ބައެއް ރަށްރަށުގެ މަގު ހެދިފައިވަނީ މަތިންދާބޯޓް ޖެއްސޭ ފެންވަރުގައި ކަމަށް ޕޭލޭނިން މިނިސްޓަރ މުޙައްމަދު އަސްލަމް ވިދާޅުވެއްޖެއެވެ. މިނިސްޓަރ މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ތިމަރަފުށީ މަގު ހެދުމުގެ ޢަމަލީ މަސައްކަތް ފެށޭނެ ތާރީޚަކާ ބެހޭގޮތުން އެދާއިރާގެ މެމްބަރ ޢަބްދުﷲ ރިޔާޒް ކުރެއްވި ސުވާލަށް ޖަވާބު ދެއްވަމުންނެވެ.
މިނިސްޓަރ އަސްލަމް ވިދާޅުވީ ބައެއް ރަށްރަށުގެ މަގުހެދުމަށް އޯވަރ ޑިޒައިން ނުވަތަ އެތަނަކަށް ބޭނުންވާވަރަށް ވުރެ ބޮޑަށް ޑިޒައިން ކުރެވިފައިވާކަމަށެވެ. އެއީ އެންމެ ރަނގަޅު ގޮތް ނޫންކަން އޭނާ ފާހަގަ ކުރެއްވިއެވެ. އެހެންކަމުން ކުރިއަށް އޮތްތަނުގައި މަގުތައް ޑިޒައިން ކުރުމުގައި ކައުންސިލާއި އަދި ދާއިރާތަކުގެ މެމްބަރުންނާ ވެސް މަޝްވަރާ ކުރައްވާނެކަމަށް ޕްލޭނިން މިނިސްޓަރ ވިދާޅުވިއެވެ. މަތިން ދާބޯޓް ޖައްސާ ފެންވަރަށް މަގު ޑިޒައިން ކުރެވިފައިވަނީ ކޮން ރަށެއްގައި ކަމެއް މިނިސްޓަރ ހާމައެއް ނުކުރައްވައެވެ. މިނިސްޓަރ އަސްލަމް ވިދާޅުވީ އެއްހާސް މީހުންގެ އާބާދިއެއް އޮންނަ ތަނަކަށް 23 ޓަނުގެ ކެރޭން ދުއްވޭވަރަށް މަގު ހަދަން ނުޖެހޭ ކަމަށެވެ. މަގުތައް ޑިޒައިން ކުރަންޖެހޭނީ އެތަނެއްގެ އާބާދީއާއި ދުއްވާ އެއްޗެތީގެ މިންވަރަށް ބަލައިގެން ކަމަށް ފާހަގަ ކުރެއްވިއެވެ.
ތިމަރަފުށީ މަގު ހެދުމާ ބެހޭގޮތުން މިނިސްޓަރ އަސްލަމްވިދާޅުވީ އެރަށުގެ މަސައްކަތް މިދިޔައަހަރުގެ ޑިސެމްބަރ މަސްރޭގައި ރޯޑް ޑިވެލޮޕްމަޓް ކޯޕްރޭޝަނާ ޙަވާލުކޮށްގެން ކުރިއަށް ދާކަމަށެވެ. އީއައިއޭގެ މަސައްކަތް މިމަހު ނިޔަލަށް ނިންމާލެއްވުމަށްފަހު ޑިޒައިން ގެ މަސައްކަތް ކުރިއަށްދާނެކަމަށް މިނިސްޓަރ ފާހަގަ ކުރެއްވިއެވެ. އެހެންކަމުން އެރަށުގެ މަގު ހެދުމުގެ ޢަމަލީ މަސައްކަތް ފެށިފައިވާކަމަށް ދެކެވަޑައިގަންނަވާކަމަށް ވިދާޅުވިއެވެ. އެހެންނަމަވެސް ތާރު އެޅުމުގެ މަސައްކަތަކީ ވަރަށް ގިނަ މަސައްކަތްތަކަކަށް ފަހު ކުރެވޭނެކަމެއްކަމަށް ވުމުން އެކަމަށް މުއްދަތެއް ނަގާނެކަން ފާހަގަ ކުރެއްވިއެވެ. ތިމަރަފުށީގެ މަގުތައް ހެދޭނީ ސްޓޯމް ވޯޓަރ ސިސްޓަމާއެކުގައި ކަމަށްވެސް މިނިސްޓްރ އަސްލަމް ވިދާޅުވިއެވެ. ތިމަރަފުށީ މަގުހެދުމަށް 75.7 މިލިއަން ރުފިޔާ ވަނީ ކަނޑައަޅައިފައެވެ.
