ސިނަމަން ހަކުރާހުރާއިން ކޮވިޑް-19 އަށް ޝައްކު ކުރެވޭ މީހަކު ފެނިގެން އެއާ ގުޅިގެން 62 މީހަކު އެކަހެރިވުމަށް ހެލްތު ޕްރޮޓެކްޝަން އެޖެންސީ (އެޗުޕީއޭ) އިން އަންގައިފައިވާ ކަމަށް ރައީސް އޮފީހުގެ އަންޑަރސެކްރެޓަރީ މުހައްމަދު މަބްރޫކް އަބްދުލް އަޒީޒު ވިދާޅުވެއްޖެއެވެ.
ކޮވިޑް-19 އާ ބެހޭ ގޮތުން ނޫސްވެރިންނަށް މައުލޫމާތު ދެއްވުމަށް ދަރުބާރުގޭގައި މިއަދު ބޭއްވި ނޫސްވެރިންގެ ބައްދަލުވުމެއްގައި އޭނާ ވިދާޅުވީ އެކަމާ ގުޅިގެން އެކަހެރިވާން އަންގާފައިވަނީ، ކަސްޓަމްސްގެ 17 މުވައްޒަފަކަށާއި، އެމްއޭސީއެލްގެ 41 މުވައްޒަފަކަށާއި، އިމިގްރޭޝަންގެ މުވައްޒަފަކަށާއި، ޓީއެމްއޭގެ 3 މުވައްޒަފުންނަށް ކަމަށެވެ.
ސިނަމަން ހަކުރާހުރާއިން ޝައްކުވި މީހާގެ ޓެސްޓުގެ ނަތީޖާ އަދިވެސް ލިބިފައެއް ނުވެއެވެ.
މަބްރޫކް ވިދާޅުވީ މީގެ އިތުރުން މިމަހުގެ 20 ވަނަ ދުވަހު މާލެއަށް އައި ދިވެއްސެއްގެ ގައިން ކޮވިޑް-19 ގެ އަލާމާތްތްތަކެއް ފެނިގެން އޭނާގެ ޓެސްޓް ހަދައި މިހާރުވަނީ އެކަހެރިކޮށްފައި ކަމަށެވެ. އެކަމާ ގުޅިގެން ވެސް މާލޭގައި އިތުރު ބަޔެއްގެ ސާމްޕަލް ނަގައި ޓެސްތް ކުރާނެ ކަމަށް އެޗުޕީއޭއިން ވިދާޅުވެފައިވާ ކަމަށް މަބްރޫކް ވިދާޅުވިއެވެ.
މި ކޭސްއާ ގުޅިގެން ޑިރެކްޓް ކޮންޓެކްޓްސްއާއި، ހައިރިސްކް ކޮންޓެކްޓްތަކުގެ ސާމްޕަލްތައް ނަގައި ޓެސްޓް ކުރެވޭނެ ކަމަށް އޭނާ ވިދާޅުވިއެވެ.
