'ގެސްޓްހައުސް ކޮންފަރެންސް 2016' ގެ ނަމުގައި ގެސްޓްހައުސްތަކަށް ހާއްސަ ކުރެވިގެން ރާއްޖޭގައި ބާއްވާ ފުރަތަމަ ކޮންފަރެންސްގެ ޓެލެކޮމް ޕާޓްނަރަކަށް ދިވެހިރާއްޖޭގެ އެންމެ ބޮޑު މުވާސަލާތީ ކުންފުނި ދިރާގު ހަމަޖައްސައިފިއެވެ.
މޯލްޑިވްސް ގެޓް އަވޭސްއިން އިންތިޒާމް ކޮށްގެން މި އަންނަ ސެޕްޓެމްބަރު މަހުގެ 24 ވަނަ ދުވަހު ވިލާ ކޮލެޖުގައި ބޭއްވުމަށް ހަމަޖެހިފައިވާ އެއް ދުވަހުގެ މި ކޮންފަރެންސްގެ ޓެލެކޮމް ޕާޓްނަރެއްގެ ގޮތުގައި ދިރާގު ހަމަޖައްސައި އެއްބަސްވުމުގައި ސޮއިކޮށްފައިވަނީ މިއަދު ދިރާގު ހެޑް އޮފީހުގައި ބޭއްވުނު ހަފްލާއެއްގައެވެ.
އެގޮތުން ދިރާގުގެ ފަރާތުން އެއްބަސްވުމުގައި ސޮއިކޮށްފައިވަނީ ޗީފް މާކެޓިންގ އޮފިސަރ އިޒަބްލް ހަޖްރީ އަދި މާކެޓިންގ ކޮމިއުނިކޭޝަންސް އެންޑް ޕީއާރު މުހަންމަދު މިރުޝާން ހަސަނެވެ. އަދި މޯލްޑިވްސް ގެޓް އަވޭސްގެ ފަރާތުން އެއްބަސްވުމުގައި ސޮއިކޮށްފައިވަނީ އެކުންފުނީގެ އެމް،ޑީ އަހްމީމް އަބްދުލް ރައްޒާޤް އަދި ބިޒްނަސް ޑިވެލޮޕްމަންޓް ޑިރެކްޓަރ ޑރ. މުހަންމަދު ސަނީ އުމަރެވެ.
މިއަދު ވެވުނު މި އެއްބަސްވުމާއި ގުޅޭގޮތުން ދިރާގުގެ ޕަބްލިކް ރިލޭޝަންސް މެނޭޖަރ އިމްޖާދް ޖަލީލް ވިދާޅުވީ ދިރާގަކީ އަބަދުވެސް ދިވެހި ވިޔަފާރިތައް ކުރިއެރުވުމަށް އެ ފަރާތްތަކަށް ވެދެވެން އޮތް ދާއިރާއަކުން އެއްބާރުލުންދީގެން މަސައްކަތް ކުރަމުން އަންނަ ކުންފުންޏެއްކަމަށެވެ. އަދި ގެސްޓްހައުސްގެ ވިޔަފާރިއަކީ ރާއްޖޭގައި މިހާރު އެންމެ ކުރިއަރަމުން އަންނަ އެއް ސިނާއަތަށް ވާއިރު އެފަދަ ވިޔަފާރިތަކަށް ކުރިއަރާނެ ފުރުސަތުތައް ޓެކްނޮލޮޖީގެ ތެރެއިންވެސް ހޯދައިދިނުމަށް މަސައްކަތް ކުރަމުންދާ ކަމަށް އިމްޖާދް ވިދާޅުވިއެވެ.
