ކައުންސިލްތަކުގައި ވަކި ޢަދަދަކަށް އަންހެނުންތިބޭ ގޮތަށް ޤާނޫނަށް ބަދަލު ގެނައުމަކީ ކަނޑައެޅިގެން ޤާނޫނު އަސާސީއާ ޚިލާފު ކަމެއް ކަމަށް ރައްޔިތުންގެ މަޖިލީހުގެ ކުރީގެ ރައީސް އަދި ޖުމްހޫރީޕާޓީ (ޖޭޕީ) ގެ ލީޑަރު ޤާސިމް އިބްރާހީމް ވިދާޅުވެއްޖެއެވެ.
ޖޭޕޭއަށް ބައެއް މީހުން ސޮއިކުރުމަށް މ. ކުނޫޒުގައި ރޭ ބޭއްވި ޖަލްސާގައި ވާހަކަ ދައްކަވަމުން ޤާސިމް ވިދާޅުވީ ޤާނޫނަށް އެފަދަ ބަދަލެއް ގެންނަން އުޅޭ ކަމަށެވެ. "އަޅުގަނޑު ދަންނަވާނީ އެއީ ކަނޑައެޅިގެން ޤާނޫނުއަސާސީގެ އަސާސީ ޙައްޤުތަކާއި މިނިވަންކަމުގެ ބާބާ ކަނޑައެޅިގެން ޚިލާފުކަމެކޭ. އެހެން އެގޮތަށް އެކަމެއް ނުކުރެވޭނެ. ޤާނޫނު އަސާސީގައި ބުނެފައި އޮންނަނީ ވަކި ޖިންސަކުން ވަކިކުލައަކުން ވަކި ނަސަބަކުން ހަސަބަކުން އަޔަތީ ތަފާތެއް ނުކުރެވޭނެ ކަމަށް،" ޤާސިމް ވިދާޅުވިއެވެ.
ޤާނޫނުއަސާސީ މީހާރު އޮތްގޮތުން ދެޖިންސަށް ވެސް ހަމަހަމަ ފުރުސަތު އެބައޮތް ކަމަށާއި އެންހެނުންވެސް އިންތިޚާބުތަކުގައި ވާދަކޮށް މަޤާމުތަކަށް އިންތިޚާބުވުމުގެ ފުރުސަތު ފިރިހެނުންނާ އެއްވަރަށް އެބައޮތް ކަމަށް ޤާސިމް ވިދާޅުވިއެވެ. ޤާނޫނު މިހާރުއޮތް ގޮތުން ކައުންސިލްތަކަށާއި، ރައްޔިތުންގެ މަޖިލީހަށް ސަތޭކަޕަސެންޓު އަންހެނުން އައުމުގެ ފުރުސަތު އެބައޮތް ކަމަށް އޭނާ ވިދާޅުވިއެވެ. އެކަމަކު ޤާނޫނަށް ބަދަލު ގެނެސް ވަކި ޖިންސަކަށް ލިމިޓު ކުރުމަކީ ޙައްޤުތަކަށް އުނިކަން އަންނާނެ ކަމެއް ކަމަށް ވެސް ޖެޕީގެ ލީޑަރު ވިދާޅުވިއެވެ.
"ވޯޓުލައިގެން މަޤާމްތަކަށް އޭދެވޭ ކަމަށްވާނަމަ އަންހެން ބޭފުޅުން ވެސް ނުކުމެ މަސައްކަތް ކުރައްވަންވީ. މަސައްކަތްކޮށްގެން ގޮނޑި ހޯދަންވީ. އެފުރުސަތު ދެޖިންސަށްވެސް ހަމަހަމަކޮށް މިހާރު ލިބިދީފައިއޮތީ،" ޤާސިމް ވިދާޅުވިއެވެ.
އަންހެނުން ނުކުމެ މަސައްކަތުން ގޮނޑިތައް ކާމިޔާބުކުރެވޭނެ ކަމުގެ ހެކި ދައްކަވަމުން ޤާސިމް ވިދާޅުވީ މާރިޔާ އަޙުމަދު ދީދީއާއި، އިވާ ޢަބްދުﷲ އާއި، ރޮޒޭނާ އާދަމާއި ދިޔާނާ ސައީދަކީ އެފަދަ ނަމޫނާ ބޭފުޅުން ކަމަށެވެ.
ޤާސިމް ވަނީ ހަމައެކަނި ކައުންސިލްތަކަށް އެބަދަލު ގެންނަވަން އުޅުއްވާތީ ސުވާލު އުފައްދަވައިފައެވެ. އޭގެ ބަދަލުގައި ރައްޔިތުންގެ މަޖިލީހާއި ރައީސުލްޖުމްހޫރިޔާގެ މަޤާމު ވެސް އެގޮތަށް ބަދަލުކުރަން ނޫޅުއްވަނީ ކީއްވެތޯ ޤާސިމް ސުވާލު ކުރެއްވިއެވެ. "މަޖިލިސް ވެސް އެހެން ބާއްވަންވީ ނޫންތޯ. ރައީސުލުޖުމްހޫރިއްޔާގެ މަޤާމް ވެސް ފިރިހެނަކު ދެދައުރު ކޮށްފައި އަނެއް ދެދައުރު އަންހެނަކަށް ލިބޭ ގޮތަށް ހަދަންވީ ނޫންތޯ،" ޤާސިމް ވިދާޅުވިއެވެ. ކޮންމެކަމެއް ކުރިޔަސް އެކަމެއް ދެކޮޅު ޖެހޭގޮތަށް ކުރުމުމަށް އޭނާ ވިދާޅުވިއެވެ.
ޤާސިމް ވިދާޅުވީ އެގޮތަށް އެހެން ޢަމަލުކޮށްފި ކަމަށްވާނަމަ އެއީ ޤާނޫނު އަސާސީއަށް ލިބިދޭ ވަރަށްބޮޑު ނިކަމެމެތިކަމެއް ކަމަށެވެ. އަދި މިނިވަން ކަމަށް އެޅޭ ވަރަށްބޮޑު ހުރަހެއް ކަމަށްވެސް ވިދާޅުވިއެވެ. "އެހެންވީމާ މިނިވަންކަމުގެ ބޭންޑު އަޅުވައިގެން ތިބެ ތިޔަފާޑުގެ މުނާފިގުކަންތައް ނުކުރާށޭ. މިނިވަންކަން ހަލާކުކޮށްލަން ނޫޅޭށޭ. ތިޔައީ ވަރަށްބޮޑު ގޯހެކޭ،" ޤާސިމް ވިދާޅުވިއެވެ.
ޤާސިމް ވަނީ ކައުންސިލްގެ ދައުރު 5 އަހަރަށް އިތުރު ކުރަން މަޖިލީހުން ނިންމެވުމުން އެކަމަށް މަރުޙަބާ ވިދާޅުވެފައެވެ. އެކަމަކީ ކުޑަހުވަދޫ ދާއިރާގެ މެމްބަރު މަދުވެގެން ތިންފަހަރު މަޖިލީހަށް ހުށަހަޅައިގެން ނުވެފައިއޮތް ކަމެއް ކަމަށް ޤާސިމް ވިދާޅުވިއެވެ.
