ސާދަ ސަތޭކަ އެކާޅީސް ވަނަ އަހަރު ދިވެހިރާއްޖެއިން ޙައްޖަށް މީހުން ގެންދިއުމަށް ޝައުޤުވެރިވާ ފަރާތްތަކުން އެކަމަށް އެދި ޕްރޮޕޯސަލް ހުށަހެޅުމުގެ ފުރުޞަތު އިސްލާމިކު އެފެއާޒު މިނިސްޓްރީން ހުޅުވާލައްވައިފިއެވެ.
ޕްރޮޕޯސަލް ފޮތާއި، ޕްރޮޕޯސަލް ހުށަހަޅާ ފަރާތްތަކަށް ދެވޭ މަޢުލޫމާތު ކަރުދާސް 10 ފެބްރުއަރީ 2020 އިން ފެށިގެން އިސްލާމިކް މިނިސްޓްރީގެ ކައުންޓަރުންނާއި މިނިސްޓްރީގެ ވެބުސައިޓުން ލިބެން ހުންނާނެ ކަމަށް އެމިނިސްޓްރީން ވިދާޅުވެފައިވެއެވެ.
މަޢުލޫމާތު ދިނުމަށް ބާއްވާ ޕްރީ-ބިޑް މީޓިންގ އޮންނާނީ 13 ފެބްރުއަރީ 2020 (ބުރާސްފަތި) ދުވަހުގެ 13:00 ގައި އެމިނިސްޓްރީގައި ކަމަށް ވެސް ވިދާޅުވެފައިވެއެވެ.
"ޙައްޖަށް މީހުން ގެންދިޔުމަށް އެދި ހުޅަހަޅާ ކުންފުނިތަކުން 23 ފެބްރުއަރީ 2020 ވާ އާދިއްތަ ދުވަހުގެ 12:00 ގެ ކުރިން ދިވެހިރާއްޖެއިން ޙައްޖަށް މީހުން ގެންދިއުމާބެހޭ އުޞޫލުގެ 7 ވަނަ މާއްދާގެ (ހ) ގައި ވާ ޕްރޮޕޯސަލް ހުށަހެޅުމުގެ ފީ ދައްކަން ވާނެއެވެ. 10 ފެބްރުއަރީ 2020 ވަނަ ދުވަހުން ފެށިގެން 23 ފެބްރުއަރީ 2020 އަށް ސަރުކާރު ބަންދު ނޫން ކޮންމެ ދުވަހެއްގެ 8:30 އިން ފެށިގެން 12:00 އަށް މިނިސްޓްރީ އޮފް އިސްލާމިކް އެފެއާޒްގެ ކައުންޓަރުން ޕްރޮޕޯސަލް ހުށަހެޅުމުގެ ފީ ބަލައިގަންނާނެއެވެ. ޕްރޮޕޯޒަލް ހުށަހެޅުމުގެ ފީއަކީ 10000 (ދިހަހާސް) ރުފިޔާއެވެ." އިސްލާމިކް އެފެއާޒު މިނިސްޓްރީން ވިދާޅުވެފައިވެއެވެ.
ޕްރޮޕޯޒަލްތައް ހުށަހެޅުމާއި ހުޅުވުމަށް ހަމަޖެހިފައިވަނީ މިހިނގާ ފެބުރުއަރީ މަހު 24 ވަނަ ދުވަހު ހެނދުނު 10:00 ގައެވެ. ކަނޑައެޅިފައިވާ ގަޑީގެ ފަހުން ގެންނަ ޕްރޮޕޯސަލް ބަލައިނުގަންނަވާނެ ކަމަށް އެމިނިސްޓްރީން ވިދާޅުވެފައިވެއެވެ. ޕްރޮޕޯސަލް ހުށަހެޅޭނީ ޕްރޮޕޯސަލް ހުށަހެޅުމުގެ ފީ ދައްކާފައިވާ ކުންފުނިތަކަށެވެ.
