ހއ. މޮޅަދޫ ބަނދަރު ހެދުމުގެ މަސައްކަތް ކުންފުންޏަކާ މިއަދު ޙަވާލުކޮށްފިއެވެ. މިނިސްޓްރީ އޮފް ނެޝަނަލް ޕްލޭނިން އެންޑް އިންފްރާސްޓްރަކްޗަރ އިން މިމަސައްކަތް ޙަވާލު ކުރެއްވީ ސެނޮކް ޓްރޭޑް ކޮމްބައިން ޕްރައިވެޓް ލިމިޓެޑާއެވެ. އެކުންފުންޏާ މަސައްކަތް ޙަވާލު ކުރެއްވީ 26،984،981.28 ރުފިޔާއަށެވެ. މަސައްކަތް ނިންމަން އެއްބަސްވެފައިވާ މުއްދަތަކީ 365 ދުވަހެވެ.
މި މަޝްރޫޢުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކީ 232 މީޓަރުގެ ބޭރުތޮއްޓެއް ލުމާއި، 42 މީޓަރުގެ ރިވެޓުމެންޓެއް ޖެހުމާއި، 70 މީޓަރުގެ ގްރޮއިން ޖެހުމާއި، 200 މީޓަރުގެ އެއްގަމު ތޮއްޓެއް ލުމެވެ. މީގެ އިތުރަށް 600 ސްކެއަރމީޓަރުގެ ޕޭވްމަންޓެއް ހެދުމާއި، 2 ނެރުބައްތި ޖެހުމާއި، ބަނދަރުގައި 20 ބައްތި ޖެހުމާއި، 1 ރޭމްޕް ހެދުން ވެސް ހިމެނެއެވެ. އޭގެ އިތުރަށް ބަނދަރުން 24،726 ކިއުބިކް މީޓަރ ފުން ކުރުމާއި އެއްގަމު ތޮށިން ބޭރު ތޮއްޓަށް ދިޔުމަށް ކޯޒްވޭއެއް ހެދުން ވެސްހިމެނެއެވެ.
މި އެއްބަސްވުމުގައި ޕްލޭނިން މިނިސްޓްރީގެ ފަރާތުން މިއަދު ސޮއި ކުރެއްވީ ޑިރެކްޓަރ ޖެނެރަލް ފާތިމަތު ޝަނާ ފާރޫގެވެ. ސެނޮކް ޓްރޭޑް ކޮމްބައިން ގެ ފަރާތުން ސޮއިކުރެއްވީ އެކައުންޓެންޓް ޕްރަބާތު އެވެ.
