ރާއްޖޭން ބޭރުގައި އުޅޭ ދިވެހިންނަށް އެހީތެރިކަން ފޯރުކޮށް ދިނުމުގެ ގޮތުން 4.4 މިލިއަން ރުފިޔާ ހޭދަކޮށްފައިވާ ކަމަށް ނެޝަނަލް އިމަރޖެންސީ އޮޕަރެޝަން ސެންޓަރ (އެންއީއޯސީ) އިން ވިދާޅުވެއްޖެއެވެ.
މިރޭގެ ޕްރެސް ކޮންފަރެންސް ގައި އެންއީއޯސީގެ ތަރުޖަމާނު މަބްރޫކް ޢަބްދުލް ޢަޒީޒު ވިދާޅުވީ މީގެ ތެރެއިން 1.9 މިލިއަން ރުފިޔާއަކީ އަސަންދައިން ފޯރުކޮށްދީފައިވާ އެހީއަށް ހޭދަވާ މިންވަރުކަމަށެވެ. މީގެ އިތުރުން ޒަކާތު ފަންޑުން ވެސް 2.5 މިލިއަން ރުފިޔާގެ އެހީތެރިކަން ފޯރުކޮށްދީފައިވާ ކަމަށެވެ. އަދި އެމްބަސީތަކުންނާއި ފޮރިންގ މިނިސްޓްރީން ވެސް ވަރަށްގިނަ އެހީތެރިކަމެއް ރާއްޖޭން ބޭރުގައި އުޅޭ ދިވެހިނަށް ފޯރުކޮށް ދެއްވަމުންދާކަމަށް ވެސް މަބްރޫކް ވިދާޅުވިއެވެ.
