ރައީސުލްޖުމްހޫރިއްޔާ އަލްފާޟިލް އިބްރާހީމް މުޙައްމަދު ޞާލިހާއި ، އެމަނިކުފާނާ ދެމެދު އޮންނަ މައްސަލަޔަކީ ކޮރަޕްޝަންގެ މައްސަލަ ކަމުގައި ، ކުރީގެ ރައީސް ، އަދި ރައްޔިތުންގެ މަޖިލީހުގެ މިހާރުގެ ރައީސް ، ރައީސް ނަޝީދު ވަނީ ވިދާޅުވެފައެވެ. ރައީސް ނަޝީދު މިހެންވިދާޅުވެފައިވަނީ 11 އެޕްރީލް 2021 ގައި ބޭއްވުނު ، ނޫސްވެރިންގެ ބައްދަލުވުމެއްގައެވެ. ދުބާއީގެ އެގްޒެކިއުޓާރސް ޖެނެރަލް ޓްރޭޑިންގއާ ޙަވާލުކޮށްގެން 75 ވެންޓިލޭޓަރު ގެންނަން ފައިސާ ދައްކާފައި ، އެ ވެންޓިލޭޓަރުތައް ނުލިބިގެން ، އެންމެ ކޯފާ އިސްކުރައްވާ ބޭފުޅަކީ ، ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދެވެ. " ހެލްތު މިނިސްޓްރީން ކޯވިޑް-19 އާ ގުޅިގެން ، ގެންނަން އުޅުނު ވެންޓިލޭޓަރުތަކުގެ ކޮރަޕްޝަންގެ މައްސަލަ ނެތްނަމަ ، އެމަނިކުފާނާއި ރައީސުލްޖުމްހޫރިއްޔާއާ ދެމެދު އެއްވެސް މައްސަލައެއް ނުއުފެދޭނެ " ކަމުގައި ރައީސް ނަޝީދު ވަނީ ވިދާޅުވެފައެވެ.
ވެންޓިލޭޓަރުތައް ގަތުމުގައި ހިންގައިފައިވާ މުޢާމަލާތުތަކުގައި ، ކަރަޕްޝަނެއް އޮވެގެން ، ދަޢުވާކުރާނެ ހެއްކެއް އަދި ޤަރީނާއެއް ނެތްކަމަށް ، ޕްރޮސެކިއުޓަރ ޖެނެރަލް ޙުސައިން ޝަމީމުވަނީ ނިންމަވާފައެވެ. މިނިންމުމާގުޅިގެން ، އެމައްސަލަ އިތުރަށް ބައްލަވަން ، ރައްޔިތުންގެ މަޖިލީހުގެ ރައީސް ، ރައީސް މުޙައްމަދު ނަޝީދު އެދިވަޑައިގަންނަވައެވެ. އެހެންކަމުން ، ރައްޔިތުންގެ މަޖިލީހުގެ ޖުޑިޝަރީ ކޮމެޓީއަށް ، ރައީސް ނަޝީދުވަނީ މިމައްސަލަ ފޮނުއްވާފައެވެ. އަދި މިމައްސަލަޔާ ގުޅުވައި ، ޕީޖީ ޝަމީމުގެ އިތުބާރުނެތްކަމަށް މަޖިލީހުން ފާސްކުރަންވެސް ، ރައީސް ނަޝީދު ތާއީދުކުރައްވައެވެ. ރައީސް ނަޝީދުގެ އިތުބާރަކީ ، ވަކިކަހަލަ ބަޔަކަށް ޙައްޤު އެއްޗަކަށްވެދާނެއެވެ. ކަމެއް ހަމަ ދިމާވާއިރަށް ، ހިތްޕުޅާ ހަމަނުވާ ކޮންމެ ފަހަރަކު ، މީހެއްގެ މަޤްބޫލުކަން އިތުރުވެގެންދާ ކޮންމެ ހިނދެއްގައި ، އެމީހެއްގެ އިތުބާރުނެތި މަޤާމުން ބޭރުކުރަން އިސްނަންގަވައި ، އެ ޑްރާމާ ކުޅުއްވުމަކީ ، ރައީސް ނަޝީދުގެ އާދައެކެވެ.
