"އެންޑާ 19 ރަށަށް" ކެމްޕޭނުގެ ތެރެއިން އައްޑޫސިޓީ ކައުންސިލް މެނިފެސްޓޯ ހެދުމުގެ ވޯކްޝޮޕް ހިތަދޫ ޝަރަފުއްދީން ސްކޫލުގައި ފަށައިފިއެވެ. މި ވޯކްޝޮޕުގައި ސަރުކާރުން އައްޑޫގައި ހިންގުމަށް ރާވާފައިވާ މަޝްރޫއުތަކާ ބެހޭ ގޮތުން މައުލޫމާތު ދެއްވާނެއެވެ. އަދި ރައްޔިތުންގެ ސުވާލުތަކަށް ޖަވާބު ދިނުން ވެސް އޮންނާނެއެވެ.
މި ވޯކްޝޮޕްގެ މައިގަނޑު ބޭނުމަކީ އެޕްރީލް 4 ގައި ބޭއްވުމަށް ހަމަޖެހިފައިވާ ލޯކަލް ކައުންސިލް އިންތުޚާބުގައި އެމްޑީޕީ ޕްރައިވަރީގައި ވާދަކުރައްވާ ކެންޑިޑޭޓުންނަށް މައުލޫމާތު ދެއްވައި އަހުލުވެރި ކުރުވުމެއެވެ. އެގޮތުން ޕެމްޕޭން ކުރުމުގައި އިސްކަން ދެއްވަންވީ ކަންކަމާއި ލާމަރުކަޒީ ގާނޫނަށް ގެނެސްފައިވާ އިސްލާހުތަކާ ބެހޭ މައުލޫމާތު މި ވޯކްޝޮޕުގައި ދޭނެއެވެ. އަދި ކައުންސިލްތަކަށް ދީފައިވާ ބަޖެޓާބެހޭ ގޮތުން ވެސް މައުލޫމާތު ދެއްވާނެއެވެ.
މި ވޯކްޝޮޕް ފަށްޓަވައި ދެއްވީ އެމްޑީޕީގެ ރައީސް، ރައީސް މުހައްމަދު ނަޝީދެވެ. މި ވޯކްޝޮޕް ނިމޭއިރު ލޯކަލް ކައުންސިލް އިންތިޚާބުގައި އެމްޑީޕީން ރައްޔިތުންނަށް ވާނެ ވައުދުތައް ވެސް އެކަށައެޅިގެންދާނެއެވެ.
މިވޯކްޝިޕުގައި ވަނީ އެމްޑީޕީގެ ޕްރައިމަރީގައި ވާދަކުރާ ކެންޑިޑޭޓުންނާއި ބައެއް އާންމުން ވެސް ބައިވެރިވެފައެވެ. މި ވޯކްޝޮޕްގައި 200 އެއްހާ މީހުން ބައިވަރިވަމުންދާ ކަމަށް މައުލޫމާތު ލިބިފައިވެއެވެ.
އެޖެންޑަރ 19 ރަށަށް ކެމްޕޭނުގެ ދަށުން ރާއްޖޭގެ ވަރަށްގިނަ ރަށްރަށުގައި މިހާރު ގެންދަނީ މިވޯކްޝޮޕްތައް ބާއްވަމުންނެވެ. އޭގެ ތެރޭގައި ގދ. ތިނަދޫ، ހއ. ބާރަށް، އދ. މާމިގިލި، ށ، ފޯކައިދޫ، ގއ. ގެމަނަފުށި، ނ. ވެލިދޫ، ރ. ދުވާފަރު، އއ. އުކުޅަސް، ބ. ދަރަވަންދޫ، މާލެ ސިޓީ އިތުރަށް އެހެން ރަށްރަށް ވެސް ހިމެނެއެވެ.
