ފާއިތުވި 24 ގަޑިއިރު ތެރޭގައި ވެސް އެއަށްވުރެ ކުރިން ވެސް މާލޭ ޖަލުގައި އެއްވެސް ހަޅުތާލެއް ގައިދީން ހިނގާފައިނުވާ ކަމަށް މޯލްޑިވްސް ކަރެކްޝަނަލް ސާވިސް އިން ވިދާޅުވެއްޖެއެވެ.
އެތަނުން ވިދާޅުވީ އެއްވެސް ހަގީގަތެއް ބެލުމެއްނެތި މީހުންދޭހާ މަޢުލޫމާތު ތަކެއް ބައެއް ނޫސްތަކުގައި ޖަހަމުންދާ ކަމަށެވެ. "އެގޮތަށް ނުހައްދަވާ. ޒިންމާދާރު ކަމާއެކު އަޅުގަނޑުމެންނަށް ގުޅުއްވާ. އޭރުން ތެދުމަޢުލޫމާތު ލިބިގެންދާނެ. މަސްދަރުތަކުންނޭ ބުނެ ލިޔުމުގެ ބަދަލުގައި އަޅުގަނޑުމެންގެ ބަސް ވެސް ހޯދަން އިލްތިމާސް ކުރަން،" ކަރެކްޝަންގެ މީޑިއާއިން ވިދާޅުވިއެވެ.
ކަރެކްޝަންސްގެ މީޑިއާއިން ވިދާޅުވީ މާފުށީ ޖަލުގައި އިއްޔެ ހިނގި ކަންކަން ވެސް މިހާރުވަނީ ހަމައަކަށް އެޅިފައި ކަމަށެވެ. މާފުށީ ޖަލުގައި އިއްޔެ ހިނގިކަންކަމުގެ އިތުރަށް ފާއިތުވި 24 ގަޑިއިރުތެރޭގައި އެއްވެސް ޖަލެއްގައި ހަޅުތާލުކޮށްފައި ނުވާ ކަމަށް އެތަނުން ވިދާޅުވިއެވެ.
މާލޭ ޖަލުގައި ހަޅުތާލުކުރަމުންދާތާ 24 ގަޑިއުރުވެފައިވާ ކަމަށާއި އެއީ މާފުށީޖަލުގައި ހިނގި ކަންކަމާ ގުޅުގެން ހިނގައިދިޔަ ކަމެއް ކަމަށް މަޢުލޫމާތު ލިބިފައިވާ ކަމަށް ބައެއް ނޫސްތަކުން ބުންޏަސް އެއީ ހަގީގަތެއް ނޫންކަމަށް ވެސް ކަރެކްޝަންސް އިން ވިދާޅުވިއެވެ.
