އަންނަ ރަމަޟާން މަހު ރާއްޖޭގެ މިސްކިތްތަކުގައި އިމާމުވެ ނަމާދު ކުރުމަށާއި ޤުރުއާން ކިޔެވުމަށް ހާފިޒުން ގެންނަވާއިރު އެބޭފުޅުންނަކީ ރަނގަޅުބައެއްތޯ ކުރިން ބަލާގޮތަށް ހަމަޖައްސަވައިފިއެވެ.
މިގޮތަށް ނިންމެވީ ނެޝަނަލް ކައުންޓަރ ޓެރަރިޒަމް ސެންޓަރު ރެޑިކަލައިޒޭޝަން ކޮމިޓީން މިއަދު ބޭއްވި ބައްދަލުވުމެއްގައެވެ. އެ ބައްދަލުވުމުގައި މިގޮތަށް ނިންމެވީ ރޯދަމަހަށް ހާފިޒުން ގެނައުމުގެ އުސޫލަށް ބަދަލު ގެނެސް ދުރާލައި ތައްޔާރުވުމުގެ ގޮތުންނެވެ. އެ ބައްދަލުވުމުގައިވަނީ އަންނަ ރޯދަމަހަށް ގެނެވޭ ހާފިޒުންނަކީ، ކަމަށް އެކަށީގެންވާ، ރާއްޖޭގައި އޮންނަ ދީނީ އެއްބައިވަންތަކަމުގެ އުސޫލުތަކަށް ތަބާވާ، ރަނގަޅު ބައެއްތޯ ދެނެގަތުމާބެހޭ ގޮތުން ވެސް މަޝްވަރާ ކޮށްފައިވެއެވެ.
"މިކަން ހަރުދަނާ ގޮތެއްގައި ކުރުމަށްޓަކައި ދައުލަތުގެ ކަމާބެގޭ މުއައްސަސާތަކުގެ މައްޗަށް އެކުލެވޭ ސަބް-ކޮމިޓީއެއް ކަނޑައެޅިފައި ވެއެވެ. އެކޮމިޓީގައި ހިމެނޭ މުއައްސަސާ ތަކުގެ ތެރޭގައި؛ މިނިސްޓްރީ އޮފް އިސްލާމިކް އެފެއާރޒް، މިނިސްޓްރީ އޮފް ހޯމް އެފެއާރޒް، މިނިސްޓްރީ އޮފް ފޮރިން އެފެއާރޒް، މޯލްޑިވްސް ނޭޝަނަލް ޑިފެންސް ފޯސް، މޯލްޑިވްސް ޕޮލިސް ސާރވިސް، މޯލްޑިވްސް އިމިގްރޭޝަން އަދި ނޭޝަނަލް ކައުންޓަރ ޓެރެރިޒަމް ސެންޓަރ ހިމެނެއެވެ." އެ ސެންޓަރުން ވިދާޅުވެފައިވެއެވެ.
އެސެންޓަރުން ވިދާޅުވެފައިވަނީ މިފަހަރު އެކުލަވައިލެވޭ އުސޫލުގައި ސަރުކާރުގެ ތަންފީޒީ އިދާރާތަކުގެ ދައުރު ފުޅާކުރުމާއި ސިޓީ ކައުންސިލް ތަކާ، އަތޮޅު އަދި ރަށު ކައުންސިލްތަކުގެ ދައުރު ފުޅާކުރެވޭނެ ކަމަށެވެ. އަދި ބޭރުން ގެންނަ ހާފިޒުން ބެލެހެއްޓޭނެ އުސޫލުތަކާ ބެހޭ ގޮތުން ވެސް މިއަދު ވަނީ މަޝްވަރާ ކޮށްފައި ކަމަށެވެ. "މީގެ އިތުރުން ރާއްޖޭގައި ތިއްބެވި ހާފިޒުންނަށް އިމާވުވެ ތަރާވީޙް ނަމާދު ކުރެވޭނެ ފުރިސަތތު އިތުރުކޮށް އެ ހާފިޒުންގެ ބޭނުންކުރެވޭނެ ގޮތްތަކާމެދު މަޝްވަރާކުރެވުނެވެ."