ރައީސް ނަޝީދަކީ ، ބޭނުންވާ މަޤްޞަދެއް ޙާޞިލް ކުރެއްވުމަށްޓަކައި ، ކޮންމެފަދަ ކަމެއްވެސް ކުރައްވަފާނެ ބޭފުޅެއްކަން ، ގިނަބަޔަކަށް ނޭނގި އޮވެދާނެއެވެ. އަމިއްލަ އެދުމެއް ފުއްދުމަށްޓަކައި ، ނިކަން ރީތިކޮށް ، ކޮންމެފަދަ ޑްރާމާއެއްވެސް ކުޅުއްވަފާނެއެވެ. ދެއްކުންތެރިކަމަށްޓަކައި ކޮށްފަ ނުކުރާނެ ކަމެއް ނޯންނާނެއެވެ. ރައްޔިތުންގެ މަޞްލަޙަތެއް ނޯންނާނެއެވެ. އަމިއްލަ ފަރުދަކަށްލިބޭ ގެއްލުމަކަށް ، ކަހަރުވަކެކޭވެސް ހިތަށް ނާރާނެއެވެ. އޮޅުވައިލުމެއްގެ ތެރެއިން ކަމެއްދެއްކެން އޮތްނަމަ އެކަމެއް ނުދައްކަވައި ދޫކޮށެއް ނުލައްވާނެއެވެ. ފައުޅުކަން ބޮޑުގޮތެއްގައި ، އެމްޑީޕީގެ ސަރުކާރަށް ، އެމްޑީޕީގެ ލީޑަރު ފާޑުވިދާޅުވެ ، ވަގަށް ގޮވުމަކީ ، އޭގެތެރެއިންވާ ކަމެކެވެ.
ރައްޔިތުންގެ މަޖިލީހުގެ ރައީސްކަން ހޯއްދެވުމަށް އެކުޅުއްވި ޑްރާމާއަކީ ، ރައީސް ނަޝީދަކީ ކިހާވަރެއްގެ ކާކުކަން ، ގިނަބަޔަކަށް އެނގިގެންދިޔަ ކަމެކެވެ. މަޖިލީހުގެ ރައީސްކަން ހޯއްދެވުމަށް ، ރައްޔިތުންގެ މަޖިލީހުގެ ވިލުފުށީ ދާއިރާގެ މެންބަރު އަލްފާޟިލް ޙަސަން ޢަފީފާއި ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް އާ ދެބޭފުޅުން ލައްވައި ، އެކުޅުއްވި ޑްރާމާއެއް ނުކުޅުއްވިޔަސް ، މަޖިލީހުގެ ރައީސްކަން ރައީސް ނަޝީދަށް ހޯއްދެވިދާނެއެވެ. މަޖިލީހުގެ އަޣުލަބިއްޔަތު އޮތީ އެމްޑީޕީގެ އަތްމަތީގައެވެ. ކޮންމެހެން ، ޑްރާމާއެއްކުޅެ ، އިތުރު ބަޔަކު ލައްވައި ރައީސްކަމަށް ކުރިމަތިލައްވައި ، ރައީސް ނަޝީދު މަޖިލީހުގައި އިންނަވަނިކޮށް ، އެހެން މީހަކު މަޖިލީހުގެ ރައީސްކަމަށް ޤާބިލުނޫންކަމަށް ނުދެއްކިޔަސް ، އެކަން ޙާޞިލް ކުރެވިދާނެއެވެ. އެހެންނަމަވެސް ، އެކަމުގައިވެސް އިސްކުރެއްވީ ، ދެއްކުންތެރިކަމާއި ތިމާވަރުގެ މީހެއްނެތްކަން ދެއްކުމުގެ ރޫޙީ ފަލްސަފާއެވެ. ޢަފީފާއި އަސްލަމް ލައްވައި ބޮޑު ސިޔާސީ ޑްރާމާއެއް ކުޅުއްވައި ، ބަޔަކުލައްވައި އާދޭސް ކުރުއްވައިގެން ، މަޖިލީހުގެ ރައީސްކަން ޤަބޫލުކުރެއްވިކަން ، ވަރަށް ރީތިކޮށް ދެއްކެވިއްޖެއެވެ.
