ހަރުކަށި ފިކުރަށް ތާއިދުކޮށް އެފިކުރު ފަތުރާ މީހުން ހޯދުމަށް ރ. މަޑުއްވަރީގައި ފުލުހުންނާއި ސިފައިން ހިންގި އޮޕަރޭޝަނުގައި ފުލުހުންގެ ބެލުމުގެ ދަށަށް ގެނެސްފައިވާ ތިން މީހުންގެ ބަންދުގެ މުއްދަތު އިތުރު ކޮށްފިއެވެ.
މި އޮޕަރޭޝަނުގައި ފުލުހުންވަނީ އެރަށުން 29 އަހަރުގެ މީހަކާއި 30 އަހަރުގެ މީހަކާއި 34 އަހަރުގެ މީހަކު ބަންދުކޮށްފައެވެ. އެމީހުން ބަންދުކޮށްފައި ބޭތިއްބުމަށް ކޯޓުން ފުރަތަމަ ޖަހައިދީފައިވަނީ 10 ދުވަހެވެ.
ފުލުހުން އެރަށުގައި އޮޕަރޭޝަނެއް ހިންގަން ފެށީ ޖަމާއަތާ ވަކިވެ ހަރުކަށި ފިކުރަށް ތަބޭ ދަރިންނަށް ވެކްސިން ދިނުމާއި ތައުލީމު ދިނުމުން މަހުރޫމްކޮށް އަންހެނުންގެ ހައްގުތަކަށާއި މިނިވަންކަމަށް އަރައިގަނެ އަށާ އަހަރު ނުވަނީސް ކުޑަދިން ކޯޓުން ބޭރުގައި ކައިވެނި ކުރުވަމުންދާ ކަމުގެ މަޢުލޫމާތު ފުލުހުންނަށް ލިބިގެންނެވެ.
ފުލުހުންނާއި ޖެންޑަރ މިނިސްޓްރީ ގުޅިގެން ކުރި މަސައްކަތުން ބައެއް މީހުންވަނީ އެމީހުންގެ ދަރީންނަށް ވެކްސިން ދިނުމަށް އެއްބަސްވެ ވެކްސީން ދިފައެވެ. ރާއްޖޭގައި ހަރުކަށި ފިކުރު ފަތުރާ މައްސަލާގައި އއ. މާޅޮހުން ވެސް މިއަދު ވަނީ މީހަކު ބަންދު ކޮށްފައެވެ. އަށާއަހަރު ނުވަނީސް ދަރީން ކޯޓުން ބޭރުގައި މީހުންނާ ދެވުމުގެ ތުހުމަތު ވެސް އޭނާގެ މައްޗަށް ވަނީ ކޮށްފައެވެ.
