅަ ފޮނުވައިގެން ލަނޑެއް ޖެހޭތޯ މަސައްކަތް ކުރި ނަމަވެސް ޑެންމާކްގެ ކުޅުން ފެނުނީ މާ ހަލުއިކަމަށެވެ.
ޑެންމާޚުގެ ދެވަނަ ލަނޑު ޖެހީ މެޗުގެ 42 ވަނަ މިނިޓުގައި ޑޮލްބާރެގެވެ.
މެޗުގެ ދަވަނަ ހާފަށް ޗެކްރިޕަބްލިކުން އެރީ ބަދަލުތަކަކާ އެކުގައެވެ. އެޔާއެކު ފުރަތަމަ މިނިޓުން ފެށިގެން މެޗު ކޮންޓްރޯލު ކުރަން ފެށީ ޗެކް ރިޕަބްލިކުންނެވެ.
ޗެކް ރިޕަބްލިކްގެ ފުރަތަމަ ކލަނޑު ޖެހީ މެޗުގެ 49 ވަނަ މިނިޓުގައެވެ. އެއީ ފަހު ހާފުގެ ހަތަރު ވަނަ މިނިޓެވެ. މި ލަނޑު ޖެހީ ޝިކެވެ.
ލަނޑަށް ފަހުވެސް ޗެކް ރިޕަބްލިކކުން ވަރަށް ރަނގަޅަށް ކުޅެ އެތައް ހަމަލާއެއް އުފެއްދިއެވެ. އެހެންނަމަވެސް ލަނޑެއް ޖެހޭ ގޮތެއް ނުވިއެވެ.
ޑެންމާކް ސެމީ ފައިނަލް ގައި ބައްދަލު ކުރާނީ މިރޭ މެންދަމު 12 ޖަހާއިރު އިންގްލަންޑާއި ޔޫކްރެއިނާ ކުޅޭ މެޗުން މޮޅުވާ ޓީމަކާއެވެ.
ރޭ މި މުބާރާތުގައި ވަނީ ސެމީ ފައިނަލަށް ދެ ޓީމު ހޮވިފައެވެ. އެއީ އިޓަލީއާއި ސްޕެއިނެވެ. އިޓަލީ ސެމީ ފައިނަލަށް ދިޔައީ ދުނިޔޭގެ އެއްވަނަ ޓީމު ބެލްޖިއަމް ބަލިކޮށްފައެވެ. ސްޕެއިން ދިޔައީ ސްވިޓްޒަލެންޑް ބަލިކޮށްފައެވެ.