ދެން އޮތީ ، ލޯކަލް ކައުންސިލް އިންތިޚާބުގައި އެމްޑީޕީ ބަލިވުމެވެ. އެއީ ރައީސް ނަޝީދަށް ލިބިވަޑައިގެންނެވި ނާކާމިޔާބީއެކެވެ. އެހެނީ އެމްޑީޕީގެ ހުރިހައިކަމެއް ގޮސް ، ހުސްވަނީ އަދި ހުއްޓެނީވެސް ރައީސް ނަޝީދާ ހަމައިންކަމަށްވާ ތީއެވެ. ސަރުކާރު ހިނގާގޮތަށް ފާރަ ލުމާއި މަޖިލިސްތެރެއިން ކުރައްވާކަމެއް ކުރައްވައި ، އިންޒާރު ދެއްވައި ، ބިރުދައްކަވައި ، ހަމަމަގަށް އަޅުއްވަނީ ، މަޖިލީހުގެ ރައީސް ، ރައީސް ނަޝީދެވެ. ޖުޑިޝަރީން ، ނޭއްގާނިކަމެއް ހިނގާނަމަ ، އެކަމެއް ހަމަމަގަށް އެޅުއްވުމަށް މަޖިލީހުން އިސްނަންގަވަނީ ، ރައީސް ނަޝީދެވެ. ވަޒީރުންގެ އިތުބާރުނެތްކަމުގެ މައްސަލަތަކަށް ހުޝިޔާރުވެ ، ވަޒީރުންގެ ޢަމަލުތަކަށް ފާރަލައްވައި ، ހަމަމަގަށް އަޅުއްވަނީ ، ރައީސް ނަޝީދެވެ. ސަރުކާރުންވެސް ، މަޖިލީހުންވެސް ، އަދި ޖުޑީޝަރީންވެސް ، އެމްޑީޕީގެ މެންބަރުންނާއި ޤައުމީ ސިޔާސަތުގެ ތެރެއިންވެސް ، ޢާންމު ފަރުދުންނަށްވެސް ، ކޮންމެ ކޮންމެ ގޮތަކަށް އުޅެ ، ކޮންމެ ކަމެއް ، އެބަޔަކު ކުރާނެގޮތަކަށް ކުރުމަށް އޮންނަ ފުރުޞަތު ، ރައީސް ނަޝީދުގެ މަސައްކަތްޕުޅުން އޮންނަނީ ހަނިކުރައްވާފައެވެ. މިފަދަ ގޮތަކަށް ވިލަރެސްކުރެވިފައި އޮންނަ ސިޔާސީ ވިއުގައެއްގައި ، އިންތިޚާބުތަކުގައި ، އެމްޑީޕީ އަށް ލިބޭ ނާކާމިޔާބީގެ ޒިންމާ ، އެމްޑީޕީގެ ލީޑަރުން ނުއުފުއްލަންޏާ ، ދެން އެކަން ކުރާނީ ކާކުތޯއެވެ ؟ އެމްޑީޕީގެ ޑިމޮކްރެޓިކް ވިސްނުމާއި ފިކުރާ ޚިޔާލާތުން ، ރައްޔިތުންނަށް ފޮނިމީރުކަން ގެނެސްދޭނީ ދެން ، އެހެން ކާކުތޯއެވެ ؟
ބަނދެވި ކަސްތަޅު އެޅިފައިވާ ، ޚުދުމުޚުތާރު ، ސިޔާސީ ވިސްނުމަކާއި ފިކުރާއި ޚިޔާލާތުގެ ތެރެއިން ، ރައީސް ނަޝީދުގެ ޢަމަލުތައް ބައްޓަން ކުރެވި ، ތަރުތީބު ކުރެވިފައި އޮންނަގޮތުން ، އެމްޑީޕީގެ އެތެރޭގައި ބައިބައިވުން އޮތްކަމުގެ ވަސް ، އެބަދުވައެވެ. ދިވެހިރައްޔިތުން ، އެމްޑީޕީއަށް ރައްޔިތުންގެ މަޖިލީހުގެ ފުރިހަމަ އަޣުލަބިއްޔަތު ދިނީ ، ބަނޑުގައި ނެތްތަނަށް ކާކަށް ނޫނެވެ. ކައިއުޅުމަށް ދީނީގޮތުންވެސް ހަމަތަކެއް ހުރެއެވެ. ތިންބައިކުޅަ އެއްބަޔަށް ކާނާއެވެ. އަނެއް ދެބައިން އެއްބަޔަށް ފެނެވެ. ދެން އޮތްބައި ބާއްވާނީ ނޭވާލުމަށް ހުހަށެވެ. ވެރިކަމުގެ ބާރުތައްވެސް އެތުރިފައި އެއޮތީ މިބީދައިންކަމުގައި ބަލަމާ ހިންގަވާށެވެ. ތިންބާރުންކުރެ އެއްބާރަކުންވެސް ބަނޑުފުރާ ، ނުވަތަ ބަނޑުގެ ނެތްތަނަށް ކައިފިއްޔާ ، އަނެއް ބާރުގެ ސަރަޙައްދަށް ވަދެވޭނެއެވެ. އެހެންނަމަވެސް ، މިއަދު މިފެންނަނީ މުޅި އޮޑީގައި ޙަސަނުދެފައި އޮންނަ ތަނެވެ. ނުބެހޭކަ ، ކަމެއް ނޯވެއެވެ. ވެރިކަމުގެ އަނެއް ދެބާރަށް ، ހުސްކޮށްބޭއްވޭ ޖާގައެއް މަޖިލީހަކުން ނުފެނެއެވެ. ލޯކަލް ކައުންސިލްގެ ކެމްޕޭނުގައި އެހިނގައިދިޔަ ކަންކަމަކީ ، ރައްޔިތުންނަށް ދެވުނު މަޢުލޫމާތަކީވެސް ، ރައްޔިތުން ބަލައިގަތް ކަންތައްތަކަކަށް ނުވިއެވެ. ލޯކަލް ކައުންސިލް އިންތިޚާބުގައި އެމްޑީޕީއަށް ލިބުނު ނާކާމިޔާބަކީ ، މިހުރިހައިކަމެއްގެ ނަތީޖާއެވެ.
