ޤައުމުގެ މުސްތަޤްބަލަށް ކުރެވޭ އުއްމީދުތަކުގެ ހަޤީޤީ މޭސްތިރިންނަކީ އެޤައުމެއްގެ ޒުވާނުންކަމަށް މިއަދުގެ ހުކުރު ޚުތުބާގައި ވިދާޅުވެއްޖެއެވެ.
ޤައުމެއްގެ އެންމެ އަގުބޮޑު ރައުސްމާލަކީ ޒުވާނުންކަން ފާހަގަކޮށް ޚުޠުބާގައި ވިދާޅުވީ ޤައުމެއް ތަރައްޤީވެ ކުރިއަރައި ދިއުން ބިނާވެފައި ވަނީ، އެޤައުމެއްގެ ޒުވާނުންގެ ހުނަރާއި، ސުލޫކާއި އެމީހުންގެ ހަރުދަނާ އަޤީދާމައްޗަށްކަމަށެވެ. އެހެންކަމުން އިސްލާމްދީނުގައި ޒުވާނުންނަށް ރަނގަޅު އިސްލާމީ ތަރުބިއްޔަތެއް ދީ، ހަރުދަނާ ޤާބިލް ބަޔަކަށް ހެދުމަށް ވަރަށް ބޮޑަށް ބާރުއަޅާފައިވާކަން ފާހަގަކުރެއްވިއެވެ.
"ހަރުދަނާ އީމާންތެރި ޒުވާނުންނަކީ އެމީހުންގެ ނަފަސާއި މުދަލުންވެސް ދީނާއި ޤައުމަށްޓަކައި ޤުރުބާނީ ވާނެބައެކެވެ. ﷲގެ ދީން ހިމާޔަތްކޮށް، އެދީނަށް ނަސްރުދީ، އަދި ޤައުމަށް ދިމާވާ ކޮންމެ ނުރައްކާތެރި ވަގުތެއްގައި ޤައުމު ދިފާޢުކުރުމުގައި އިސްސަފުގައި ތިބޭނެ ވަރުގަދަ ފަހުލަވާނުންނެވެ." ޚުތުބާގައި ވިދާޅުވިއެވެ. މިފަދަ ޒުވާނުންނާ ބެހޭ ގޮތުން ކީތިރި ޤުރްއާންގައި މާތްﷲ ވަހީކުރައްވައިފައިވާ ބަސްފުޅުތަކާއި ކީރިތި ރަސޫލާގެ ހަދީސްފުޅުތަކުންނާއި އެކަލޭގެ ފާނުގެ ޙަޔާތްޕުޅުން ޚުތުބާގައި ވަނީ ދަލީލްތަކާއި މިސާލުތައް ދައްކަވައިފައެވެ.
ހެޔޮލަފާ މުޖުތަމަޢެއް ބިނާކުރުމަށާއި ތަރައްޤީއާއި ތަހްޒީބްގެ އާ އުސްމިންތަކަކަށް ވާޞިލްވުމަށްޓަކައި ރާއްޖޭގައިވެސް ގިނަގުނަ މަސައްކަތްތަކެއް ކުރަންޖެހިފައިވާކަން ޚުޠުބާގައި ފާހަގަ ކުރެއްވިއެވެ. މިމަސައްކަތްތައް ކާމިޔާބުވަނީ ޤައުމުގެ ޒުވާނުންނާއި ހެދިބޮޑުވަމުން އަންނަ ޖީލަކީ ހެޔޮލަފާ ބަޔަކަށް ވެގެންކަން ފާހަގަ ކުރެއްވިއެވެ. އަދި މަސައްކަތްތެރި، މުރާލި، ހީވާގި ޒިންމާދާރު ބަޔަކަށްވެސް ވެގެންކަން ފާހަގަ ކުރެއްވިއެވެ.
"ޝައްކެތްނެތް ގޮތުގައި ޒުވާނުންނަކީ މިޤައުމުގެ އުއްމީދެވެ. ކޮންމެ ޒުވާނަކަށްލިބޭ ދެރައަކީ ނުވަތަ ހިތާމައަކީ ނުވަތަ ނިކަމެތި ކަމަކީ އެކަމުގެ މައްޗަށް އެޒުވާނުންގެ އާއިލާތަކާއި މުޅި ޤައުމު ހިތާމަކުރާނޭ ކަމެކެވެ." ޚުތުބާގައި ވިދާޅުވިއެވެ.
