ރާއްޖެއިން އިތުރު ދެމީހަކު ކޮވިޑް 19 އަށް ޕޮޒިޓިވް ވެއްޖެއެވެ. މިފަހަރު ދެމީހުން ވެސް ފެނިފައިވަނީ ކުރެއްދޫގައި އައިސޮލޭޓު ކޮށްފައިވާ މީހުންގެ ތެރެއިންނެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި މުހައްމަދު މަބުރޫކު އަޒީޒު ވިދާޅުވީ އެއީ ދިވެހީންތޯ ބިދޭސީންތޯ އަދި ކަށަވަރު ވެފައެއް ނުވާކަމަށެވެ. މި ދެމީހުން ޕޮޒިޓިވް ވުމުން އެބައްޔަށް ޕޮޒިޓިވްވި މީހުންގެ ޢަދަދު 6 އަށް އެރީއެވެ.
މަބްރޫކު ވިދާޅުވީ މާދަމާއިން ފެށިގެން ޓްރެވަލް ކްލިނިކުވެސް ހުޅުވާނެ ކަމަށެވެ. އެ ކުލިނިކް ހުޅުވުމަށްފަހު ރާއްޖެއިން ބޭރުން އައިސް ފުރަތަމަ ރިޕޯޓުކުރަން ޖެހޭނީ އެކުލިނިކަށެވެ. އޭނާ ވިދާޅުވީ ރާއްޖެއަށް އެތެރެވާ މީހުން ފޯމެއް ވެސް ފުރާގޮތަށް މިހާރު ހަމަޖެހިފައިވާ ކަމަށެވެ. މައުލޫމާތު ލިބިފައިވާ ގޮތުގައި އެއިން އެމީހާގެ ޓްރެވެލް ހިސްޓްރީ އެނގިގެންދާނެއެވެ. އަދި ރާއްޖެ އެތެރެވާ މީހުން ތަރމަލް ކެމެރާއި ފޯހެޑު ކެމެރާ ބޭނުންކޮށްގެން ބަލަމުން ގެންދާނެ ކަމަށް ވެސް އޭނާ ވިދާޅުވިއވެ. އެގޮތަށް ބެލުމަށްފަހު އައިސޮލޭޓު ކުރަންޖެހޭ މީހުން އައިސޮލޭޓު ކުރުމުގެ މަސައްކަތް މިހާރެކޭ އެއްގޮތަށް ކުރިއަށް ގެންދާނެ ކަމަށް އޭނާ ވިދާޅުވިއެވެ.
