ލ.މުންޑޫއަކީ އެއަތޮޅުގެ ގުޅިފައިވާ ރައްތަކާ ވަކިން އޮންނަ ކުޑަކުޑަ ރަށެކެވެ. ޒަމާނުއްސުރެ މީހުން ދިރިއުޅެމުންއަންނަ ރަށެކެެވެ. އެހެންނަމަވެެސް އާބާދީ ވަރަށްމަދެވެ. 2014 ވަނަ އަހަރުގެ ބޯހިމެނުގެ ނަތީޖާ ދައްކާގޮތުން މުންޑޫގައި ދިރިއުޅެމުންދަނީ 230 މީހުންނެވެ. މިއަދު މީޑިއާތކަށް ލިބުނު އެއްމެ އާދައާ ޚިލާފު ޚަބަރަކީ މުންޑީއަކީ ފަޅުރަށެއްކަމަށް ސަރުކާރުން ކަނޑައަޅުއްވައި އެކަން ޢިއުލާންކުރި ޚަބަރެވެ.
މުންޑޫ ފަޅުކޮށްލީތަ؟
ހައްދުންމަތީ މުންޑޫއަކީ މީހުން ދިރިނޫޅޭ ރަށެއް ކަމުގައި ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ކަނޑައަޅުއްވިޚަބަރު ރައީސުލްޖުމްހޫރިއްޔާގެ އޮފީހުން ޢާއްމުކުރުމާއެކު، މުންޑޫއަށް ނިސްބަތްވާމީހުންނާއި، އެރަށުގެ މަޢުލުމަތު ދަންނަ މީހުންގެ ޝަކުވާގެ ކޯލުތައް ސަރުކާރުގެ ކަމާބެހޭ އިދާރަތަކަށް މެދުނުކެނޑު އަންނަންފެށިކަަމަށް މަޢުލޫމާތުލިބިފައިވެއެވެ. އެމީހުންގެ ޝަކުވާއަކީ ކުރިން އެއްވެސް އިޝާރާތެއްވެސް ކުރުމެއްނެތި ކުއްލިއަކަށް އެރަށް ފަޅުރަށަކަށް ހެއްދެވިއރު، އެރަށުގައި ދިރިއުޅެމުންދާ 23ޮ މީހުން ހަދަންވީ ހިކިނެތްކަމެއްވެސް ނޭނގޭކަމުގެ ޝަކުވާއެވެ.
އެއީ އޮޅުމެއް!
އެއީ އޮޅުމެކެވެ. މުންޑޫއަކީ މީހުން ދިރިއުޅޭރަށެކެވެ. އެރަށް ފަށުރަށެއްކަމަށް ޢިއުލާންކުރެވުނީ އޮޅުމަކުންނެވެ. އެކަން ހާމަކޮށް ސަރުކާރުންވަނީ ބަޔާނެއް ނެރުއްވާފައެވެ. މުންޑޫއަކީ ފަޅުރަށެއްކަމަށްބުނެ ރައީސް އޮފީހަށް މައުލޫމާތު ދެވުނީ އޮޅުމަކުން ކަމަށް ކަމަށާއި، އެކަން އެގޮތަށް ހިނގާފައި ވާތީ އެރަށު ރައްޔިތުންގެ ކިބައިން މާފަށް އެދޭކަމަށް ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރު)ން ވަނީ ހާމަކުރައްވާފައެވެ. އެޑިޕާޓްމަންޓުން ނެރުއްވި ބަޔާނެއްގައުިވަނީ
"އެގޮތަށް ދެންނެވިފައި ވަނީ، މި ޑިޕާޓްމަންޓުގެ ޑޭޓާބޭސްގައި އެގޮތަށް ރެކޯޑްކުރެވިފައި ވާތީ. އަދި މިފަދަ ކަންކަމުގައި ގެންގުޅޭ އިޖުރާއީ އުސޫލުތަކުގެ ތެރޭން، ދެވަނަ ފަހަރަށް މައުލޫމާތު ޗެކްކުރުމަށް ފަހު، ރައީސުލްޖުމްހޫރިއްޔާގެ އޮފީހަށް ފޮނުވުނު އިރުވެސް، ހައްދުންމަތީ މުންޑޫއަކީ، މީހުން ބަދަލުކޮށް ނިމި، މިހާރު މީހުން ދިރިނޫޅޭ ރަށެއްގެ ގޮތުގައި ވާނީ ދެންނެވިފައި."ކަަމަށެވެ.
މުންޑޫއަކީ މީހުން ދިރިނޫޅޭ ރަށެއްކަމުގައި މިއަދު ރައީސުލްޖުމްހޫރިއްޔާ ކަނޑައެޅުއްވުމުން ލިބުނު ޝަކުވާތަކާ ގުޅިގެން އެޑިޕާޓްމަންޓުގެ ޑޭޓާބޭސްގައި ހުރި މައުލޫމާތު އަލުން ޗެކްކުރި އިރު، ހައްދުންމަތީ މުންޑޫއަކީ މީހުން ބަދަލުކޮށް ނިމިފައިވާ ރަށެއް ކަމުގައި ބެލެވިފައި ވަނީ އޮޅުމަކުންކަން ވަނީ ފާހަގަކުރެވިފައިކަމަށްވެސް އެބަޔާނުގައި ވެއެވެ. އަދި މިކަން މިހެން ހިނގާފައިވާތީ، އެ ޑިޕާޓްމަންޓުން މުންޑޫގެ ރައްޔިތުންގެ ކިބައިން ނިހާޔަތަށް މާފަށް އެދޭކަމަށާ، އަދި މިކަން ހިނގާފައިވާގޮތް ބަލައި، މިކަމުގައި އިހްމާލުވާ ފަރާތްތަކާމެދު ފިޔަވަޅު އަޅާނޭ ކަމަށާއި، މިފަދަ ކަންކަން ތަކުރާރު ނުވާނޭ ގޮތަކަށް ކަންކަން އިންތިޒާމްކުރާނޭ ކަމުގެ ޔަގީންކަން ވެސް ރައްޔިތުންނަށް ދެއްވާކަމަށް އެޑިޕާޓްމަންޓުގެ ބަޔާނުގައި ވެއެވެ.
ރައީސްގެ ކަނޑައެޅުއްވުމަށް ވާނީ ކިހިނެއް؟
މުންޑޫއަކީ މީހުން ދިރިނޫޅޭ ރަށެއް ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ކަނޑައަޅުއްވި ކަނޑައެޅުއްވުން އެމަނިކުފާނު މިރޭ ބާތިލުކުރައްވާފައިވާކަމަށް ރައީސް އޮފީހުންވަނީ ހާމަކުރައްވާފައެވެ. އެހެންކަމުން ލ.މުންޑޫއަކީ ފަޅުރަށެއް ނޫނެނެވެ.