ލޯކަލް ކައުންސިލް އިންތިޚާބުގެ ވަގުތީ ނަތީޖާއާ ގުޅިގެން ، އިވެންފެށި އަޑަކީ ، އެއީ ޑިމޮކްރަސީއަށް ލިބުނު ކާމިޔާބީއެއް ކަމުގައެވެ. އެހެންކަމަށް ވަންޏާ އެމްޑީޕީއަށް ލިބުނު ނާކާމިޔާބީގެ މާނަޔަކީ ، ޑިމޮކްރަސީ ނަގަހައްޓައި ދެމެހެއްޓުމުގައި ، އެމްޑީޕީ ފެއިލްވުމެވެ. ލޯކަލް ކައުންސިލް އިންތިޚާބުގައި ، އެމްޑީޕީން ބޭނުންވާ އެތައް ގޮނޑިތަކެއް ގެއްލިގެން ދިޔައީ ، ރައްޔިތުންނަށް ޤަބޫލުނުކުރެވޭ ކަންތައްތަކެއް އެމްޑީޕީގެ އެތެރޭގައި ހުރުމުންނެވެ. ޚުދު އެމްޑީޕީގެ މެންބަރުންނަށްވެސް ޤަބޫލުނުކުރެވޭ ކަންތައްތަކެއް ޕާޓީގެ ތެރޭގައި ހިނގަމުންދާތީއެވެ. މާލޭގެ މޭޔަރކަމަށް ޑރ. މުއިއްޒު ހޮވިގެންދިޔައީ ، ކޮންމެހެން ޑރ. މުއިއްޒަށް އޮތް ތާއީދު ބޮޑުވެގެންކަމަށް ނުވެ ހިނގައިދާނެއެވެ. އަދި އެއީ ރައީސް ޔާމީނަށް ނުޙައްޤު އަނިޔާތަކެއް ލިބިގެންދާތީއެއް ނޫނެވެ. ރައްޔިތުން އެދިން މެސެޖަކީ ، ސަރުކާރަށް ދިން މެސެޖެއްނޫނެވެ. އެއީ ، އެމްޑީޕީއަށް ދިން މެސެޖެވެ. އެމްޑީޕީގެ މެންބަރުންނާއި ލީޑަރޝިޕަށް ، އަޑުހަރުކޮށް އިއްވުނު އިންޒާރުގެ ރަނގަބީލެކެވެ.
