ނޮވެލް ކޮރޯނާ ވައިރަހުން ޖެހޭ ބަލި، ކޮވިޑް- 19 ޖެހިގެން ނައިޖީރިޔާގެ ރައީސު މުޙައްމަދު ބުހާރީގެ ގެ ޗީފް އޮފް ސްޓާފް އައްބާ ކިޔާރީ އަވަހާރަވެއްޖެއެވެ. ބުނެވޭ ގޮތުުގައި ކިޔާރީ އަކީ ނައިޖީރިޔާގައި އެންމެ ނުފޫޒުގަދަ އެއް ބޭފުޅާއެވެ.
ނައިޖީރިޔާގެ ރިޔާސީ އޮފީހުން ނެރުނު ބަޔާނެއްގައި އައްބާ ކިޔާރީ "އަވަހާރަވިކަން ހިތާމަޔާއެކު އިއުލާންކުރާ" ކަމަށް ބުނެފައި ވެއެވެ.
"އަވަހާރަވީ ބޭފުޅާ ވަނީ ހަލުވިކަމާއެކު ފެތުރެމުންދާ ކޮވިޑް- 19 އަށް ޕޮޒިޓިވްވެފައި. އަދި ބައްޔަށް ފަރުވާ ހޯއްދަވަމުން ގެންދެވި ނަމަވެސް، 17 އެޕްރީލު 2020 ގައި އޭނާ ވަނީ އަވަހާރަވެފައި." އެ ބަޔާނުުގައި ވެއެވެ.
އަވަހާރަވީ އިރު އުމުރުފުޅުން 81 އަހަރުގެ ކިޔާރީއަކީ ކޮވިޑް- 19 ޖެހިގެން ނައިޖީރިޔާގައި ދުނިޔޭ ދޫކުރެއްވި އެެންމެ މަޝްހޫރު ޝަޚްސިއްޔަތެެެވެ. އެ ގައުމުގެ 493 މީހަކު މި ބައްޔަށް ޕޮޒިޓިވްވެފައި ވާއިރު، 17 މީހަކު ވަނީ މި ބަލީގައި މަރުވެފައެވެ.
ރައީސު މުޙައްމަދު ބުހާރީގެ އެންމެ އަރިސް އެޑްވައިޒަރުންގެ ތެރޭގައި ހިމެނިވަޑައިގަންނަވާ އަދި އެންމެ ނުފޫޒުގަދަ ބޭފުޅާ ކަމުގައި ބެލެވޭ އައްބާ ކިޔާރީއަކީ ކުރިންވެސް ތަފާތު ސިއްހީ މައްސަލަތަކަށް ފަރުވާ ހޯއްދަވަމުން ގެންދެވި ބޭފުޅެކެވެ. ބުނެވޭ ގޮތުގައި، ރައީސު ބުހާރީއާ ހަމަައަށް އެއްވެސް މީހަކަށް ދެވެނީ އޭނާގެ ހުއްދައާއެކުގައެވެ. ރައީސުގެ މުހިއްމު ބައްދަލުވުންތައް އިންތިޒާމު ކުރައްވަނީ ކިޔާރީ ކަމަށް ވާއިރު، މިނިސްޓަރުން ރައީސާ ބައްދަލުކުރެއްވުުމުގެ އިންތިޒާމުތައް ވެސް ހަމަޖައްސަވަނީ ކިޔާރީއެވެ.
އައްބާ ކިޔާރީ ކޮވިޑް- 19 އަށް ޕޮޒިޓިވްވެފައިވާކަން އެނގުނީ އޭނާ ޖަރުމަނަށް ކުރެއްވި ދަތުރުފުޅަކަށް ފަހު ގައުމަށް އެނބުރިވަޑައިގަތުމުން ހެދި ޓެސްޓުންނެވެ. 29 މާރިޗުގައި އޭނާ ނެރެއްވި ބަޔާނެއްގައި އޭނާ ލާގޯސްގައި ފަރުވާ ހޯއްދަވަމުން ގެންދަވާ ކަމަށާއި، ވަރަށް އަވަހަށް މަސައްކަތަށް އެނބުރިވަޑައިގަންނަވަން އުއްމީދުކުރައްވާ ކަމަށް ވިދާޅުވެފައި ވެއެވެ.
ރައީސު މުޙައްމަދު ބުހަރީ ކޮވިޑް- 19ގެ ޓެސްޓް ހެއްދެވިކަން ހާމަކުރައްވާފައެއް ނުވެއެވެ.
200 މިލިއަން މީހުންގެ އާބާދީއެއް އޮންނަ ނައިޖީރިޔާއަކީ، ކޮވިޑް- 19 ބޮޑަށް ފެތުރިއްޖެނަމަ ނާޒުކު ހާލަތަކަށް ދާނެ ގައުމެއް ކަމަށް ތަޖުރިބާކާރުން ބުނެއެވެ. ސަބަބަކީ ގައުުމުގެ ސިއްހީ ނިޒާމުގެ ނިކަމެތިކަމާއި، ބޮޑެތި ރަށްރަށުގައި އާބާދީ ތޮއްޖެހިފައި އޮތުމެވެ.
ދުނިޔޭގައި ކޮވިޑް- 91 ޖެހިފައިވާ މީހުންގެ އަދަދު 2.28 މިިލިއަނަށް އަރާފައި ވާއިރު، މިބަލީގައި 1 ލައްކަ 50 ހާހަށްވުރެ ގިނަ މީހުން ވަނީ މަރުވެފައެވެ.
