ތުރްކީއަކީ ބަލައިގަތަސް ނުގަތަސް ތާރީޚީ ގޮތުންނާއި ޙަޟާރަތުގެ ގޮތުންނާއި ޖޯގްރަފީގެ ގޮތުން ޔޫރަޕްގެ ބައެކެވެ. އިސްތަންބޯލަކީ (ކޮންސްޓޭންޓިނޯޕްލް އަކީ) ޔޫރަޕްގެ ޙަޟާރަތާއި ރަށްވެހިކަމާއި ތާރީޚު ބައްޓަން ކުރުމުގައި އެތެންސާއި ރޯމް ފަދަ މައި ތިން ސަހަރުގެ ތެރޭގައި ހިމެނޭ ނަގަރެކެވެ.
ކޮންސްޓޭންޓިނޯޕްލް (ކޮންސްޓޭންޓައިންގެ ރަށް) އިސްތަންބޯލަށް (އިސްލާމްދީނުގެ ސަހަރު ގެ ނަމަށް) ބަދަލު ކުރެއްވީ ޢުޘްމަނީ ޚިލާފަތުގެ ޒުވާން ޒަޢީމު މުޙައްމަދުލްފާތިޙެވެ. އޭނާ 1453 މ. ވަނައަހަރު މި ސަހަރު ފަތަޙަ ކުރެއްވުމަށްފަހު އެ ރަށުގެ ނަން "އިސްލާމް ބޯލް" އަށް ބަދަލު ކުރެއްވިއެވެ. ޒަމާންތަކާއެކު އިސްލާމްބޯލް އިސްތަންބޯލަށް (އިސްޠަންބޯލަށް) ބަދަލުވެގެން ދިޔައެވެ.
މުޙައްމަދުލް ފާތިޙު ކޮންސްޓޭންޓިނޯޕްލް ފަތަޙަކުރެއްވުމަށްފަހު ޔޫރަޕްގެ ބޮޑު ބައެއް ފަތަޙަކުރެއްވިއެވެ. ޢުޘްމާނީ ޚަލީފާއިން ޔޫރަޕްގެ ވަރަށް ގިނަ ޤައުމުތަކުގައި އިސްލާމްދީން ފެތުރުއްވުމަށް ޓަކައި ގިނަގުނަ މަސައްކަތްތަކެއް ކުރެއްވިއެވެ. އެ ޒަޢީމުން ދެ ފަހަރަކުމަތިން ވިއެންނާ ޙިޞާރުވެސް ކުރެއްވިއެވެ. ޔޫރަޕް ދެކޭގޮތުގައި ތުރްކީވިލާތަކީ ރަޝިޔާއާއި އިރުމަތީ ފަރާތުން ހުޅަނގަށް އަންނަ ނަމާންކަން ހުއްޓުވާ އަމާން ދޮރޯށްޓެވެ. 300 އަހަރުގެ ތެރޭގައި ރަޝިޔާއާ ޢުޘްމާނީ ދައުލަތާ ދެމެދުގައި 13 ހަނގުރާމަ ހިނގައިފައިވެއެވެ.
ހުޅަނގާ ޢުޘްމާނީ ދައުލަތާ ދެމެދުގައި މައްސަލަތައް ހުރިނަމަވެސް ، އަދި އިނގިރޭސީންނާއި ފަރަންސޭސީން ގުޅިގެން 1827 ގައި ޢުޘްމަނީ ދައުލަތާއި މިޞްރުގެ ކަނޑުގެ ފްލީޓަށް ޙަމަލާ ދިން ނަމަވެސް 1829 ވަނަ އަހަރު ރަޝިޔާގެ ޙަމަލާތަކުން ޢުޘްމާނީ ދައުލަތް ޙިމާޔަތް ކުރުމަށް ޓަކައި އިނގިރޭސީންނަށާއި ފަރަންސޭސީންނަށް ގުޅިފައިވާ ލަޝްކަރެއް ފޮނުވަން މަޖްބޫރުވިއެވެ.
ދެވަނަ ބޮޑުހަނގުރާމައިގައި ޔޫރަޕް ހަލާކުވުމާ ވިދިގެން ޔޫރަޕްގެ ގިނަ ޤައުމުތައް އަލުން އަރާސްތުކޮށްފައިވަނީ ތުރުކީންގެ މުލައްދަނޑީގައެވެ. ޖަރްމަނާއި އޮސްޓްރިޔާއާއި ހޮލެންޑްފަދަ ޔޫރަޕްގެ ޤައުމުތަކުގައި ތުރްކީވިލާތުގެ ގިނަ ރައްޔިތުންތަކެއް ވަޒަންވެރިވެފައި ވަނީ މި ކަމާ ހެދިއެވެ.
ތުރްކީވިލާތާ ހުޅަނގުގެ ޤައުމުތަކާ ދެމެދުގައި މިފަދަ ބޮޑެތި އޮޅުންބޮޅުންތަކާއި މައްސަލަތައް ހުރިކަމުގައި ވިޔަސް ، ތުރްކީއަކީ ހުޅަނގުގެ ޢަސްކަރީ ދިފާޢީ ނިޒާމު "ނޭޓޯ" ގައި ހިމެނޭ މުހިއްމު މެންބަރެކެވެ. އެހެނަސް ޔޫރަޕްގެ ސިޔާސީ އިޤްތިޞާދީ ނިޒާމު ކަމުގައިވާ "ޔޫރަޕްގެ އިއްތިޙާދު" ން ތުރްކީއަށް މަރްޙަބާ ކިޔުމާ ދެކޮޅުހަދައެވެ. މަސީޙީ ހުޅަނގުގެ ނިޒާމުގައި އިސްލާމީ ތުރްކީ ބައިވެރި ކުރުމަކީ ތަޢާރުޟުވާ ކަމެއް ކަމުގައި ދެކޭތީއެވެ.
ހުޅަނގުގެ ނަޒަރުގައި ތުރްކީވިލާތަކީ މާޟީއަށް ބަލާއިރު ބިރު އޮތް، ކުރިމަގަށް ބަލާއިރު އެ ޤައުމާމެދު ލޯމަރައިލެވެންނެތް ކުރުންތެރި އީޖާބީ ޤައުމެކެވެ. ނުވަތަ އެއީ ކަރުގައި އަޅައިގެންވާ، ނައްޓައިލުން ވޭންހުރި، ދިރުވައިލުން ވޭންހުރި، ދެމެހެއްޓުން ވޭންހުރި ކަށްޓެކެވެ.
ހުޅަގަށް ބަލާއިރު އެމީހުންގެ ނަޒަރުގައި ތުރްކީއަކީ "މުށްދަށުގައި ބާއްވަން ޖެހޭ" ނުވަތަ "ބަލިމާނެއްގެ ގޮތުގައި ދަމަހައްޓަން ޖެހޭ" ޤައުމެކެވެ. އެ ޤައުމު މަރުވެ ދިޔުމަކީ ވެސް ނުރައްކަލެކެވެ. ދުޅަހެޔޮކަންމަތީ ދެމެހެއްޓުމަކީ ވެސް ނުރައްކަލެކެވެ.
ވީމާ ތުރްކީގެ ޒަޢާމަތަށް ބޭނުންވާނީ މި އޮޅުންބުޅުންތަކާއި މައްސަލަތައް ދަނެގެން އެ މައްސަލަތަކައެކު މުޢާމަލާތު ކުރަން އެނގޭ އިސްވާރެކެވެ.