އެމްޑީޕީއަކީ ، ޑިމޮކްރަޓިކް އިޞްލާޙީ ބަދަލުތަކުން ، ދިވެހިރައްޔިތުން ބާރުވެރިކުރުވައި ، އިންސާނީ ޙައްޤުތައް ކަށަވަރުކުރުމާއެކު ، ރައްޔިތުންގެ ލާބައާއި މަންފާހުރިމަގަށް ، ވެރިކަމުގެ ނިޒާމު ބަދަލުކޮށް ބަށްޓަންކުރުމަށް ، ދިވެހިރައްޔިތުންނަށް ވަޢުދުވަމުން ، ރައްޔިތުންގެ އިތުބާރާއި ލޯބިލިބިގެން ، ދިވެހިރާއްޖޭގެ ފުރަތަމަ ސިޔާސީޕާޓީއަށްވުމުގެ ފަޚުރާއެކު ، ދުނިޔެއަށް އުފަންވި ޕާޓީއެކެވެ. އެހެންނަމަވެސް ، ޕާޓީގެ ވިސްނުމާއި ފިކުރުއޮޅި ، ދިވެހިރައްޔިތުން ، އެމްޑީޕީއާ ވެރިކަން ޙަވާލުކުރި މަޤްޞަދާއި އުއްމީދުތައް ގެއްލި ، ޕާޓީގެ ހިންގުން އިންސާނީ ހަމަބުއްދިޔަށް ޤަބޫލުނުކުރެވޭފަދަ ޙާލަތަކަށް ބަދަލުވެގެންދާތަން ދެކެން ބޭނުންނުވާ އެތައް ބަޔަކު ތިބޭނެއެވެ. އެމްޑީޕީގެ ފިކުރަކީ ހަމައެކަނި އެކެއްގެ ފިކުރެއްނޫނެވެ. އެއީ އިޞްލާޙީ ވިސްނުމުން އިންސާނީ ޙައްޤުތަކާއި ކަރާމާތަށް އިޙްތިރާމްކޮށް ، އަބުރުވެރި ޤަދަރުވެރި ދިރިއުޅުމަކަށް އުއްމީދުކުރާ އެތައްބަޔެއްގެ ގުޅިފައިވާ ވިސްނުމެކެވެ. އެއީ ، ބާރުލިބޭހިނދު ، ﷲ ގެ ރަސްކަންފުޅު ހަނދުމަނެތިކޮށް ، ޢަޤީދާ ބަލިކަށިވެ ، ދީނާމެދު ސުއާލުކުރަން ޖާގަލިބޭގޮތަށް ، އަދި ނަޟާޙަތްތެރިކަން ގެއްލި ، ވިސްނުމުގައި ހަމަބުއްދި ނެތިގޮސް ، މަގުއޮޅިގެންދާފަދަ ވިސްނުމެއް ނޫނެވެ. އެމްޑީޕީގެ ފިކުރަކީ ، ރައްޔިތުންގެ ލާބައާއި މަންފާހުރި މަގުން ގުޅި ، ލާމެހި އެމުނި އެތުރިފައިވާ މަތިވެރި ފިކުރެކެވެ.
ކޮރަޕްޝަނަކީ ، ރައީސް ނަޝީދު ، ރާއްޖޭގެ ރައީސުލްޖުމްހޫރިއްޔާގެ މަޤާމުގައި ހުންނެވިއިރު ، އެ ވެރިކަމުގައިވެސް ނެތް އެއްޗެއްނޫނެވެ. އެމްޑީޕީގެ ފުރަތަމަ ވެރިކަމުގައިވެސް އޮތް އެއްޗެކެވެ. މިހާރުގެ (އެމްޑީޕީގެ) ސަރުކާރުގައި ކަރަޕްޝަން އޮވެގެން ކޯފާވާންޖެހޭ ސަބަބެއް ނޭނގެއެވެ.
ރައީސުލްޖުމްހޫރިއްޔާ އަލްފާޟިލް އިބްރާހީމް މުޙައްމަދު ޞާލިހާއި ، ކުރީގެ ރައީސް މުޙައްމަދު ނަޝީދާ ދެމެދު އޮންނަ މައްސަލައަކީ ކޮރަޕްޝަންގެ މައްސަލަކަމަށް ރައީސް ނަޝީދު ވަނީ ވިދާޅުވެފައެވެ. އަދި ( ވެންޓިލޭޓަރުތަކުގެ ) ކޮރަޕްޝަންގެ މައްސަލަ ނެތްނަމަ ، އެމަނިކުފާނާއި ރައީސުލްޖުމްހޫރިއްޔާއާ ދެމެދު އެއްވެސް މައްސަލައެއް ނުއުފެދޭނެ " ކަމުގައިވެސް ރައީސް ނަޝީދު ވަނީ ވިދާޅުވެފައެވެ. އެހެންނަމަވެސް ، ކޮރަޕްޝަނަކީ ، ރައީސް ނަޝީދު ، ރާއްޖޭގެ ރައީސުލްޖުމްހޫރިއްޔާގެ މަޤާމުގައި ހުންނެވިއިރު ، އެ ވެރިކަމުގައިވެސް ނެތް އެއްޗެއްނޫނެވެ. އެމްޑީޕީގެ ފުރަތަމަ ވެރިކަމުގައިވެސް އޮތް އެއްޗެކެވެ. މިހާރުގެ (އެމްޑީޕީގެ) ސަރުކާރުގައި ކަރަޕްޝަން އޮވެގެން ، މަޖިލީހުގެ ރައީސް ކޯފާވާންޖެހޭ ސަބަބެއް ނޭނގެއެވެ. ރައީސް ނަޝީދުގެ ވެރިކަމުގައި ، މަޖިލީހުގެ ރައީސަކީ ، މިހާރުގެ ފޮރިން މިނިސްޓަރ ޢަބްދުﷲ ޝާހިދެވެ. ރައީސް ނަޝީދުގެ ވެރިކަމުގައި ހިނގާފައިވާ ކަރަޕްޝަނުގެ ޢަމަލުތައް ދެނެގަނެ ، ޢަބްދުﷲ ޝާހިދު ، އެކަމާ ކޯފާވެގެންނެއް ނޫޅުއްވައެވެ. ތިރީގައި އެވަނީ ރައީސް ނަޝީދުގެ ވެރިކަމުގައި ހިނގާފައިވާ ކަރަޕްޝަނުގެ ޢަމަލުތަކުން ޢަމަލެކެވެ.
