ސޫރިޔާގެ ސިފައިންވަނީ ދެ ބެރެލްގެ ކްލޮރިންގޭސް ބޮން އިދިކޮޅު ހަނދުރާމަވެރިން އުޅޭ ސަރަޙައްދުތަކަށް އަޅާފައިކަމަށް އެކްޓިވިސްޓުން ތުހުމަތުކުރޭ.
ސޫރިޔާގެ ޙަލަބުގެ މީހުން ދިރިއުޅޭ ބައެއް އަވަށްތަކަށް ސަރުކާރުގެ ސިފައިން ދިން ކްލޮރިން ގޭހުގެ ބޮމުގެ ޙަމަލާއެއްގައި މަދުވެގެން އެކަކުމަރުވެ، އެތައްބަޔަކު ވޭނާއެކު ނުރައްކާތެރި ޙާލަތެއް ތަޙައްމަލުކުރަމުންދާކަމަށް، ސޫރިޔާގެ ސިއްޙީ އިދާރާތަކާއި، އިންސާނިއްޔަތަށްޓަކައި މަސައްކަތްކުރާ އެކްޓިވިސްޓުން ބުނެފިއެވެ.
ކްލޮރިން ގޭހުގެ ބޮމުން ބަރާކޮށްފައިވާ ދެ ހެލިކޮޕްޓަރެއްގައި ސޫރިޔާގެ ސިފައިންވަނީ ޢާއްމުން ދިރިއުޅޭ އަވަށްތަކަށް ޙަމަލާދީފައިކަމަށާ، މިހަމަލާތަކުގައި މިހާތަނަށް އެކަކު މަރުވެފައިވާކަން ޔަޤީންކުރެވިފައިވާއިރު، 100 އަށްވުރެގިނަމީހުންވަނީ ސީރިއަސް ޙާލަތެއްގައިކަމަށް ޚަބަރުލިބެއެވެ.
ސޫރިޔާގައި މީހުން ސަލާމަތްކުރުމުގެ މަސައްކަތުގައި ޙަރަކާތްތެރިވާ ޖަމާޢަތްތަކުންވެސް ވަނީ މިއީ ސަރުކާރުގެސިފައިންގެ ޢަމަލެއްކަމަށް ތުހުމަތުކޮށްފައެވެ. ޢާއްމުވެފައިވާ މިޙާދިސާގެ ވީޑިއޯތަކުން ފެންނަނީ ޙަމަލާގެ އަސަރުކޮށްގެން ގިނަ ޢަދަދެއްގެ ކުޑަކުދިން ނޭވާނުލެވިގެން ތެޅޭމަންޒަރާއި، އެކުދިންނަށް ފަރުވާދިނުމަށް އޮކްސިޖަން މާސްކާއި، ފެންބޭނުންކޮށްގެން ސިއްޙީ އެހީތެރިން މަސައްކަތްކުރާ މަންޒަރެވެ.
