ޖުޑިޝަލްސާރަވިސް ކޮމިޝަން (ޖޭއެސްސީގެ) މުވައްޒަފުންގެ 81 އިންސައްތައަކީ އަންހެނުންނެވެ. މިކަން ހާމަކޮށްފައިވަނީ ބައިނަލްއަޤްވާމީ އަންހެނުންގެ ދުވަހާ ގުޅުވައިގެން އެކޮމިޝަނުން ފޮނުއްވި ތަހްނިޔާގެ މެސެޖްގައެވެ.
ޖޭއެސްއީ ފޮނުވި ތަހްނިޔާގެ މެސެޖްގައި މިދިޔަ އަހަރު އެކޮމިޝަނުން ޙާޞިލްކުރެވުނު ކާމީޔާބީގެ ލަނޑުދަނޑިއެއްގެ ގޮތުގައި ކޮމިޝަނަށް ފުރަތަމަ ފަހަރަށް އަންހެން ރައީސާއެއް ހަމަޖެހުމާއި މަސަކަތްކުރާ އަންހެން މުވައްޒަފުންގެ ނިސްބަތް އިތުރުވުން ވުމަކީ ފަޚުރެއް ކަމަށް ވަނީ ފާހަގަ ކުރައްވައިފައެވެ. އެއީ އެކޮމިޝަންގެ ފުރަތަމަ އަންހެން ރައީސާ ޙީސާން ޙުޞައިންނެވެ. ޙިސާން ޙުޞައިން ޖޭއެސްސީގައި އިންނަވަނީ ރައްޔިތުންގެ މަޖިލީހުން އެކޮމިޝަނަށް ކަނޑައެޅި މެމްބަރުގެ ގޮތުގައެވެ. ޙިސާންގެ އިތުރުން އެކޮމިޝަންގައި ދެން އިންނަވާ އަންހެން މެމްބަރަކީ ސްޕްރީމްކޯޓްގެ ފަނޑިޔާރު އާޢިޝާ ޝުޖޫން އެވެ.
އެކޮމިޝަންގައި މަސައްކަތް ކުރާ މުވައްޒަފުންނާއި ކޮމިޝަންގެ ބައެއް މެމްބަރުން މަސައްކަތްތަކުގައި ޙަރަކާތްތެރިވާ މަންޒަރު ދައްކުވައުދޭ ދެ ފޮޓޯ އެއްވެސް ތަހްނިޔާގެ މެސެޖް ގައި ހިމެނެއެވެ. ފޮޓޯއިންވެސް ގިނައިން ފެންނަން ތިބީ އަންހެން މުވައްޒަފުންކަން ފާހަގަ ކުރެވެއެވެ.
ޖޭއެސްސީގެ ތަހްނިޔާގެ މެސެޖަގައި ފާހަގަ ކޮށްފައިވާ ގޮތުގައި ފަނޑިޔާރުކަމުގައި އަންހެނުންގެ ނިސްބަތް އުޅެނީ 18 އިންސައްތައަށް ވުރެ މަތީގައެވެ. އެގޮތުން މިދިޔަ އަހަރު އައްޔަން ކުރެވުނު އެގާރަ ފަނޑިޔާރުންގެ ތެރެއިން ހަތަރު ފަނޑިޔާރުންނަކީ އަންހެނުންކަން ވަނީ ފާހަގަ ކުރައްވައިފައެވެ. އޭގެ ތެރޭގައި ސްޕްރީމް ކޯޓަށް އައްޔަން ކުރެއްވި ދެ ފަނޑިޔާރުން ކަމަށްވާ ޑރ. އަޒްމިރާލްދާ ޒާހިރާއި ޢާއިޝާ ޝުޖޫނު ހިމެނި ވަޑައިގަންނަވައެވެ.