ކަމިޝަނަރ އޮފް ޕޮލިސް އަޙްމަދު ފަޞީޙުގެ އަރިހަށް ،
ވެދުން ސަލާމަށްފަހު ދަންނަވަމެވެ.
މިކުންފުނިން ސިވިލްކޯޓަށް ހުށަހަޅާފައިވާ މަސްއަލަޔަކާގުޅިގެން ، ފުރިޔަނުދީ ޕާސްޕޯޓު ހިފެހެއްޓުމަށް ، ޑިޕާޓްމަންޓް އޮފް އިމިގްރޭޝަން އެންޑް އެމިގްރޭޝަނުގެ މައްޗަށް ، 15 ނޮވެމްބަރ 2011 ގައި ސިވިލް ކޯޓުން އަމުރު ނެރެފައިވަނިކޮށް ، އެ އަމުރަށް ކިޔަމަން ނުވެ ، ޗައިނާގެ ރައްޔިތެއްކަމުގައިވާ ، ތިރީގައި ދަންނަވާފައިވާ މީހާ ވަނީ ، އެދުވަހުގެރޭ ހޮންގކޮންގއަށް ފުރި ފްލައިޓަކުން އިމިގްރޭޝަނުން ފުރުވާލާފައެވެ.
Ms. Zhang Yang (Zeenia) Chinese Passport No. G.34175144
އިމިގްރޭޝަނުން މީނާ ފުރުވާލާފައިވަނީ ، މީނާ ފުރުވާނުލުމަށް ، ކަނޑައެޅިގެން ކޯޓު އަމުރު ނެރެފައި ވަނިކޮށެވެ. މީނާ ފުރުވާލާފައިވަނީ ، އިމިގްރޭޝަނުގެ އޮފިސަރުންނަށް ރިޝްވަތުދީގެންކަމަށް ފެނެއެވެ.
މިހެންވެ ، މިމައްސަލަ ތަޙުޤީޤުކޮށް ، ބައްލަވައިދެއްވާ ، މި ޒަންގ ޔަންގ އާއި ، މިކަމުގައި ބައިވެރިވި އިމިގްރޭޝަން އޮފިސަރުންނާމެދު ޤާނޫނީގޮތުން ތިޔަތަނުން އަޅުއްވަން ޖެހޭ ފިޔަވަޅު އަޅުއްވައިދެއްވުން އެދި ދެންނެވީމެވެ. އަދި މީނާ ފިލައިގެން އެދިޔައީ ، ރާއްޖޭގެ ޤާނޫނާއި ޤަވާޢިދުތަކަށް ބޯ ނުލަނބާ ، އަދި އިމިގްރޭޝަނުގެ އޮފިސަރުންނަށް ރިޝްވަތުދީގެންކަމަށް ފެންނާތީ ، މީނާ ރާއްޖެ ގެނެވޭނެގޮތެއް ހަމަޖައްސަވައިދެއްވާ ، މިކުންފުންޏަށް ގެއްލިފައިވާ ޙައްޤު ހޯއްދަވައިދެއްވުން އެދި ދެންނެވީމެވެ.
އިޙްތިރާމް ޤަބޫލުކުރެއްވުން އެދެމެވެ.
