ޖެހިޖެހިގެން ތިންފަހަރު ގޯދިއްޔާ ފުޓުސަލް ކަޕް ކާމިޔާބުކޮށް ތަށި މިލްކުކުރި ފުރަތަމަ ޓީމުގެ ގޮތުގައި ހިތަދޫ އެފްސީ ބޭރުމަތި ފުޓުސަލްގެ ތާރީޚުން ޖާގައެއް ހޯދައިފިއެވެ.
އެޓީމުން މިމުބާރާތުގެ ތަށި މިލްކުކުރީ ފޭދޫ ފްރެންޑްސް ކުލަބާ ބައްދަލުކޮށް މެޗުގެ ފުރިހަމަ ވަގުތު ހަމަވީއިރު ދެޓީމުންކުރެ ޓީމަކަށް ލަނޑެއް ނުޖެހި އެއްވަރުވުމުން ޕެނަލްޓީ ޖަހައިގެން 4-3 އިން ފްރެންޑްސް ކުލަބު ބަލިކޮށްގެންނެވެ.
މި މެޗު ކުޅެފައިވަނީ ބޯވާރޭތެރޭގައެވެ. ފޯރިގަދަ ކުޅުމެއް ފެނުނު މި މެޗުގައި ދެޓީމުން ވެސް ވަނީ މެޗުން މޮޅުވާން ކަށިން ހިތްވަރު ނެރެގެން މަސައްކަތް ކޮށްފައެވެ.
މެޗަށްފަހު މުބާރާތުގެ އެކިވަނަތަކަށް ހޮވުނު ކުޅުންތެރީންނާއި، ޗެމްޕިއަންޓީމާއި ރަނަރއަޕް ޓީމަށް އިނާމާއި ހަނދާނީ ލިޔުންވަނީ ދީފައެވެ.
ޗެމްޕިއަން ބޭރުމަތީ ޓީމަށް ތައްޓާއި ފައިސާގެ އިނާމް (އަށްޑިހަ ފަސް ހާސް ރުފިޔާ) އާއި މެޑެއްޔާއި އައްޑޫ ސިޓީ ކައުންސިލުން ދެއްވާ ޓްރޮފީ އެޓީމާ ޙަވާލުކޮށް ދެއްވީ މި މެޗުގެ ޝަރަފްވެރި މެހުމާން ހެޕީމާކެޓު ޕްރައިވެޓް ލިމިޓެޑުގެ ސީއީއޯ ޢަލީ އިޙުސާނެވެ. ދެވަނަ ޓީމަށް މެޑެއްޔާއި ފައިސާގެ އިނާމް ޙަވާލު ކޮށްދެއްވީ އައްޑޫ ސިޓީގެ ޑެޕިޔުޓީ މޭޔަރ މުޙައްމަދު ޔަސްރިފެވެ.
ފައިނަލް މެޗުގެ މޮޅު ކުޅުންތެރިއާގެ މަޤާމު ހޯދީ ފްރެންޑްސް ކުލަބުގެ ޖާޒީނަމްބަރު 6 ޙުސައިން ޝަރީފެވެ. އުންމީދީ ކުޅުންތެރިއާއަށް ހޮވުނީ ޒިލޯންގެ ޖާޒީނަމްބަރ 4 ޙަސަން ރައުފެވެ. އެންމެ ގިނަ ގޯލް ޖެހި ކުޅުންތެރިއަކީ ފްރެންޑްސް ކުލަބުގެ ޖާޒީނަމްބަރ 7 މުޙައްމަދު އިމްރާނެވެ. މުބާރާތުގެ އެންމެ މޮޅު ކޯޗަކަށް ހޮވިފައިވަނީ އެފްސީ ބޭރުމަތީގެ އަޙުމަދު ނަސީމެވެ.
ފެއާޕްލޭ ޓީމަކީ އެފްސީ ޒެފިއާއެވެ. ފެއާޕްލޭ ކުޅުންތެރިއަކީ އެޓީމުގެ ޖާޒީ ނަމްބަރު 8 ޝަމްވީލް ޤާސިމް (ބޮންޑާ) އެވެ. އެންމެ މޮޅު ގޯލްކީޕަރަކީ އެފްސީ ބޭރުމަތީގެ ޖާޒީ ނަމްބަރ 1 މުޙައްމަދު ޝަފީގެވެ.
މުބާރާތުގެ އެންމެ މޮޅު ކުޅުންތެރިއަކަށް ހޮވިފައިވަނީ ފްރެންޑްސް ކުލަބުގެ ޙުސައިން ޝަރީފެވެ. މި މުބާރާތުގެ އެންމެ މޮޅު ފަސް ކުޅުންތެރިންނަށް ހޮވިފައިވަނީ އެފްސީ ބޭރުމަތީގެ ޢަލީ ހާފިޒު، އިބްރާހީމް މުބީން އަޙުމަދު ރަޝީދު، ފްރެންޑްސް ކުލަބުގެ ޙުސައިން ޝަރީފް، މުޙައްމަދު އިމްރާން، ޔަންގްވަންސްގެ އިސްމާޢީލް މުނީޒެވެ.
