އިންގްލޭންޑާއި ވޭލްސްގައި ބޭއްވި އައިސީސީ ކްރިކެޓް ވާލްޑް ކަޕް 2019 ކާމިޔާބުކޮށް، ދުނިޔޭގެ އެންމެ ފަޚުރުވެރި ކްރިކެޓް ތަށި އިންގްލޭންޑުން ފުރަތަމަ ފަހަރަށް އުފުލާލައިފިއެވެ.
ލަންޑަންގެ ލޯޑްސް ކްރިކެޓް ދަޑުގައި އިއްޔެ ބޭއްވުނު ފޯރިގަދަ ފައިނަލް މެޗްގައި ނިއުޒީލޭންޑް ބަލިކޮށް އިންގްލޭންޑު ކާމިޔާބު ހޯދީ ގިނަ ބައުންޑަރީ (6 ނުވަތަ 4 އަށް ޖަހާ ބޯޅަ) ޖެހި ޓީމަށް ވީމައެވެ.
އިއްޔެގެ މެޗަކީ ކްރިކެޓް ވާލްޑް ކަޕްގެ ތާރީޚުގައި އެއްވަރުވެގެން ނިމުނު ފުރަތަމަ ފައިނަލް މެޗެވެ. ފުރަތަމަ ކުޅެން އަރާ 50 އޯވަރުގެ ތެރޭގައި 8 މީހުން ނުބައިވެގެން ނިއުޒީލޭންޑަށް ހެދުނީ 241 ރަނެވެ. އެންމެ ރަނގަޅަށް ކުޅުނީ 55 ރަން ހެދި ހެންރީ ނިކޯލްސްއެވެ. އިންގްލޭންޑްގެ ދެ އުކުންތެރިން ކަމުގައިވާ ލިއާމް ޕްލަންކެޓް އަދި ކްރިސް ވޯކްސް ވަނީ ކޮންމެ މީހަކަށް 3 ވިކެޓް ނަގާފައެވެ.
މޮޅުވާން 242 ރަން ހަދަން ޖެހިފައި އޮތް އިންގްލޭންޑް ކުޅެންއަރާ، އެ ޓީމަށްވެސް 50 އޯވަރުގެ ތެރޭގައި އެންމެން ނުބައިވެގެން ހެދުނީ 241 ލަނޑެވެ. އެންމެ ރަނގަޅަށް ކުޅުނީ ނުބައި ނުވެ 84 ރަން ހެދި ބެން ސްޓޯކްސްއެވެ. ނިއުޒީލޭންޑުގެ އުކުންތެރިންގެ ތެރެއިން ލޮކީ ފާގަސަންއާއި ޖޭމްސް ނީޝަމް ވަނީ ކޮންމެ މީހަކަށް 3 ވިކެޓް ނަގާފައެވެ.
މި ނަތީޖާއާއެކު މެޗު އެއްވަރުވުމުން، ދެން ވާލްޑް ކަޕްގެ ގަވާއިދު ބުނާ ގޮތަށް ކޮންމެ ޓީމަކުން ވެސް 'ސުޕަ އޯވަރެއް' އެއްލަން ޖެހުނެވެ. އިންގްލޭންޑްގެ ސުޕަ އޯވަރުގައި އެ ޓީމު 15 ރަން ހެދުމުން، ނިއުޒީލޭންޑަށް މޮޅުވާން ހަދަން ޖެހެނީ 16 ރަނެވެ. އެހެންނަމަވެސް، އެ ޓީމުގެ ސުޕަ އޯވަރުގައި އެ ޓީމަށްވެސް ހެދުނީ 15 ރަނެވެ.
މެޗުން މޮޅުވި ޓީމެއް ނިންމަން ޖެހުނީ ފައިނަލް މެޗުގައި ގިނަ ބައުންޑަރީ ޖެހި ޓީމެއް ބަލައިގެންނެވެ. ނިއުޒީލޭންޑަށް މެޗުގައި 17 ބައުންޑަރީ ޖެހުނު އިރު، އިންގްލޭންޑުން ވަނީ 26 ބައުންޑަރީ ޖަހާފައެވެ.
އިންޓަނޭޝަނަލް ކްރިކެޓް ކައުންސިލް (އައިސީސީ) އިން ކްރިކެޓް ވާލްޑް ކަޕް ފުރަތަމަ ބާއްވާފައި ވަނީ 1975 ގައެވެ. އޭގެ ފަހުން ކޮންމެ 4 އަހަރަކުން ބާއްވަމުން އަންނަ މުބާރާތުގައި އިންގްލޭންޑް މީގެ ކުރިން 4 ފަހަރު ފައިނަލުގައި ކުޅެފައި ވެއެވެ. މިއީ އިންގްލޭންޑަށް ތަށި ހޯދުނު ފުރަތަމަ ފަހަރެވެ. ނިއުޒީލޭންޑު މިއަހަރުގެ ކުރިން، 2015 ގެ މުބާރާތުގެ ފައިނަލުގައިވެސް ކުޅެފައިވެއެވެ. ނިއުޒީލޭންޑަށް މިހާތަނަށް އަދި ވާލްޑް ކަޕް ކާމިޔާބުކުރެވިފައި ނުވެއެވެ.
ކްރިކެޓް ވާލްޑް ކަޕްގެ ތާރީޚުގައި އެންމެ ކާމިޔާބު ގައުމަކީ އޮސްޓްރޭލިޔާއެވެ. އެ ގައުމުން ވަނީ 5 ފަހަރު ތަށި ހޯދާފައެވެ. ވެސްޓް އިންޑީޒްއާއި އިންޑިޔާއިން ދެ ފަހަރު ތަށި ހޯދާފައި ވާއިރު، ޕާކިސްތާނާއި ސްރީލަންކާ ވަނީ އެއް ފަހަރު ތަށި ހޯދާފައެވެ.
2023 ވަނަ އަހަރު ކްރިކެޓް ވާލްޑް ކަޕް ބޭއްވުމަށް ހަމަޖެހިފައި ވަނީ އިންޑިޔާގައެވެ.