"ދިރާގުން މިވަނީ ދާދިފަހުން ގެސްޓްހައުސް ވިޔަފާރިތަކަށް ހާއްސަ އިންޓަނެޓް ޕެކޭޖްތަކެއްވެސް ތައާރަފްކޮށްފައެވެ. މިފަދަ ފުރުސަތުތައް ކުދި ވިޔަފާރިތަކަށް ހުޅުވާލުމަށް އަޅުގަނޑުމެން އަބަދުވެސް މިދަނީ މަސައްކަތްކުރަމުންނެވެ. އަދި މި ކޮންފަރެންސަކީ ރާއްޖޭގެ ގެސްޓްހައުސް ވިޔަފާރިތަކަށް މިފަދަ އެތައް ފުރުސަތުތަކެއް ތަނަވަސްވެގެންދާނެ ޕްލެޓްފޯމެއް ކަމަށް ދިރާގުން ޤަބޫލުކުރާ ޤަބޫލުކުރުމަކީ މި ކޮންފަރެންސެއްގައި ޕާޓްނަރެއްގެ ގޮތުގައި ދިރާގުން ބައިވެރިވި އެންމެ ބޮޑު އެއްސަބަބުވެސްމެއެވެ."، އިމްޖާދް ވިދާޅުވިއެވެ.
"ދިރާގަކީ ވެސް މިހާރު ގެސްޓްހައުސްތަކަށް ހާއްސަ ހިދުމަތެއް ތަޢާރަފްކޮށް އެ ހިދުމަތް ފުޅާ ކުރަމުން އަންނަ ކުންފުންޏަކަށް ވާއިރު މި ކޮންފަރެންސްގެ އެހީގައި ގެސްޓްހައުސްތަކަށް މި ހިދުމަތަށް އިތުރަށް އަހުލުވެރިވުމުގެ ފުރުސަތުވެސް ލިބިގެންދާނެކަމަށް އަޅުގަނޑުމެން ޤަބޫލުކުރަމެވެ. އަދި ދިރާގަކީ މުޅި ރާއްޖެއަށް ނެޓްވޯކް ފުޅާކޮށްފައިވާ ކުންފުންޏަކަށްވާއިރު، އެ ހިދުމަތް ރާއްޖޭގެ ކޮންމެ ހިސާބަކަށްވެސް ފޯރުކޮށްދިނުމުގެ ޤާބިލުކަންހުރި ކުންފުންޏަކީވެސް ދިރާގެވެ. މި ސަބަބަށްޓަކައި ވެސް މި ކޮންފަރެންސްގައި ދިރާގުގެ ބައިވެރިވުން އޮތުމަކީ މި ކޮންފަރެންސަށް ލިބިގެންދާނެ އިތުރު ކުރިއެރުމަކާއި ފުރިހަމަކަމެއްކަމަށް އަޅުގަނޑުމެން ދެކެމެވެ."
ގެސްޓްހައުސް ކޮންފަރެންސަކީ މި ސިނާއަތުގައި ހަރަކާތްތެރިވާ ގިނަ ފަރާތްތަކެއް އެއް ފުރާޅެއްގެ ދަށުން ބައްދަލުވެ ވިޔަފާރިތައް ފުޅާކުރުމާއި ނެޓްވޯކިންގެ ފުރުސަތުތައް ހޯދޭނެ މަގެއް ޤާއިމްކޮށްދިނުމުގެ ގޮތުން މޯލްޑިވްސް ގެޓްއަވޭސް އިން އިންތިޒާމް ކޮންފަރެންސެކެވެ.
މި ކޮންފަރެންސްގައި މިހާރުވެސް 120 އަށް ވުރެ ގިނަ ގެސްޓްހައުސްތަކުން ބައިވެރިވެފައިވާއިރު، ގެސްޓްހައުސް ތަކަށް ތަފާތު ހިދުމަތްތައް ފޯރުކޮށްދޭ ގިނަ ކުންފުނިތަކަކުންނާއި ބޭރުގެ ޓްރެވަލް އެޖެންޓުން މިހާރުވެސް ބައިވެރިވަމުން އަންނަ ކަމަށް މޯލްޑިވްސް ގެޓް އަވޭސް އިން މައުލޫމާތު ދެއްވައެވެ.