ޚުޠުބާގައި ވިދާޅުވީ އިސްލާމްދީން ގޮވާލަނީ ޒުވާންކަމުގެ ޢުމުރު މާތްﷲއަށް ކިޔަމަން ގަތުމުގައި ހޭދަކުރުމަށްކަމަށެވެ. އަޅުކަންކުރުން މަތީގައި ހެދިބޮޑުވަމުން އަންނަ ޒުވާނާއަށް ﷲ ތަޢާލާ ޤިޔާމަތްދުވަހުން ވަރަށް މަތުވެރި ދަރަޖައާއި ޝަރަފެއް ދެއްވައިފައިވާކަމަށެވެ. އެއީ ޤިޔާމަތްދުވަހު ޢަރުޝީގެ ހިޔާވަހިކަން ލިބޭނެ ޙަތްބައެއްގެ ތެރޭގައި ﷲ އަށް އަޅުކަން އަދާކުރުން މަތީގައި ބޮޑުވަމުން އަންނަ ޒުވާނާ ހިމެނޭކަން ރަޝޫލާ ޞައްލަﷲ ޢަލައިހިވަސައްލަމަގެ ހަދީސް ބަސްފުޅުގައި ފާހަގަ ކުރައްވައިފައިވުންކަން، ފާހަގަކުރެއްވިއެވެ.
"މިއީ ކޮންފަދަ މަތުވެރި ނަޞީބެއްހެއްޔެވެ.! މިނަޞީބް ޙާޞިލް ވުމަށް ނޭދޭނީ ފެހެ ކޮން ޒުވާނެއް ހެއްޔެވެ.؟ ޤިޔާމަތްދުވަހުގެ ބިރުވެރި މައިދާނުގައި މަޙްޝަރު ބިމުގައި، މީސްތަކުންނާ ކައިރިއަށް، މޭލެއްގެ މިންވަރަށް އިރު ކައިރިކުރެވޭ ހިނދުގައި، ތިޔަ ލޮބުވެތި ޒުވާނުންނަށް އަރްޝީގެ ހިޔާވަހިކަން ލިބޭނެ ގޮތް ﷲ ތަޢާލާ މިވަނީ މިންވަރު ކުރައްވައިފައެވެ. ވީމާ އެކަލާނގެއަށް ބިރުވެތިވެ، ނުހަނު ޝުކުރުވެރިވެ، އެކަލާނގެއަށް އަޅުކަންކުރުމުގައި، ޙަޔާތުގެ ވަގުތުތައް ހޭދަކުރުމަށް އަވަސްވެ ގަންނާށެވެ!" ޚުޠުބާގައި ވިދާޅުވިއެވެ.
އިސްލާމީ ގިއުގަނޑުގެ ތެރެއިން އުފާފާޅުކުރުމާއި ދަތުރުދިއުމާއި ހަފްލާތައް ބޭއްވުމަކީ ދީން މަނާކުރާކަމެއް ނޫންކަން ޚުތުބާގައި ޒުވާނުންނަށް ހަނދާންކޮށްދެއްވިއެވެ. ދީނުގައި މަނާވެގެންވާ ޙަރަކާތްތަކަށް ޖާގަ ނުދެއްވައި ކީރިތި ރަސޫލާ ޞައްލަﷲ ޢަލައިހި ވަޞައްލަމަގެ ޙަޔާތްޕުޅުގައި މިފަދަ ކަންކަމުން ނަމޫނާ ދައްކަވައިފައިވާކަން ޚުޠުބާގައި ފާހަގަ ކުރެއްވިއެވެ.
ޚުޠުބާގައި ވިދާޅުވީ ޤައުމު ފަޚުރުވެރިވާބަޔަކަށް ޒުވާނުން ހެދުމަށް މައިންބަފައިންގެ ޒިންމާ ފުރިހަމަ ގޮތުގައި އުފުލަންޖެހޭ ކަމަށެވެ. އަދި އެނޫންވެސް އެންމެހާ ޒިންމާދާރު ފަރާތްތަކުގެ ޒިންމާ އުފުލަންޖެހޭކަމަށެވެ. އެގޮތުން އެންމެ އިސްކަމެއްގެ ގޮތުގައި އިސްލާމީ އަޤީދާއާއި މަތިވެރި އަޚްލާޤެއްގެ މަތީގައި ޒުވާނުން ތަރުބިއްޔަތުކުރުމަށް ޚާއްޞަ ސަމާލުކަމެއް ދޭންޖެހޭކަމަށް ޚުތުބާގައި ފާހަގަ ކުރެއްވިއެވެ.
