މީހެ 4 އަހަރުކުރިން 2017ވަނަ އަހަރުގެ އޭޕްރީލް މަހުގެ 23ވަނަ ދުވަހުގެ ރޭ ދަންވަރު އަނިޔާވެރިގޮތަކަށް މަރާލި ޔާމީން ރަޝީދު މަރާލި ޙާދިސާއަށް މިއަދަށް 4 އަހަރ ވީއެވެ. އޭނާ މަރާލީ ދިރިއުޅޭގެ މ.ސްޕެޓިއުލާގޭގެ ސިޑިގޮޅި ކައިރީގައި ތޫނު އެއްޗަކުން ހަމަލާދީއެވެ.
މި މައްސަލާގައި ދައުލަތުންވަނީ ހ.އަންނާރުމާގޭ އިސްމާއިލް ހައިޝަމް ރަޝީދާއި، މ.އިރަސްމިކުގޭ އަޙްމަދު ޒިހާން އިސްމާއިލާއި، ގދ.ގައްދޫ ސިންދުބާދުގޭ މުހައްމަދު ދިފްރާނާއި، މ.ކުދެހިގޭ ހަސަން ޝިފާޒާއި، މ.ތާއިފް އިސްމާއިލް ރަޝީދާއި މ.ކޮޅުފުށީ އީސްޓް، ހުސައިން ޒިޔާދުގެ މައްޗަށް ދަޢުވާ އުފުލާފައެވެ. މި 6 މީހުންގެ މައްޗަށް އުފުލާފައިވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދަޢުވާއެވެ.
4އަހަރު ވެގެންދިޔައިރު، އަދިވެސް މިމައްސަލަ އޮތީ ކޮޅެއްގައި ނުޖެހިއެވެ. ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވެރިކަމަށް ވަޑައިގަތުމަށް ކެމްޕެއިން ކުރެއްވި ދުވަސްވަރު އެނެމް ބޮޑަށް ދެއްކެވި އެއްވާހަކައަކީވެސް މިފަދަ ޙާދިސާތައް އަލުން ބަލައި އިންސާފު ހޯއްދަވައިދެއްވާނެކަމުގެ ވާހަކައެވެ. ވަކިން ޙާއްސަކޮށް ޔާމީން ރަޝީދުގެ މަރުގެ މައްސަލާގައި އިންސާފު ހޯއްދަވައިދެއްވާނެކަމަށް ކަނޑައެޅިގެން އެމަނިކުފަނު ވާއުދުވެވަޑައިގަތެވެ.
ވެރިކަމަށް ވަޑައިގެން ރައީސް ޞާލިޙް އެންމެފުރަތަމަ ކުރެއްވި އެއްކަމަކީ ޤާނޫނީ ބާރުވެރިކަމާއެކު ރިޔާސީ ކޮމިޝަންތަކެއް އުފެއްދެވުމެވެ. އޭގެތެރެއިން މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލަން ވަކި ޚާއްސަ ކޮމިޝަނެއް އުފައްދަވައި ދައުލަތުން ބޮޑު މުސާރައާއި ސެކިއުރިޓީ ދެއްވާފައި އެކޮމިޝަނަށް މެމްބަރުން ޢައްޔަންކުރެއްވިއެވެ. އެހެންނަމަވެސް އިންސާފު ލިބުމުގައި މިއަދާހަމައަށް ވީކަމެއް ނެތެވެ.
ޔާމީން ރަޝީދުގެ މަރުގެ މައްސައަށް ބަލާއިރު 2014ވަނަ އަހަރާއި 2017 ވަނަ އަހަރާއި ދެމެދުގައި ޔާމީނަށް ފޮނުވަމުންދިޔަ މަރުގެ އިންޒާރުތައް އެކިފަހަރުމަތިން ފުލުހުންނަށް ރިޕޯޓުކޮށް، އެހީތެރިކަމަށް އެދިފައިވާނެކަމަށް ޔާމީންގެ ޢާއިލާއިން ބުނެއެވެ. އެހެންނަމަވެސް ފުލުހުންގެ އެއްވެސް ސަމާލުކަމެއް އޭނާގެ ރައްކާތެރިކަމަށް ދީފައިނުވާކަމާއި އަދި މިއަދާ ހަމައަށްވެސް މިމައްސަލާގައި ފުލުހުންގެ މުއައްސަސާ ޖަވާބުދާރީ ކުރުވާފައި ނުވާކަން ޔާމީންގެ ޢާއިލާއިން ފާހަގަކުރެއެވެ.
ޔާމީން ރަޝީދު މަރާލިކަމުގެ ތުހުމަތުގައި 2017 ވަނަ އަހަރުގެ ޖުލައި މަހުގައި 7 މީހެއްގެ މައްޗަށް ޖިނާއީ ދައުވާ އުފުލުމަށްފަހުގައި ކްރިމިނަލް ކޯޓުގައި ހިންގަންފެށި ޝަރީއަތް މިއަދާހަމައަށްވެސް ނުނިމި، 2020ވަނަ އަހަރުގެތެރޭގައި އަމުދުން އެއްވެސް އަޑުއެހުމެއް ނުބާއްވާ އޮތީ ކަނޑައެޅިގެން ޤާނޫނުއަސާސީގެ 42 ވަނަ މާއްދާއާއި ޖިނާއީ އިޖުރާއަތުގެ ޤާނޫނުގެ 142 ވަނަ މާއްދާއާ ޚިލާފަށްކަން ޔާމީންގެ ޢާއިލާއިން ފާހަގަކުރެއެވެ.
"މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަ ބަލާ ކޮމިޝަން" އުފައްދައި ރައްޔިތުންގެ ޓެކްސް ފައިސާއިން އެތަނައް އެތައް ހޭދައެއް ކުރާއިރު، 2020ވަނަ އަހަރު ނިމުނު އިރުވެސް ޔާމީން ރަޝީދުގެ މަރުގެ މައްސަލަ ތަހުގީގު ކުރިއަށްގޮސްފައިވެސް ނުވާކަމީ ޢާއިލާއާއި މިމައްސަލައިގެ އިންސާފަށް އެދޭ އެތައް ބައެއްގެ ޝަކުވާއެކެވެ.
ދިވެހި ސަރުކާރާއި ރައްޔިތުންގެ މަޖިލީހުގެ ކިބައިން ޔާމީން ރަޝީދުގެ ޢާއިލާއާއި އޭނާއަށް އިންސާފު ހޯދަން އެދޭ އެތައް ރައްޔިތުންނެއް މިއަދު ކުރާ ސުވާލަކީ އިންސާފު ކޮބައިތޯއެވެ؟ އިންސާފު ލިބޭނެތޯއެވެ؟
