އެއް ދުވަސް ތެރޭގައި ކޯވިޑް 19 އަށް ޕޮޒިޓިވް އަދަދު ރެކޯޑް އަދަދަކަށް ދަށަށް ގޮސްފިއެވެ. މިއަދު ޕޮޒިޓިވްވީ އެންމެ 14 މީހުންނެވެ.
ކޯވިޑް ކޭސްތައް އޯގަސްޓް މަހުން ފެށިގެން އިތުރުވި ފަހުން ބަލިޖެހުނު މީހުންގެ އެދަދު މިހާބޮޑަށް ދަށަށް ދިޔައީ މިއަދުއެވެ. މީގެ ކުރިން އެއްދުވަސް ތެރޭގައި ކޯވިޑަށް ޕޮޒިޓިވް އަދަދު އެންމެ ދަށަށް ގޮސްފައިވަނީ 16 އަށެވެ. އެއީ މިދިޔަ އޮކްޓޫބަރު 31 ގައެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ތަފާސްހިސާބުން ދައްކާގޮތުން މިއަދު އިރުއޮއްސި ހަޔަކާހަމައަށް ވޭތުވެދިޔަ 24 ގަޑިއިރުތެރޭގައި ކޮވިޑަށް ޕޮޒިޓިވް އަދަދު 14 ގައި ހުރީ ޓެސްޓުކުރި 1816 ސާމްޕަލްގެ ތެރެއިންނެވެ. އަލަށް ބަލި ޖެހުނު މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި އަށް މީހުންނާއި މީހުން ދިރިއުޅޭ ރަށްރަށުން އަލަށް ޕޮޒިޓިވް ދެމީހުންގެ އިތުރުން ރިސޯޓަކުން ޕޮޒިޓިވް ތިން މީހުންނާއި ތަރައްގީ ކުރާ ރަށަކުން ޕޮޒިޓިވް މީހެކެވެ. މިޢަދަދާއެކު ކޯވިޑް ޖެހުނު މީހުންގެ ޖުމުލަ ޢަދަދަކީ 12947 އެވެ. ބަލިން ރަނގަޅުވި މީހުންގެ ޢަދަދު 11781 އަށް އަރައިފައިވާއިރު މިހާރު ބަލި ޖެހިފައި ތިބީ 1113 މީހުންނެވެ. އޭގެ ތެރެއިން ހޮސްޕިޓަލުގައި ފަރުވާ ދެމުން ދަނީ 92 މީހުންނަށެވެ.