20 ނޮވެމްބަރ 2011
ޚާދިމުކުމް
އަޙްމަދު ނަޒްމީ
ޖެނެރަލް މެނޭޖަރ
މަތީގައި އެވަނީ ، ދިވެހި ޓްރެވަލް އެޖެންސީއަކަށް ކުރިމަތިވި މައްސަލައެކެވެ. އެމައްސަލައިގާ އެކުންފުންޏަށް ލިބިފައިވާ ގެއްލުމުގައި ، ބިދޭސީ 5 މުއައްޒަފުންނާއި 12 ދިވެހިންގެ ވަޒީފާ ގެއްލިފައި ވެއެވެ. މީގެ އިތުރަށް ، ދިވެހިރުފިޔާއިން 5 މިލިއަނަށްވުރެ ގިނަރުފިޔާ ގެއްލުންވެ ، ޓްރެވަލް އެޖެންސީ ބަންދުކުރަން ޖެހުނެވެ.
ސިޓީގައި ބަޔާންކުރެވިފައިވާ ، ޗައިނާގެ އަންހެންމީހާ ފުރައިގެން ދިޔައީ ، ސިވިލް ކޯޓުގެ ޙުކުމް ބޮލައިލާ ޖަހައި ، އިމިގްރޭޝަނާއި އެއަރޕޯޓުގައި ތިބި ފުލުހުންގުޅިގެން ، ރޭވިގެންދިޔަ ކަރަޕްޝަނުގެ ޢަމަލަކުންނެވެ. އޭރު އިމިގްރޭޝަނުގައި ހުރި ކޮންޓްރޯލަރ ޢަބްދުﷲ ޝާހިދަކީ ، ޤާނޫނު އަރާ ހަމަކުރާ މީހަކަށް ނުވިއެވެ. ސަރުކާރުގެ ކަމާގުޅޭ އެތައް މުއައްސަސާއަކަށް މިމައްސަލަ ހުށަހެޅުނެވެ. އަދި ޚުދު ރައީސުލްޖުމްހޫރިއްޔާ މުޙައްމަދު ނަޝީދަށްވެސް ސިޓީ ލިޔެވުނެވެ. ރައީސުލްޖުމްހޫރިއްޔާގެ އޮފީހަށާއި ސަރުކާރުގެ އެތަން މިތަނަށް އެކުންފުނިން ލިޔުނު ސިޓީތަކުން ، ޑިފެންސް މިނިސްޓްރީ ފިޔަވައި އެހެން ތަނަކުން ޖަވާބެއްދީފައެއް ނުވެއެވެ. އެމިނިސްޓްރީން ޖަވާބުދިނީ ، އެއީ މަދަނީ މައްސަލައެއް ކަމަށްވާތީ ، ސިވިލްކޯޓަށް މައްސަލަ ހުށަހެޅުމަށެވެ. ސަރުކާރުގެ މުއައްސަސާއަކުން ، ސިވިލްކޯޓުގެ ޙުކުމަކަށް ތަބާނުވުން އެއީ މަދަނީކަމަކަށްވެ ، އެހިސާބުން އެނިމުނީއެވެ. އެންޓި ކަރަޕްޝަން ކަމިޝަނުންވެސް ކަހާތަން ހިރުވައިވެސް ނުލިއެވެ.
މިއީ ރައީސް ނަޝީދުގެ ވެރިކަމުގައި ، ރައީސް ނަޝީދަށް އެނގިވަޑައިގެން ، ހިނގާފައިވާ ކަރަޕްޝަނުގެ ޢަމަލުތަކުން ޢަމަލެކެވެ. މިފަދަ އެތައްކަމެއް ހިނގާފައި އޮތުމަކީ އެކަށީގެންނުވާ ކަމެއްނޫނެވެ. އިންޞާފާއި ޙައްޤު ކަށަވަރުކުރުމަށް ވަޢުދުވެ ، ވެރިކަމަށް އައި އެމްޑީޕީގެ އޭރުގެ ވެރިކަމުގައި ، މުޙައްމަދު ނަޝީދު ، ރައީސުލްޖުމްހޫރިއްޔާގެ މަޤާމުގައި ހުންނެވިއިރު ، މިފަދަ ކަރަޕްޝަނުގެ ޢަމަލުތައް ހިނގިއިރު ، މިހާރު ، ކަރަޕްޝަނާހުރެ ރައީސް ނަޝީދު ކޯފާވާން ޖެހޭ ސަބަބެއް ނޭނގެއެވެ. އެހެންކަމުން ރައީސް ނަޝީދު ކޯފާއެވަނީ ، ކަރަޕްޝަނާހުރެ ކަމަށް ބެލެވޭނެ ޖާގަ ވަރަށް ކުޑައެވެ. އެއީ އެހެން ކަމަކަށް ވެދާނެއެވެ.
