ޔޫރަޕުގެ ޤައުމުތަކަށް މަސް އެކްސްޕޯރޓް ކުރުމުގަ ރާއްޖެއަށް ދިމާ ދައްޗަށް ޙައްލެއް ހޯއްދަވައި ދެއްވުމަށް މަސައްކަތް ކޮށްދެއްވާނެކަމުގެ ޔަޤީންކަން ޔޫރަޕިއަން ކޮމިޝަންގެ ނާއިބް ރައީސް ފެޑްރިކާ މުގްރިނީ ދެއްވައިފިއެވެ. އެނާ މިކަމަށް ޔަޤީންކަން ދެއްވީ މިއަދު ރައްޔިތުންގެ މަޖިލީހުގައި ތަޤްރީރު ކުރައްވަމުންނެވެ. އޭނާގެ ތަޤްރީރު ފެށްޓެވުމުގެ ކުރިން ރައްޔިތުންގެ މަޖިލީހުގެ ރައީސް،ކުރީގެ ރައީސް މުޙައްމަދު ނަޝީދު ވަނީ މަސްވެރިންނަށް ހަމަ އަގު ހޯއްދައިވައި ދެއްވުމަށް ކުރެވެމުންދާ މަސައްކަތް ތަކުގައި އޮތް އެންމެ ބޮޑު އެއް ހުރަހަކީ ޔޫރްޕްގެ ޤައުމުތަކަށް މަސް އެކްސްޕޯރޓް ކުރާއިރު ނަގާ ބޮޑު ޑިއުޓީކަން ފާހަގަ ކުރައްވައި ފައެވެ.
ޔޫރަޕްގެ ޤައުމުތަކަށް ރާއްޖެއިން މަސް އެކްސްޕޯރޓް ކުރުމުގައި 24 އިންސައްތައިގެ ޑިއުޓީއެއް ދައްކަން ޖެހެއެވެ. ޔޫރަޕިއަން ކޮމިޝަންގެ ނާއިބް ރައީސް ވިދާޅުވީ ރާއްޖޭގެ މަސްވެރިކަމަށް ދިމާވާ މައްސަލައަށް ޙަލެއްލިބެންޖެހޭކަމުގައެވެ. ނަމަވެސް މިއަދު މިއަދަށް އެކަމުގައި އޭނާއަށް ގޮތެއް ނުނިންމޭނެކަމަށާއި އަންނަ ނޮވެމްބަރމަހު އިޔޫގެއާކޮމިޝަނަށް އެމައްސަލަ ހުށަހަޅައި އެކަމާ މަޝްވަރާކޮށް ގޮތެއް ނިންމަވާނެކަމަށް ވިދާޅުވިއެވެ.
މަޖިލީހަށް ހުށަހެޅުނު މަސްވެރި ކަމުގެ ޤަރާރުތަކުގެ ބަހުސްގައު އިދުކޮޅު ބައެއް މެމްބަރުން ވެސް މިސަރުކާރާ އީޔޫއާ ދެމެދު އޮންނަ ގާތް ގުޅުމުގެ ތެރެއިން ޔޫރަޕަށް މަސް ބޭރުކުރުމަށް ހުރި ހުރަސްތައް ނައްތާލުމަށް ވަނީ ގޮވާލައްވައިފައެވެ.
ރާއްޖެއާއި ޔޫރާޕާއި ދެމެދު އަންނަމަހު ވިޔަފާރީގެ މަޝްވަރާތަކެއް ވެސް ކުރެއްވުމަށް ހަމަޖެހިފައިވާކަމަށް ޔޫރަޕިއަން ކޮމިޝަންގެ ނާއިބްރައީސް ވިދާޅުވިއެވެ. މިބައްދަލުވުމުގެ ތެރެއިން ޔޫރަޕާއި ރާއްޖެއާއި ދެމެދު ވިޔާފާރިއާއި އިންވެސްޓްމަންޓްތަކާ ބެހޭގޮތުން މަޝަވަރާތައް ކުރެވި އިތުރަށް ގުޅުން ޤާއިމު ކުރެވިގެންދާނެކަމަށް އޭނާ ވިދާޅުވިއެވެ.
ރައްޔިތުންގެ މަޖިލީހުގައި އީޔޫ ކޮމިޝަންގެ ނާއިބްރައިސް މުޤްރިނީ ތަޤްރީރު ކުރެއްވުމަށް ބޭއްވި ޖަލްސާގައި ރައްޔިތުންގެ މަޖިލީހުގެ ރައީސް ވަނީ އެނާ އަށް ރާއްޖޭގެ ކުރީގެ ޗާޓެއް ހަދިޔާ ކުރައްވައިފައެވެ.
