ނިމިދިޔަ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުގައި ދިމާވި އެކިއެކި މައްސަލަތަކާއި ވޯޓު އެއްވަރުވި ދާއިރާތަކާއެކު ޖުމުލަ 12 ދާއިރާއެއްގެ ވޯޓުލުން އަލުން ބާއްވަންޖެހިފައިވާކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
ބައެއް މީޑިއާތަކަށް މަޢުލޫމާތު ދެއްވަމުން އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވެފައިވަނީ ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބާ ގުޅިގެން މިހާތަނަށް ހުށަހެޅި ހުރިހާ ޝަކުވާތަކުގެ މައްސަލަތައް ބަލައި ނިމިފައިވާކަމަށެވެ. އަދި އިންތިޚާބުގެ ދާއިމީ ނަތީޖާވެސް އިއުލާނުކޮށް ނިމިފައިވާއިރު ސީދާ ވޯޓަށް އަސަރުކުރާފަދަ މައްސަލަތަކަކާހެދި އަލުން އިންތިޚާބު ބާއްވަންޖެހުނީ ތ.ގާދިއްފުއްޓާއި، ލ.މާވަށުގައިކަމަށެވެ.
މީގެއިތުރުން 4 ދާއިރާއެއްގެ ވޯޓުގެ ނަތީޖާ އެއްވަރުވެފައިވުމުން އެދާއިރާތަކުގައި އަލުން ބާއްވަން ޖެހިފައިވާކަމަށާ، އެއީ ހއ.ތަކަންދޫ، ފ.ދަރަނބޫދޫ، މ.ރަތްމަންދޫ، އަދި ބ.ކިހާދޫކަމަށް އިލެކްޝަންސް ކޮމިޝަނުން ވިދާޅުވެފައިވެއެވެ. މީގެ އިތުރުން އަންހެނުންގެ ތަރައްޤީއަށް މަސައްކަތްކުރާ ކޮމިޓީތައް އިންތިޚާބުކުރުމަށް ނެގި ވޯޓު އެއްވަރުވެގެން ޖުމުލަ 6 ދާއިރާއެއްގައި ވޯޓުލުން ބޭއްވުމަށް ނިންމަވާފައިވާކަމަށް އީސީން ހާމަކުރައްވަފއެވެ.
އަލުން ބާއްވަންޖެހޭ އިންތިޚާބުގެ ވޯޓުލުން އޮންނާނީ މެއިމަހުގެ 1 ވަނަ ދުވަހާއި ޖޫންމަހުގެ 5 ވަނަ ދުވަހުކަމަށް އިލެކްޝަންސް ކޮމިޝަނުން ވިދާޅުވެއެވެ.