ރާއްޖޭގައި ނުކުންނަ ބައެއް ނޫސްތަކުން މަޢުލޫމާތު ލިބޭ ގޮތުގައި ، ރާއްޖޭގެ ވެރިކަން ބަރުލަމާނީ ނިޒާމަށް ބަދަލުކޮށް ، ރައީސް ނަޝީދު ބޮޑުވަޒީރަކަށްވެވަޑައިގަތުމުގެ ފުރުޞަތު ފަހިކޮށްދެއްވުމަށް ، ރައީސް އިބްރާހީމް މުޙައްމަދު ޞާލިޙުގެ އަރިހުގައި ރައީސް ނަޝީދު އެދިވަޑައިގެންފިއެވެ. ރާއްޖޭގެ ވެރިކަމުގެ ނިޒާމު ބަދަލުކުރެވޭނީ ރައްޔިތުންނަށެވެ. އެމްޑީޕީން ބޭނުންވިޔަސް ، އަދި ރައީސް ނަޝީދު ބޭނުންވިޔަސް ، ބަރުލަމާނީ ނިޒާމަށް ރައްޔިތުން އެއޮތީ 18 އޯގަސްޓް 2007 ގައި ނޫނެކޭ ބުނެފައެވެ. ރައްޔިތުންގެ އެނިންމުމާއި ދިވެހިރާއްޖޭގެ ޤާނޫނާޚިލާފަށް ، ރައީސް އިބްރާހީމް މުޙައްމަދު ޞާލިޙު ، އެއްވެސް ފިޔަވަޅެއް ނުއަޅުއްވާނެއެވެ.
ވެރިކަމުގެ ނިޒާމު ، ރިޔާސީ ނިޒާމުން ބަރުލަމާނީ ނިޒާމަށް ބަދަލުވީމައި ، ރައީސަކު އިންތިޚާބުކުރަން އިންތިޚާބެއް ބާއްވާކަށް ނުޖެހޭނެއެވެ. ރައީސް ނަޝީދަށް ޤައުމު ހިންގަން ފުރުޞަތެއް ލިބޭނެ ހަމައެކަނި ގޮތަކީ ބަރުލަމާނީ ނިޒާމަށް ރާއްޖޭގެ ވެރިކަން ފުރޮޅައިލުމެވެ. އެކަމެއްވެސް ނުކުރެވޭނެއެވެ. އެހެނީ ، ރައްޔިތުންގެ ވޯޓަކުން ، ރައީސަކަށް ހޮވޭވަރަށްވުރެ ، އަދި ރައީސް ނަޝީދު ބޭނުންވާ ގޮތަކަށް އެއްބަސްވެ ވޯޓުދޭ ވަރަށްވުރެ ، ރައީސް ނަޝީދުގެ މަޤްބޫލުކަން ގެއްލިއްޖެއެވެ. އެކަން އެހެން ދިމާވި ސަބަބުތައް ރައްޔިތުންނަށްވެސް ، އެމްޑީޕީގެ ޢާންމު ، ގިނަ މެންބަރުންނަށްވެސް އެނގެއެވެ. އެހެންކަމުން މައްސަލަޔަކީ ކަރަޕްޝަނެއްނޫނެވެ. ވެރިކަމެވެ. އެކަން އެންމެފަހުން ސާފުކޮށް އެ އެނގުނީއެވެ. ރައީސް ނަޝީދަށް މީހުން މަލާމާތްކުރާ ވަރުގެ އަމިއްލައެދުންބޮޑު ޢަމަލަކުންނެވެ. އެމްޑީޕީގެ ވެރިކަމަށް 3 އަހަރުވަންދެންވެސް ނުހުރެވިގެން ، ބޮޑުވަޒީރުކަން ބޭނުންވާ ވާހަކަ ، ލަދެއްނެތި ސަރުކާރަށް ހުށަހެޅީއެވެ. ރައްޔިތުންގެ ވޯޓަކާނުލައި ރައީސް ނަޝީދަށް ، ރާއްޖޭގެ ވެރިކަމަށް ހަނިގޮތަކަށް ވަޑައިގެންނެވޭނެ ހަމައެކަނި މަގަކީ އެއީއެވެ. އެއީ ، ވެރިކަމުގެ އެދުމުގައި ، ކޮންމެފަދަ ކަމެއްވެސް ކުރައްވަފާނެ ބޭފުޅެއްކަން ސާފުވީއެވެ. މައްސަލަޔަކީ ކަރަޕްޝަން ނޫންކަމާއި ، މައްސަލަޔަކީ ވެރިކަމުގެ ދަހިވެތިކަންކަމުގައިވެސް އެނގި ސާފުވީއެވެ.
