ތަމިލްނާޑުގެ ޗީފް މިނިސްޓަރު ޖަޔަލަލީތާ ހޯމަ ދުވަހުގެ ރޭ އަވަހާރަ ވެއްޖެއެވެ. އަވަހާރަވީ އިރު އޭނާގެ އުމުރުފުޅަކީ 68 އަހަރެވެ. އަވަހާރަވީ އާދީއްތަ ދުވަހުގެ ރޭ ހިތްޕުޅު ހުއްޓުމާ ގުޅިގެން ޑަކްޓަރުން ފަރުވާ ދެމުން ދަނިކޮށެވެ. އޭނާ އާލާސްކަންފުޅާ އުޅުއްވާތާ ވަރަށް ގިނަ ދުވަސް ވެއްޖެއެވެ. ޗެންނައިގެ އެޕޯލޯ ހޮސްޕިޓަލުގައި މި ދިޔަ ސެޕްޓެންބަރު މަހުގެ 22 ވަނަ ދުވަހުން ފެށިގެން ފަރުވާ ހޯއްދަވަމުން ގެންދަވަނިކޮށް، އޭނާ އަވަހާރަ ވެއްޖެ ކަމުގެ ޚަބަރު އެތައް ފަހަރަކު ފެތުރުނެވެ. އެހެންނަމަވެސް ހަސްފަތާލުން ބުނަމުން ދިޔައީ އޭނާގެ ހާލުކޮޅު ރަނގަޅު ކަމަށެވެ.
ޖަޔަލަލީތާ ވަނީ ފަސް ދައުރުގައި ތަމިލްނާޑުގެ ޗީފް މިނިސްޓަރުކަން ކުރައްވައިފައެވެ. އޭނާއަކީ އެ ސްޓޭޓްގެ ތާރީޚުގައި ދުވަހަކުވެސް ފެނިފައި ނުވާ ވަރުގެ ބާރުގަދަ ބޭފުޅެކެވެ. ސިޔާސީ ދާއިރާއަށް ނުކުމެވަޑައިގަތުމުގެ ކުރީން އޭނާއަކީ މަޝްހޫރު ފިލްމީ ތަރިއެކެވެ. ވުމާއެކު ތަމިލްނާޑުގެ ރައްޔިތުން އޭނާ ދެކެ ވަނީ ވަރަށް އާދަޔާ ޚިލާފު ލޯތްބެކެވެ. ބައެއް އަވަށްއަވަށުގައި މީހުން އޭނާއަށް އަޅުކަން ކުރެއެވެ.
އޭނާ ކާވެންޏެއް ނުކުރައްވައެވެ. ދަރިކަލަކު، ދަރިކަނބަލަކު ނެތެވެ. އެކަމަކު ދަރިކަނބަލެއްގެ ގޮތުގައި ގެންގުޅުއްވާ ބޭފުޅަކު އުޅުއްވާ ކަމަށް ބުނެވެއެވެ. އޭނާއަކީ މުއްސަނދި ދިރިއުޅުމެއް އުޅުއްވި އަބުއި ބޭފުޅެކެވެ. އޭނާގެ ވިޔަފާރި ވަނީ ތަމިލްނާޑާއި އިންޑިއާގެ އެހން ސްޓޭޓް ތަކަށް ފެތުރިފައެވެ. އޭގެ ތެރޭގައި ޓީވީ ޗެނަލްތަކާއި، ތަރުކާރީ ފިހާރަތަކާއި، ފެން އުފައްދާ ކާރުޚާނާތަކާއި، ލޮނު އުފައްދާ ކާރުޚާނާތަކާއި، ރެސްޓޯރަންޓްތަކާއި، ސިމެންތި އުފައްދާ ކާރުޚާނާތަކާއި، މި ނޫނަސް އެތައް ވިޔަފާރިއެއް ހިމެނެއެވެ. އޭނާއަކީ ފަގީރުންނާއި ނިކާމެތިންނަށް އެހީތެރިވެވަޑައިގެން، ޚައިރާތުގެ ގޮތުގައި އެތައް ހޭދައެއް ކުރައްވާ ބޭފުޅެއްވެސް މެއެވެ.
