އައްޑޫ ސިޓީއާއި ހުވަދު އަތޮޅާއި ލ. އަތޮޅު ވައިގެ މަގުން ގުޅާލައި ޝެޑިއުލް ފުލައިޓްތައް މިއަދު ފަށައިފިއެވެ.
ޝެޑިއުލް ދަތުރުތައް މިއަދު ފެށިޔަސް ރީޝެޑިއުލްކޮށް ކަންކަން ހަމައަކަށް އަޅުވަން އަދި ހަފްތާއެއްހާ ދުވަސް ހޭދަވާނެއެވެ. އައިލެންޑް އޭވިއޭޝަންގެ ޕަބްލިކް ރިލޭޝަންސް މެނޭޖަރ މޫސާ ވަސީމް ވިދާޅުވީ މި މަންޒިލްތަކަށް ދަތުރުތައް ފެށުމަށް މިއަދު ބާއްވާފައިވަނީ "ސޮފްޓް އޯޕަނިން" އެއް ކަމަށެވެ. އެހެންނަމަވެސް މިޚިދުމަތް ފެށުން ފާހަގަ ކުރުން ފަހުން އޮންނާނެ ކަމަށް އޭނާ ވިދާޅުވިއެވެ.
މިއަދުން ފެށިގެން ގދ. ކާޑެއްދޫއިން އައްޑޫ ގަމަށް ހަފްތާއަކު ތިން ފުލައިޓު އޮންނާނެއެވެ. އަދި ގއ. ކޫއްޑޫއިން ވެސް ހަފްތާއަކު ތިން ފުލައިޓު ގަމަށް އޮންނާނެ އެވެ. ލ. ކައްދޫއިން ކޮންމެ ދުވަހަލު ފުލައިޓެއް އޮންނާނެއެވެ.
މި މަންޒިލްތަކަށް ދަތުރުކުރަން ބޭނުންވާ ފަރާތްތަކަށް އިއްޔެއިން ފެށިގެން ޓިކެޓު ލިބެމުންދާނެއެވެ. މޫސާ ވަސީމް ވިދާޅުވީ ކުރިން މިސެކްޓަރތަކަށް ޓިކެޓު ވިއްކި އަގަށްވުރެ މިހާރު އަގުހެޔޮވާނެ ކަމަށެވެ.
އިކޮނޮމިކް މިނިސްޓަރ ފައްޔާޒު އިސްމާއީލް ބުރާސްފަތި ދުވަހު ވިދާޅުވީ މިދަތުރުތަކުގެ ސަބަބުން އައިލެންޑު އޭވިއޭޝަނަށް ކިތަންމެ ބޮޑަށް ގެއްލުން ވިޔަސް ސަރުކާރުން ނިންމެވީ މިކަމަކީ އައްޑޫގެ ފަތުރުވެރިކަމާއި އެހެނިހެން ދާއިރާ ތަރައްގީ ކުރުމަށްޓަކައި މިއީ ކޮންމެހެން ބޭނުންވާ ކަމަކަމަށް ސަރުކާރަށް ފެނިވަޑައިގަންނަވާތީ ކަމަށެވެ. އޭނާ ވިދާޅުވީ މިއީ ހަމައެކަނި ފަތުރުވެރިންނަށް އޮތް ފުރުސަތެއް ނޫން ކަމަށެވެ. މިއީ ޖުމްލަކޮށް އެންމެންގެ ފަސޭހައަކަށް ސަރުކާރުން ފެއްޓެވި ކަމެކެވެ.
