އައްޑޫ ސިޓީ ހިތަދޫން ވިލާކޮލެޖަށް ލިބިފައިވާ ބިމުގައި އެކޮލެޖުގެ ކެމްޕަސް އަޅަން ތައްޔާރުވާން ފަށައިފިއެވެ. އެ ކޮލެޖުން މިހާރުވަނީ އެތަން އިމާރާތް ކޮށްދޭނެ ބަޔަކު ހޯދަން އިޢުލާން ވެސް ކޮށްފައެވެ.
ވިލާކޮލެޖުގެ ކެމްޕަހާއި ވަށާފާރު ރޭނުމުގެ މަސައްކަތް ކޮށްދޭން ޝައުގުވެރިވާ ފަރާތްތަކުން އެމަސައްކަތް ކޮށްދޭންޖެހެނީ އަމިއްލަ ތަކެތީގާއެވެ.
އެ މަސައްކަތް ކޮށްދޭން ބޭނުންވާ ފަރާތަތްކުން ޑިސެމްބަރު 22 އާއި 25 އާ ދެމެދު ކޮންމެ ދުވަހެއްގެ ވެސް ހެނދުނު 9:00 އައީ 4:00 އާދެމެދު ވިލާކޮލެޖަށް ވަޑައިގެން ނަންނޯޓު ކުރެއްވުމަށްފަހު ބިޑު ޑޮކިއުމަންޓް ގަތުމަށް އެކޮލެޖުން ވަނީ އެދިވަޑައިގެންފައެވެ. ބިޑް ޑޮކިޔުމެންޓްގެ އަގަކީ އެއްހާސް ރުފިޔާއެވެ.
މި މަސައްކަތުގެ ޕްރީބިޑް މީޓިން އޮންނާނީ ޑިސެމްބަރ 29 ވަނަ ދުވަހު ހެނދުނު އެކޮލެޖުގެ މީޓީން ރޫމުގައި ކަމަށް ވެސް އެތަނުން ވިދާޅުވިއެވެ. ބިޑު ހުށަހެޅުން އޮންނާނީ ޖަނަވަރީ ފަސް ވަނަ ދުވަހު ހެނދުނު 11:00 ގައި ވިލާކޮލެޖުގެ މީޓީން ރޫމުގައެވެ.
"މަޢުލޫމާތު ސާފުކުރައްވަން ވަޑައިގަންނަވާ ފަރާތްތަކާއި ގަޑިއަށް އަންދާސީ ހިސާބު ހުށަހަޅުއްވަން ވަޑައިނުގަންނަވާ ފަރާތްތަކުގެ އަންދާސީ ހިސާބު ބަލައި ނުގަނެވޭނެ ވާހަކަ ދަންނަވަމެވެ."
